ދައުލަތުގެ މަސްކުންފުނި މިފްކޯއިން މިހާރު މަސް ގަންނަ އަގަކީ ދެކޮޅު ޖެހޭ އަގެއް ނޫން ކަަމަށް ވިދާޅުވެ، އެ އަގު ބަދަލުކުރުުމުގެ ހިޔާލު ރައްޔިތުންގެ މަޖިލީހުގެ ދިއްގަރު ދާއިރާގެ ޕީއެެންސީ މެންބަރު އަދި މަޖިލީހުގެ ނައިބުރައީސް އަހުމަދު ނާޒިމު ފާޅުކުރައްވަައިފި އެވެ.
މަސްވެރިންގެ އަތުން ގަނެފައިވާ މަހަށް އަގުގެ ގޮތުގައި ދޭން ޖެހޭ ގިނަ އަދަދެއްގެ ފައިސާ ނުދީ އޮތުމުން ކަންބޮޑުވުން ފާޅުކުރައްވައި މަޖިލީހުގެ މަރަދޫ ދާއިރާގެ އެމްޑީޕީ މެންބަރު އަހުމަދު ދީދީ މަޖިލީހުގެ މިއަދުގެ ޖަލްސާއަށް ހުށަހެޅުއްވި ކުއްލި މައްސަލައިގެ ބަހުސްގައި ނާޒިމު ވިދާޅުވީ މަސްގަންނަ އަގު ކަނޑައެޅުމަކީ އެކަމުން ސިޔާސީ މަންފާއެއް ހޯދަންވީ ކަމެއް ނޫން ކަމަށެވެ. އޭގެ ބަދަލުގައި މިފްކޯއަށް ދެކޮޅު ޖެއްސޭ އަގެއްގައި މަސް ގަންނަ ނަމަ މަސްވެރިންނަށް ދޭން ޖެހޭ ފައިސާ ނުދެވިގެން އުޅެން ނުޖެހުނީސް ކަމަށް ވެސް އޭނާ ވިދާޅުވި އެވެ.
ސަރުކާރު ހިންގާ ޕީއެންސީގެ ސުޕަ މެޖޯރިޓީ އޮންނަ މަޖިލީހަށް އެމްޑީޕީގެ މެންބަރަކު ހުށަހެޅި ކުއްލި މައްސަަލަ ބަލައިގަނެ ބަހުސްކުރަން ފާސްކުރީ މިއަދުގެ ޖަލްސާގައި އެކަމަށް ނެގި ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުންނެވެ.
އެ މައްސަލައިގެ ބަހުސްގައި ޕީއެންސީގެ ބައެއް މެންބަރުން މައްސަލަ ހުށަހެޅި މެންބަރަށް ފާޑުވިދާޅުވި ނަމަވެސް ނާޒިމު ވިދާޅުވީ އެއީ ހަގީގީ މައްސަލައެއް ކަމަށެވެ. އޭނާ ވިދާޅުވި ގޮތުގައި މަސްވެރިން އަތުން މިހާރު ގަނެފައިވާ މަހަށް އަގު ދޭން ޖެހޭނީ ގަތް އިރު އެއްބަސްވި އަގެވެ. އެ އަގު ނުދީ އޮތީ ދެވެން ނެތިގެން ކަމަށާއި އެއީ ސަރުކާރަށް ވާރުތަވި ހާލަތެއް ކަމަށް ވެސް އޭނާ ވިދާޅުވި އެވެ.
"އެހެން ނަމަވެސް އަޅުގަނޑުމެން ވިސްނައިލަން ޖެހޭ މިއަގު މުރާޖައާކުރުމާ ދޭތެރޭގައި، ކޮންމެހެން ކުރަން ޖެހޭ ކަމެއް މިއީ،" ނާޒިމު ވިދާޅުވި އެވެ.
މިފްކޯއަށް ގަންނަ ކަނޑުމަހަށް މިހާރު ދޭ އަގަކީ ކިލޯއަކަށް 20 ރުފިޔާ އެވެ. އެ އަގު ދޭން ކޮންމެ މަސްކިލޯއަކަށް ހަތް ރުފިޔާގެ މަގުން ސަރުކާރުން ސަބްސިޑީ ދޭން ޖެހެ އެވެ. އެއީ މިފްކޯއިން އެެކްސްޕޯޓް ކުރާ ރޯމަހަށް ލިބެނީ ކިލޯއަކަށް 13 ރުފިޔާގެ މަގުން ކަމަށް ވާތީ އެވެ.
ނާޒިމު ވިދާޅުވީ މަސްވެރިންގެ އާބާދީ އަކީ 17،000 ކަމަށް ވާއިރު، އެހާ ބޮޑު އާބާދީއަކަށް ސަބްސިޑީ ދިނުމަކީ އިޖުތިމާއީ އަދުލުގެ ގޮތުން ބަލާއިރު ވެސް އިންސާފެއް ނޫން ކަމަށެވެ.
"އެހެންވީމާ އަޅުގަނޑުމެން އެބަ ޖެހޭ މިކަމުގައި ދެވަނަ ވިސްނުމަކަށް ދާން، އަޅުގަނޑުމެންގެ ޕާޓީގެ ކުލަތަކާއި ޕާޓީގެ ރޮނގުތައް ފަހަނައަޅައި އަޅުގަނޑުމެން އެބަ ޖެހޭ ހަގީގަތް ގަބޫލުކުރާ ބަޔަށް ވާން،" އޭނާ ވިދާޅުވި އެވެ.
އިދިކޮޅު އެމްޑީޕީއަށް އޭނާ ގޮވައިލެއްވީ ސިޔާސީ ވިސްނުން އެއްފަރާތްކޮށް، އެކަމުގައި ގައުމަށް ފައިދާހުރި ހައްލެއް ހޯދުމަށް މަސައްކަތް ކުރުމަށެވެ. އެކަމުން ސިޔާސީ މަންފާއެއް ހާސިލުކުރަން އުޅެގެން މިހާރަކު ވެސް އަދި ފަހަކުން ވެސް އެއްވެސް ފައިދާއެއް ނުކުރާނެ ކަމަށް ވެސް އޭނާ ވިދާޅުވި އެވެ.
"އެހެންވީމާ އަޅުގަނޑުމެން ކުރަންވީ ކަަމަކީ އެއީ، ބާރަ ރުފިޔާއަށް ވިޔަސް، ފަނަރަ ރުފިޔާއަށް ވިޔަސް ދެވެން އޮތް އަގެއްގައި، ދެކޮޅު ޖެހޭ އަގެއްގައި މިކަން ކުރީމާ މަސްވެރިންނަށް ވެސް ލާރިކޮޅު ބަރާބަރަށް ވެސް ލިބޭނެ،" ނާޒިމް ވިދާޅުވި އެވެ.
ނާޒިމު ވިދާޅުވީ އެ ހަގީގަތް ގަބޫލުކޮށް އެގޮތަށް މަސައްކަތް ކުރަން ޖެހޭ ކަމަށެވެ.
މަސްވެރިންގެ އަތުން ގަތް މަހަށް ދޭން ޖެހޭ އަގުގެ ތެރެއިން 50 އަކަށް މިލިޔަން ރުފިޔާ ނުދީ އޮތުމުން ބައެއް މަސްވެރިން ވަނީ އިހުތިޖާޖުކުރަން ފަށައިފަ އެވެ. މަސްވެރިންނަށް ދޭން ޖެހޭ ފައިސާ ނުދީގެން މިއަހަރު ދެތިން ފަހަރެއްގެ މަތިން މަސްވެރިން މުޒާހަރާ ކުރި އެވެ.
