ވެރިކަންކުރާ ޕީއެންސީގެ ސުޕަމެޖޯރިޓީ އޮތް 20 ވަނަ ރައްޔިތުންގެ މަޖިލީހަށް ހުށަހަޅައި، ބަހުސްކުރެވޭ މަރުހަލާގައި އޮތް ބިލެއް ނެތުމުން، އެއްވެސް ބަހުސެއް ނެތް އެޖެންޑާއަކާ އެކު މިއަދުގެ ޖަލްސާ ފަށައިފި އެވެ.
މަޖިލީހުގެ މިއަދުގެ އެޖެންޑާގައި މުޅީން ވެސް ހުރީ މަޖިލީހުގެ ރިޔާސަތުން އިއްވަން ހުރި ކަންކަމެވެ. އެއީ ސަރުކާރުގެ ފަރާތުން އަލަށް ހުށަހެޅި ދެ ބިލެއްގެ ފުރަތަމަ ކިޔުން އިއްވުމާއި ޔޫރަޕިއަން ޔޫނިއަންގެ ސަމޮއާ އެގްރިމެންޓްގައި ރާއްޖޭން ބައިވެރިވުމާ މެދު މަޖިލީހުގެ ރުހުން ހޯއްދަވަން ރައީސް ޑރ. މުހައްމަދު މުއިއްޒު ހުށަހަޅުއްވާފައިވާ މައްސަލަ ތަޅުމަށް އިއްވުމެވެ.
އެ މައްސަލަ ވެސް އޮތީ އެ މައްސަލަ އޮތް ކަން ޖަލްސާގައި އިއުލާނުކުރެއްވެވުމަށް ފަހު ކަމާ ގުޅޭ ކޮމިޓީއަށް ފޮނުވާ ގޮތަށެވެ.
އެޖެންޑާ އެގޮތަށް އޮތް އިރު މިއަދުގެ ޖަލްސާގައި ބަހުސެއް ކުރާނެ ފުރުސަތެއް މެންބަރުންނަށް ލިބިވަޑައިގެންނެވީ ފޭދޫ ދެކުނު ދާއިރާގެ ޕީއެންސީ މެންބަރު އިބްރާހީމް ދީދީ ހުށަހެޅުއްވި ކުއްލި މައްސަލައެކެވެ. އެ މައްސަލަަ މަޖިލީހަށް ބަލައިގަނެ ބަހުސްކުރަން ފާސްކުރީ އެކަމާ މެދު ގޮތެއް ނިންމަން ނެގި ވޯޓުގައި ބައިވެރިވެވަޑައިގެންނެވި 67 މެންބަރުންގެ އިއްތިފާގުންނެވެ.
މެންބަރު އިބްރާހީމް ހުށަހެޅުއްވީ ރާއްޖޭގެ ބޮޑު ބަޔަކަށް ކަރަންޓާއި ފެނުގެ ހިދުމަތްދޭ ފެނަކަ ކޯޕަރޭޝަނުގެ ތެރޭގައި އެކިއެކި ސަރުކާރުތަކުގެ ދުވަސްވަރު ހިންގާފައިވާ ކަމަށް ތުހުމަތުކުރެވޭ ހިޔާނާތުގެ މައްސަލަތައް ބަލަން ގޮވައިލާ ކުއްލި މައްސަލަ އެކެވެ.
މައްސަލަ މަޖިލީހަށް ބަލައިގަނެ، ބަހުސްގެ ފުރަތަމަ ފުރުސަތުގައި އިބްރާހީމް ދީދީ ވިދާޅުވީ ފެނަކައިން ފެށި 60 މަޝްރޫއަކަށް އެއް ބިލިޔަން ރުފިޔާ ހަރަދުކޮށްފައިވާ އިރު އެއިން އެއްވެސް މަޝްރޫއެއް ނިމިފައިނުވާ ކަމަށެވެ.
"މިފައިސާއަށް ވީނުވީ ގޮތެއް އެނގޭކަށް ނެތް، މިއިން މަޝްރޫއެއް ނިމިފަކާ ނެތް. މިސަރުކާރު ވުޖޫދަށް އައި އިރު، ވޭތިވެ ދިޔަ ފަސް އަހަރު މިހުރިހާ ފައިސާއެއް ހަރަދުކޮށްފައި، އައި އިރު މިއިން އެއްވެސް މަޝްރޫއެއް ނިމިފައި ނެތް،" އޭނާ ވިދާޅުވި އެވެ.
އޭނާ ވިދާޅުވި ގޮތުގައި ކުއްލި މައްސަަލަ ހުށަހެޅުއްވީ އެ މަޝްރޫއުތަކުގެ ފަންސާސް ޕަސެންޓް ވެސް ނިމިފައި ނުވާތީ ކަމަށާއި އެއީ ބަަލަން ޖެހޭ މައްސަލައެއް ކަމަށެވެ.
