ސަރުކާރުގެ ލެޖިސްލޭޓިވް އެޖެންޑާއާމެދު ކަންބޮޑުވާ ކަމަށް އެމްޑީޕީގެ ޕާލިމަންޓަރީ ގްރޫޕުން ބުނެފި އެވެ.
އެމްޑީޕީގެ ޕާލިމަންޓްރީ ގްރޫޕުން ރައްުޔިތުންގެ މަޖިލީހުގެ އިދާރާގައި މިއަދު ބޭއްވި ނޫސްވެރިންގެ ބައްދަލުވުމުގައި ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) ވިދާޅުވީ ސަރުކާރުން އިއުލާނު ކޮށްފައިވާ ލެޖިސްލޭޓިވް އެޖެންޑާއާމެދު އެޕާޓީގެ ވަރަށް ބޮޑެތި ކަންބޮޑުވުންތައް އެބަ ހުރި ކަމަށެވެ.
"ބައެއް ގާނޫނުތަކަކީ އެ ގާނޫނުތަކަށް ރަނގަޅަށް އަމަލުކުރަން ނުފައްޓަނީސް އެއަށް އިސްލާހުތައް ހުށަހެޅުމަށްޓަކައި ސަރުކާރުން މަސައްކަތް ކުރަމުންދާ ގާނޫނުތައް, ކިހިނެތްތޯ އެނގޭނީ ގާނުނަކަށް އަމަލުކުރަން ނުފަށާނީސް އެ ގާނޫނެއްގައި ހުރި މައްސަލަތައް ދެނެގަންނަން," މައުރޫފް ވިދާޅުވި އެވެ.
އަމަލުކުރަން ނުފަށާ ގާނުނުތަކަށް އިސްލާހު ހުށަހަޅަން ސަރުކާރުން މަސައްކަތްކުރާ ސަބަބު އޮޅުންފިލުވަން ފުޅާ ދާއިރާއެއްގައި މަސައްކަތް ކުރަމުން އަންނަ ކަަމަށް ވެސް އޭނާ ވިދާޅުވި އެވެ. އެމްޑީޕީގެ ޕާލިމަންޓްރީ ގްރޫޕުގައި މެންބަރުން މަދުވީ ނަމަވެސް ރައްޔިތުންގެ ހައްގުގައި ކުރެވެން ހުރި ހުރިހާ ކަމެއް ކުރުމުގައި އެ ގްރޫޕް ދެމިތިބޭނެ ކަމަށް ވެސްް ވިދާޅުވި އެވެ.
ސަރުކާރުގެ ލެޖިސްލޭޓިވް އެޖެންޑާގައި ހިމެނެނީ 15 މައުޟޫއަކާ ބެހޭ 213 ބިލު ކަމަށްވާއިރު, އޭގެ ތެރޭގައި މުޅިން އާ 78 ބިލު ވެސް ހިމެނެ އެވެ.
ސަރުކާރުން ހުށަހަޅާ ބިލުތަކުގެ ތެރޭގައި މިހާރު އަމަލުކުރަމުންދާ ގާނޫނުތަކުގެ ތެރެއިން އިސްލާހު ގެންނަންޖެހޭ ނުވަތަ އުވާލަންޖެހޭ ގަނޫނުތަކަށް އިސްލާހު ގެނައުމަށްޓަކައި 135 ބިލެއް ހިމެނޭ ކަމަށް އެޓާނީ ޖެނެރަލްގެ އޮފީހުން ބުނެފައިވެ އެވެ.
