ބީޖޭޕީ ގެ ލީޑަރު ނަރެންދުރަ މޯދީ ވެރިކަމުގެ ތިންވަނަ ދައުރަކަށް އިންޑިއާގެ ބޮޑުވަޒީރުކަމުގެ ހުވާ ކުރައްވައިފި އެވެ.
ހުވާ ކުރުމުގެ ރަސްމިއްޔާތު އޮތީ އިންޑިއާގެ ރިޔާސީ ގަނޑުވަރު، ރާޝްޓްރަޕަތީ ބަވަންގަ އެވެ.
އެ ރަސްމިއްޔާތުގައި ރާއްޖޭގެ ރައީސް ޑރ. މުހައްމަދު މުއިއްޒުގެ އިތުރުން ވެސް އިންޑިއާގެ އަވަށްޓެރި ސްރީލަންކާގެ ރައީސް ރަނިލް ވިކްރެމަސިންހެ އާއި ސިޝެލްސްގެ ނައިބު ރައީސް އަހުމަދު އަފީފް އާއި ބަންގްލަދޭޝްގެ ބޮޑުވަޒީރު ޝެއިހް ހަސީނާ އާއި މޮރިޝަސްގެ ބޮޑުވަޒީރު ޕްރަވިންދު ކުމާރް އާއި ނޭޕާލުގެ ބޮޑުވަޒީރު ޕުޝްޕާ ކަމާލް އާއި ބޫޓާނުގެ ބޮޑުވަޒީރު ޝެރިންގް ޓޮބްގޭ ބައިވެރިވެވަޑައިގެންނެވި އެވެ.
ވެރިކަމުގެ ތިންވަނަ ދައުރު މޯދީ ކަށަވަރު ކުރެއްވީ ބީޖޭޕީއާއެކު ކޯލިޝަން ހަދާފައިވާ އެންޑީއޭއަށް ލިބުނު ގޮނޑިތައް ހިމަނައިގެންނެވެ.
ނިމިދިޔަ ދައުރުގައި މޯދީ ނިސްބަތްވެވަޑައިގަންނަވާ، ބީޖޭޕީއަށް އިންޑިއާގެ ގާނޫނު ހަދާ މަޖިލީހުގެ ތިރިގެ، ލޮކްޝަބާގެ ސާފު މެޖޯރިޓީ އޮތް ނަމަވެސް މިފަހަރުގެ އިންތިހާބުގައި އެކަނި ސަރުކާރެއް އެކުލަވައިލެވޭ އަދަދަށް އެ ޕާޓީއަށް މަޖިލީހުގެ ގޮނޑި ލިބިފައެއް ނުވެ އެވެ.
މިދިޔަ 10 އަހަރާ ހިލާފަށް މި ދައުރުގައި އިންޑިއާގެ ސަރުކާރަށް ބަދަލުތަކެއް އަންނާނެ ކަމަށް މަސްރަހު ދިރާސާ ކުރައްވާ މުހައްލިހުން ވިދާޅުވެ އެވެ. ސަބަބަކީ މި އުފެދޭ ސަރުކާރުގައި ބީޖޭޕީގެ ބާރު މުތުލަގަށް ނޯންނާތީ ކަމަށް އެ ބޭފުޅުން ވިދާޅުވެ އެވެ.
އެ ވާހަކަތަކަށް ބާރުލިބޭ ވާހަކަތަކެއް މޯދީ ވެސް ވަނީ ދައްކަވައިފަ އެވެ. އާންމު އިންތިހާބު ކާމިޔާބު ކުރެއްވުމަށްފަހު ސަޕޯޓަރުންގެ ކުރިމައްޗަށް ނުކުމެވަޑައިގްނެ ފުރަތަމަ ދެއްކެވި ވާހަކައިގައި މޯދީ ވަނީ އެކުލަވައިލާނީ އެންޑީއޭގެ ސަރުކާރެއް ކަމަށް ވިދާޅުވެފަ އެވެ.
މިއީ 1962 ގެ ފަހުން އިންޑިއާގައި ސަރުކާރަކުން ތިންވަނަ ދައުރެއް ކާމިޔާބުކުރި ފުރަތަމަ ފަހަރެވެ.
