އެމެރިކާއަށް ކުރައްވާ ރަސްމީ ދަތުރުފުޅުގައި ފޮރިން މިނިސްޓަރު މޫސާ ޒަމީރު، އެމެރިކާގެ ސެކެޓްރީ އޮފް ސްޓޭޓް އެންޓޮނީ ބްލިންކެންއާ ވޮޝިންޓަންގައި ބައްދަލުކުރައްވައިފި އެވެ.
މި ބައްދަލުކުރެއްވުމުގައި ދެ ގައުމުގެ ގުޅުން އިތުރަށް ބަދަހި ކުރުމާއި، ޑިމޮކްރަސީ ހަރުދަނާ ކުރުމުގެ އިތުރުން އިގްތިސާދީ ގޮތުންނާއި މޫސުމަށް އަންނަ ބަދަލުތަކާ ގުޅޭ ގޮތުން ވަނީ މަޝްވަރާ ކޮށްފަ އެވެ.
މީގެ އިތުރުން އާ ދާއިރާތަކުން ދެ ގައުމުގެ ގުޅުން ބަދަހި ކުރުމާއި ދިފާއީ ގުޅުމުގެ އިތުރުން ޑިމޮކްރަސީ ހަރުދަނާ ކުރުން އަދި މޫސުމަށް އަންނަ ބަދަލުތަކާ ގުޅޭ ގޮތުން ބައްދަލުވުމުގައި މަޝްވަރާ ކުރެއްވި އެވެ.
ބައިނަލްއަގުވާމީ އަދި ސަރަހައްދުގެ ސުލްހަ އާއި މެރިޓައިމް ސެކިއުރިޓީއާ ގުޅޭ ގޮތުން ވެސް ވަނީ ދެ ބޭފުޅުން މަޝްވަރާ ކުރައްވާފަ އެވެ.
ބްލިންކެން ވަނީ ރާއްޖޭގައި ކާމިޔާބު ކަމާއެކު ރިޔާސީ އިންތިހާބު އަދި މަޖިލިސް އިންތިހާބު ބޭއްވި ކަމަށްޓަކައި މަރުހަބާ ވިދާޅުވެ، މޫސުމަށް އަންނަ ބަދަލުތަކަށް ރާއްޖެއިން ކުރަމުންދާ މަސައްކަތް ފާހަގަ ކުރައްވާފަ އެވެ.
ޒަމީރު ވަނީ ބައްދަލު ކުރެއްވުމުގައި އެމެރިކާއިން ރާއްޖޭގެ ތައުލީމު ކުރިއެރުވުމަށް ދެއްވާ ފުރުސަތުތައް ފާހަގަ ކުރައްވައި، އެމެރިކާއިން ރާއްޖެއަށް ވިސާގެ ލުއިތައް ހޯދުމާ ގުޅޭ ގޮތުން މަޝްވަރާ ކުރައްވާފަ އެވެ. އަދި ޓޫރިޒަމް އާއި ވިޔަފާރީގެ ދާއިރާއިން ގުޅުން ބަދަހި ކުރުމަށް ވެސް މަޝްވަރާ ކުރެއްވި އެވެ.
ބުރާސްފަތި ދުވަހުގެ ނިޔަލަށް ޒަމީރު ކުރައްވާ މި ދަތުރުފުޅުގައި އެމެރިކާގެ އިސް އޮފިޝަލުންނާ ބައްދަލު ކުރެއްވުމަށް ވަނީ ހަމަޖެހިފަ އެވެ. އަދި ނިއު ޔޯކްގައި ދިރިއުޅޭ ދިވެހިންނާ ވެސް ޒަމީރު ބައްދަލު ކުރެއްވުމަށް ވަނީ ހަމަޖެހިފަ އެވެ.
