ދިވެހިރާއްޖޭގެ އިގުތިސާދީ ހާލަތު މިވަގުތު އޮތް ގޮތް ސަރުކާރުން ހާމަ ކުރަންޖެހޭ ކަމަށާއި މިހާރު ދިމާވެފައި އޮތް އިގުތިސާދީ ހީނަރުކަމުން އަރައިގަތުމަށް ހިތި ބޭހެއް ބޯންޖެހޭ ނަމަ އެކަން ވެސް ރައްޔިތުންނަށް ސަރުކާރުން ސާފުކޮށްދޭން ޖެހޭ ކަމަށް މަޖިލީހުގެ ނައިބު ރައީސް، އަހުމަދު ނާޒިމް ވިދާޅުވެއްޖެ އެވެ.
މަޖިލީހުގެ މާލިއްޔަތު ކޮމެޓީގެ ބައްދަލުވުމުގައި އިއްޔެ ވާހަކަ ދައްކަވަމުން ނާޒިމް ވިދާޅުވީ މިހާރު އިންތިހާބު މޫސުން ވެސް ނިމިއްޖެ ކަމަށާއި އިގުތިސާދީ ހާލަތާ ގުޅޭގޮތުން ސިއްރު ކުރަންޖޭ އެއްވެސް ކަމެއް ނެތް ކަމަށެވެ.
"ރާއްޖޭގެ ރައްޔިތުންނަށް ހަމަ ތެދުބަހުން ވަރަށް ތިލަކޮށް މިވާހަކަތައް އެބަޖެހޭ ދެކެވެން. އެއީ ސަބަބަކީ ރައްޔިތުންގެ އެކްސްޕެކްޓޭޝަންއާ މިހުރިހާ އެއްޗެއް މިބިނާ ވަނީ އެ ބޭފުޅުން ދައްކަވާ ވާހަކަތަކުގެ މައްޗަށް،" އޭނާ ވިދާޅުވި އެވެ.
ނާޒިމް ވިދާޅުވީ އިގްތިސާދީ ހަގީގަތާ ކުރިމަތިނުލާ ނަމަ ކުރިއަށް އޮންނާނީ ބަނަ ދުވަސްތަކެއް ކަމަށެވެ.
"ހަމަ ރަށްރަށުގެ ރައްޔިތުންނަށް އެބަ އެނގެންޖެހޭ ޕްރޮޖެކްޓުތައް ހިނގާނެތޯ ނުވަތަ ނޫންތޯ ވެސް، އިނގޭތޯ؟ އިންތިހާބުގެ މޫސުން ވެސް މިހާރު މިއޮތީ ނިމިފައި އެހެންވީމާ އަޅުގަނޑު ދެންނެވީ އަޅުގަނޑުމެން ހިނގާށޭ ހަމަ ރައްޔިތުން ކައިރީގައި ވެސް ބުނަމާ ހަގީގަތާ ކުރިމަތިލާށޭ، ރިއާލިޓީއާ ކޮންފްރަންޓު ކުރަން ދަސްކުރަންވިއްޔޭ ހަމަ މިހާރު، އެހެންނޫނިއްޔާ އަޅުގަނޑުމެންނަށް އޮތީ ބަނަ ދުވަސްތަކެކޭ،" ނާޒިމް ވިދާޅުވި އެވެ.
ރާއްޖޭގެ އިގުތިސާދަށް ކުރިމަތިވެފައި އޮތް ބަނަކަން ރައްޔިތުންނަށް ތަސައްވުރު ކުރެވޭނީ ފިނޭންސް މިނިސްޓްރީން އެ މަންޒަރު ރަނގަޅަށް ސިފަކޮށްދީގެން ކަމަށް ނާޒިމް ވިދާޅުވި އެވެ. އަދި އަސްލު މަންޒަރު ސިފަކޮށްދިނުމަކީ ރައްޔިތުންގެ ހައްގުގައި ވެސް އަދި ގައުމުގެ ހައްގުގައި ވެސް ކުރަންޖެހޭ ކަމެއް ކަމަށް ނާޒިމް ވިދާޅުވި އެވެ.
"އަޅުގަނޑުމެން މި ކޮމެޓީގައި އިސްކުރަން ޖެހޭނީ އަޅުގަނޑުމެންގެ ޕާޓީގެ މަސްލަހަތެއް ވެސް ނޫން، އަމިއްލަ މަސްލަހަތެއް ވެސް ނޫން، ގައުމުގެ މާލިއްޔަތުގެ މަސްލަހަތު އިނގޭތޯ،" ނާޒިމް ވިދާޅުވި އެވެ.
"ބުލްޝިޓް ނުކުރޭ، ހިތިބޭސް ސިޓީއެއް އޮތިއްޔާ ބުނޭ!"
ރާއްޖޭގެ އިގުތިސާދަށް ކުރިމަތިވެފައިވާ ހީނަރުކަމުން އަރައިގަތުމަށް އަވައްޓެރި ސްރީލަންކާއަށް ވީގޮތް ހަނދާން ކުރަންޖެހޭ ކަމަށް ނާޒިމް ވިދާޅުވި އެވެ. އެގޮތުން ސްރީލަންކާ ބަނގުރޫޓުވެ އެ ގައުމުގެ އިގިތުސާދު އެއްކޮށް ފުނޑުފުނޑުވެ ދިޔައިރު ވެސް ހަމަ "އެބުނާ އެންމެ ގާތް ގައުމުތައް ވެސް ތިބި" ކަމަށް ނާޒިމް ވިދާޅުވި އެވެ.
ނަމަވެސް އެގައުމުތަކުން ވެސް ސްރީލަންކާއަށް އެހީތެރި ނުވީ އިގުތިސާދުގެ އަސާސީ ކަންކަން ރަނގަޅު ނުވުމުންކަން ނާޒިމް ފާހަގަކުރެއްވި އެވެ.
"އިގުތިސާދެއްގެ އަސާސީ ކަންތައްތައް ރަނގަޅު ނޫން ކަމަށް ވަންޏާ އެމީހުން ވެސް ބުނަނީ އެއީ ހަމަ ރާބޯ މީހަކަށް ލާރި ދިނުން ކަހަލަ ކަމެކޭ، ހަމަ ލާޜިކޮޅު ދޭއިރަށް ގޮސް ބޯލާނެޔޭ އަނެއްދުވަހު ވެސް ލާރި ބަލައި، އެހެންނޫންތޯ؟،" އޭނާ ވިދާޅުވި އެވެ.
އިތުރު މިސާލެއްގެ ގޮތުގައި ނާޒިމް ވިދާޅުވީ ޕާކިސްތާނަށް ކުރިމަތިވެފައިވާ އިގުތިސާދީ ހީނަރުކަމުން އަރައިގަންނަން ވެސް ސައުދީއަރަބިއްޔާ ފަދަ ގައުމުތަކުން މާލީ އެހީ ނުދިނީ ހަމަ އެ ސަބަބާ ހެދި ކަމަށެވެ. ބަދަލުގައި ސައުދީ ފަދަ ގައުމުތަކުން އެދުނީ އައިއެމްއެފް ނުވަތަ ވޯލްޑުބޭންކުން ގަބޫލު ކުރާ އިގުތިސާދީ އަސާސުތަކަށް ޕާކިސްތާނުގެ އިގުތިސާދު ފެއްތުމަށް ކަމަށެވެ.
"އެގޮތުން ޕާކިސްތާނުގެ މައި މަރުކަޒީ ބޭންކުގައި މިހާރު ވެސް ސައުދީން ތިން ބިލިއަން ޑޮލަރު ޑިޕޮސިޓުގެ ގޮތުގައި ބަހައްޓައި ދީފައި ހުރީ ވޯލްޑު ބޭންކާއި އައިއެމްއެފުން "ބޯން ބުނި ހިތިބޭސް ބޯން އެއްބަސްވީމަ،" ނާޒިމް ވިދާޅުވި އެވެ.
"އެހެންވީމަ އަޅުގަނޑުމެން ވެސް ހިތިބޭސް، ބޭސް ސިޓީއެއް އޮތިއްޔާ އެވެސް އެނގެންވިއްޔޭ އަޅުގަނޑުމެންނަށް، އަޅުގަނޑުމެން ކޮށްދޭންވީ ކޮންކަމެއްތޯ، އޭގެ ބަދަލުގައި މިހެން ދަމުންދަމުން ގޮސް ބަނގުރޫޓު ވީމަކާ ކަމަކު ނުދާނެޔޭ،" ނާޒިމް ވިދާޅުވި އެވެ.
އިގުތިސާދީ ކަންކަން އޮތްނެތް ގޮތް ބަލާއިރު، ގައުމު ބަނގުރޫޓުވާ ފަދަ ހާލަތެއްގައި އޮތް ނަމަ ޓެކްސް ބޮޑު ކުރުން ކަމަށް ވިޔަސް ނުވަތަ އެހެން ފިޔަވަޅެއް ވެސް އެޅޭނީ ސަރުކާރުން ހާލަތު ބަޔާން ކޮށްދީގެން ކަމަށް ނާޒިމް ވިދާޅުވި އެވެ. އެހެންކަމުން އަންނަ އަހަރުގެ ބަޖެޓޫ ފާސްކުރަން، މިއަހަރުގެ ފަހުކޮޅާ ހަމައަށް އިގުތިސާދުގެ ވާހަކަ ނުދައްކައި ތިބުން ރަނގަޅު ނޫން ކަމަށް އޭނާ ވިދާޅުވި އެވެ.
"އެހެންވީމަ ބަޖެޓާ ހަމައަށް ވެސް ނޮވެމްބަރު މަހާ ހަމައަށް ވެސް މަޑުނުކޮށް މިހާރުން މިހާރަށް ކުރަންވީ ކަމަކީ ވެސް ކޮބައިތޯ، ކޮށްދޭންވީ ކަމަކީ ވެސް ކޮބައިތޯ ބަލަންވީ، ބަލާފައި އިނގިރޭސި ބަހުން ބުނާކަމަށް ވަންޏާ ހަމަ ހާޑް ޓޯކް އަޅުގަނޑުމެން ކުރަންވިއްޔޭ ފިނޭންސް މިނިސްޓަރީއާ، ބުލްޝިޓް ނުކުރާށޭ ވާންވީ ގޮތް ބުނާށޭ ތެދަށް ބުނާށޭ،" ނާޒިމް ވިދާޅުވި އެވެ.
