ދެކުނު އެފްރިކާގެ ޤައުމެއްކަމަށްވާ މަލާވީ ނައިބު ރައީސާއި އިތުރު ނުވަ މީހަކު ދަތުރުކުރެއްވަމުން ގެންދެވި މަތިންދާ ބޯޓެއް ވެއްޓި ބޯޓުން ދަތުރުކުރި އެންމެން ނިޔާވެފައިވާ ކަމަށް އެގައުމުގެ ރައީސް ވިދާޅުވެއްޖެ އެވެ.
ޖުމްލަ 10 މީހުންނާއެކު ދަތުރުކުރި ބޯޓުގެ ބައިތައް ފެނިފައިވާއިރު، ބޯޓުން ދަތުރުކުރި އެއްވެސް މީހަކު ސަލާމަތެއްނުވެ އެވެ. ބޯޓު ގެއްލިފައިވަނީ ވަރަށް މޫސުން ގޯސްވެފައިވަނިކޮށް އުދުހެނިކޮށް ކަމަށް ރިޕޯޓްތައް ބުނެ އެވެ.
ހަތް ފަސިންޖަރުންނާއި ތިން އަސްކަރީ ފަޅުވެރިންނާއެކު ދަތުރުކުރި މި ފްލައިޓް "ރާޑަރުން ބޭރަށް ގެއްލުނީ" ހޯމަ ދުވަހުގެ ހެނދުނު ވެރިރަށް ލިލޮންގްވޭ އިން ފުރުމަށް ފަހު އެވެ.
ނައިބު ރައީސް އަވަހާރަވި ޚަބަރު މަލާވީގެ ރައީސް ލާޒާރޯ ޗަކްވެރާ އިޢުލާނުކުރެއްވީ މިއަދު (11 ޖޫން 2024، އަންގާރަ) ލައިވް ބްރޯޑްކާސްޓެއްގަ އެވެ.
ކޮރަޕްޝަންގެ މައްސަލައެއްގައި 2022 ވަނަ އަހަރު ނައިބު ރައީސް ޗިލީމާ ހައްޔަރުކޮށްފައިވެއެވެ. ޗިލީމާ ހައްޔަރުކޮށްފައިވަނީ މަލާވީގެ ކޮރަޕްޝަން ވޮޗްޑޯގުން ކުރި ތުހުމަތެއްގެ ދަށުންނެވެ. އެ ތުހުމަތުގައި ބުނެފައިވަނީ ދެ ކުންފުންޏަކަށް ސަރުކާރުގެ ކޮންޓްރެކްޓްތައް ހޯދުމަށް އެހީތެރިވެދިނުމުން ނައިބު ރައީސް ޗިލީމާއަށް ހަދިޔާ ލިބުނު ކަމަށެވެ.
ނަމަވެސް، އޭނާ އެއްވެސް ގޯހެއް ހެދި ކަމަށް އިންކާރުކުރުމުން މިދިޔަ މަހު ދައުވާތައް ބާތިލުކޮށް މިނިވަންކޮށްފައިވެ އެވެ. ދައުވާތައް ބާތިލުކުރި އެއްވެސް ސަބަބެއް އެއްވެސް އިދާރާއަކުން ހާމަކޮށްފައެއް ނުވެ އެވެ.
އަންނަ އަހަރު ރިޔާސީ އިންތިހާބަށް ކުރިމަތިލެއްވުމަށް ފުރުސަތު އޮތް ބޭފުޅެއްގެ ގޮތުގައި އޭނާ ބެލެވިފައިވެ އެވެ.
