ސަރުކާރުގެ މަސް ކުންފުނި, މިފްކޯއަށް ދެމުންދާ ސަބްސިޑީ އޭނާގެ ވިޔަފާރިތަކަށް ވެސް ލިބެން ޖެހޭނެ ކަމަށާއި އަދި މިފްކޯއިން ނުނަގާ ކުއްޔެއް އެހެން ވިޔަފާރިއަކުން ވެސް ނެގިގެން ނުވާނެ ކަމަށް ރައްޔިތުންގެ މަޖިލީހުގެ މާލިއްޔަތު ކޮމިޓީގެ މުގައްރިރު ގާސިމް އިބްރާހިމް މިއަދު ވިދާޅުވެއްޖެ އެވެ.
ގާސިމް މިހެން ވިދާޅުވީ މަސް ގަންނަ އަގު ކުޑަކުރަން ސަރުކާރުން ނިންމި ނިމްމުމާއި މަސްވެރިންނަށް ޑޮލަރުން ފައިސާ ނުދޭ މައްސަލަ ބަލައިދޭން އެދި ހުޅުމާލެ ދެކުނު ދާއިރާގެ އެމްޑީޕީ މެންބަރު ޑރ. އަހްމަދު ޝަމްހީދު މާލިއްޔަތު ކޮމިޓީއަށް ހުށަހެޅުމުންނެވެ.
އެއާއެކު ސަރުކާރުގެ މެންބަރުން ވަނީ އެމްޑީޕީގެ މެންބަރުން އެކަން އޮތްގޮތް އޮޅުވާލުމަށް މަސައްކަތް ކުރަމުންދާ ކަމަށް ތުހުމަތު ކުރައްވާފަ އެވެ. ރައްދުގައި ޝަމްހީދު ވިދާޅުވީ މި މައްސަލަ ހުށަހެޅުއްވީ މަސްވެރިކަމަކީ "ސަބްސިޑީ މަތިމައްޗަށް ދީގެން ވެސް ބާއްވަން ޖެހޭ" އިންޑަސްޓްރީއަކަށް ވާތީ ކަމަށް ވިދާޅުވި އެވެ.
ޝަމްހީދަށް ފަހު ވާހަކަ ދައްކަވަމުން ރިޔާސަތުގައި އިންނެވި ގާސިމް ވަނީ އޭނާއަކީ މަސްވެރިކަމުގެ އިންޑަސްޓްރީއަށް 250 މިލިއަން ޑޮލަރަށް ވުރެ ގިނައިން އިންވެސްޓު ކޮށްފައިވާ މީހެއް ކަމަށާއި ސަރުކާރުގެ އިންވެސްޓްމަންޓުތަކަށް ވުރެ އޭނާގެ މާންދޫ އާއި ހޯނޑެއްދޫ "ވަރުގަދަވެފައި މޮޅުވާނެ" ކަމަށް ވިދާޅުވެފަ އެވެ.
"އަޅުގަނޑު ސަރުކާރުގައި އާދޭސްކޮށްފައި ދެންނެވިން ހޯނޑެއްދޫގައި އިންވެސްޓްމަންޓު ނިންމަން ވެގެން 100 މިލިއަން ރުފިޔާ މަށަށް ދޭށޭ ދަރަންޏަށް ފަސް އަހަރު ނޫނީ ހަ އަހަރުގެ ތެރޭގައި ދައްކަން ލޯނެއް ދޭށޭ. ބުނީމައި ޖަވާބު ވެސް ނުދިން," އެ ވާހަކަ ކުރިއަށްގެންދަވަމުން ގާސިމް ވިދާޅުވި އެވެ.
އޭނާ ދެއްކެވީ ނިމިގެންދިޔަ އެމްޑީޕީގެ ސަރުކާރުގެ ވާހަކަ ކަމަށާއި އެ ސަރުކާރުން އެހެން ވިޔަފާރިވެރިންނަށް މަސްވެރިކަމުގެ އިންޑަސްޓްރީގައި އިންވެސްޓު ކުރަން ލޯނު ދިން ކަމަށް ގާސިމް ވިދާޅުވި އެވެ. ބޮޑު ކަންނެލި މަސްވެރިކަމަށް ލޯނު ދިން ކަމަށް ވަކި ކުންފުންޏެއްގެ ނަން ފާހަގަނުކޮށް ގާސިމް ވިދާޅުވި އެވެ.
"ދެ ބިލިއަނެއްތޯ, އެއްހާސް މިލިއަނެއްތޯ ކޮންމެވެސް ވަރެއްގެ ވާހަކަ, 500 މިލިއަނެއް ބެހި ވާހަކަ ދެއްކިއިރު އަޅުގަނޑުމެންނަށް ނުދިނޭ. ދެން ކޮބައިތޯ މި ވާހަކަ ދައްކަނީ," ޝަކުވާ ކުރައްވަމުން ގާސިމް ވިދާޅުވި އެވެ.
ކަންކަން މިހެން އޮތްއިރު މިފްކޯއަށް ސަބްސިިޑީ ދީގެން އެ ކުންފުނި ހިންގަމުންދާ ކަމަށާއި އޭނާއަށް ދޫކޮށްފައިވާ ތަންތަނުން ކުލި ނަގާކަމުގެ ޝަކުވާ ވެސް ގާސިމް ކުރެއްވި އެވެ. އެއް މަސައްކަތެއް ކުރާ ބަޔަކަށް އެއް ގޮތަކަށް ކަންކަން ކުރަން ޖެހޭ ކަމަށް ގާނޫނު އަސާސީގެ ރޫހުން ދައްކުވައިދޭ ކަމަށް އޭނާ ވިދާޅުވި އެވެ.
"މިފްކޯއިން ކުލި ނުނަގާ ކަމަށް ވަންޏާ އަހަރުމެން އަތުން ވެސް ކުލި ނަގައިގެން ނުވާނެ. އެ މީހުންނަށް ދޭ ސަބްސިޑީ ވެސް އަހަރުމެންނަށް ވެސް ދޭން ޖެހޭނެ. އަހަރުމެންނަކީ ވެސް އެއް މަސައްކަތެއް ކުރާ އެއްބައެއް," ގާސިމް ވިދާޅުވި އެވެ.
ކޮމިޓީގެ އޯޑިއޯ ވަކި ހިސާބަކުން ކެނޑުމުން މި މައްސަލާގައި މާލިއްޔަތު ކޮމިޓީން ކުރިއަށްދާން ނިންމި ގޮތުގެ މައުލޫމާތެއް ނޭނގެ އެވެ.
