ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)ގެ އެކޮމޮޑޭޝަން ފެސިލިޓީ މެނޭޖްމަންޓް (އޭއެފްއެމް) ހިންގާ ބިން ސަރުކާރުގެ ޕްރޮޖެކްޓުތަކަށް ބޭނުން ކުރުމަށްޓަކައި, އެ ތަނުގެ ވިޔަފާރި ހުއްޓާލާ, ބައެއް މުވައްޒަފުން ވަކި ކުރަން ނިންމައިފި އެވެ.
ޖޫން ނުވައެއްގައި ބޭއްވި އެ ކުންފުނީގެ ބޯޑު ބައްދަލުވުމެއްގައި މި ނިންމުން ނިންމުމަށް ފަހު, އޭއެފްއެމްގެ މުވައްޒަފުންނަށް އެކަން އެންގީ މިއަދު މެމޯއެއް މެދުވެރިކޮށެވެ.
އެ މެމޯގައިވާ ގޮތުގައި އޭއެފްއެމް ހިންގާ ބިމަކީ ސަރުކާރުގެ ޕްރޮޖެކްޓުތަކަށް ބޭނުން ކުރުމަށް ނިންމައި އެއްބަސްވުމުގައި ސޮއިކޮށްފައިވާ ބިމެކެވެ. އަދި އޭއެފްއެމްގެ ވިޔަފާރި ނިމުމަކަށް ގެންނަން ނިންމީ, އެއީ ގެއްލުމުގައި ހިންގާ ވިޔަފާރިއަކަށް ވާތީ ކަމަށް ވެސް ބުނެފައި ވެއެވެ.
"ފެސިލިޓީގައި މަސައްކަތް ކުރަމުންދާ މުވައްޒަފުންގެ ތެރެއިން ކޯޕަރޭޝަނުގެ މަސައްކަތަށް މިވަގުތު ބޭނުންވާ މުވައްޒަފުން ފިޔަވައި އެހެން މުވައްޒަފުން, ވަޒީފާއާ ބެހޭ ގާނޫނު ނަންބަރު 2/2008ގެ 21 ވަނަ މާއްދާގެ (ނ) އަށް ރިއާޔަތް ކުރުމަށްފަހު ވަޒީފާއިން ވަކި ކުރެވޭނެ," އެ މެމޯގައި ވެއެވެ.
މެމޯގައި ބުނީ އާރްޑީސީގެ މަސައްކަތަށް ބޭނުންވާ މުވައްޒަފުންނަށް އެކަން ހިއުމަން ރިސޯސް ޑިޕާޓްމަންޓުން އަންގާނެ ކަމަށެވެ.
އާރްޑީސީން ބުނީ މުވައްޒަފުން ވަކިކުރުމުގައި ވަޒީފާއާ ބެހޭ ގާނޫނުގެ 21 ވަނަ މާއްދާގެ (ޅ) ގައިވާ ގޮތުގެ މަތިން މުވައްޒަފުންނާ މެދު އަމަލު ކުރެވޭނެ ކަމަށެވެ. އެ މާއްދާގެ ދަށުން ވަކިކުރާ މުވައްޒަފު އާރްޑީސީގައި މަސައްކަތް ކުރާތާ އެއް އަހަރު ނުވާ ނަމަ ވަކި ކުރަން ދެން ޖެހެނީ އެއް މަސް ދުވަހުގެ ނޯޓިސް ނުވަތަ އެ މުއްދަތަށްވާ ފައިސާ އެވެ.
އަދި އެއް އަހަރާއި ހަތަރު އަހަރާ ދެމެދުގެ މުއްދަތަށް އާރްޑީސީގައި މަސައްކަތް ކޮށްފައިވާ ނަމަ ވަޒީފާއިން ވަކިކުރަން ދޭން ޖެހެނީ ދެ މަސް ދުވަހުގެ ނޯޓިސް ނުވަތަ އެ މުއްދަތަށްވާ ފައިސާ އެވެ. ވަޒީފާ އަދާކުރި މުއްދަތު ހަތަރު އަހަރަށްވުރެ އިތުރުވާނަމަ ތިން މަސް ދުވަހުގެ ނޯޓިސް ނުވަތަ އެ މުއްދަތަށްވާ ފައިސާ ދޭން ޖެހެ އެވެ.
