އައްޑޫ ސިޓީގެ ކޯއްޓޭ ސަރަހައްދު ބީޗަށް ތިލަވެފައި އޮތް "މެލޮން ހެޑެޑް ވޭލް" އެއް އައްޑޫ ނޭޗާ ޕާކުން އިއްޔެ ސަލާމަތްކޮށްފި އެވެ.
އައްޑޫ ނޭޗާ ޕާކުގެ ޕާކް ރޭންޖާ އިއުޖާޒް އަލީ "އަދަދު" ނޫހާ ވާހަކަ ދައްކަމުން ބުނީ މި ކޯމަސް ގޮނޑުދޮށަށް ތިލަވެފައި އޮތް ކަމުގެ މައުލޫމާތު ލިބުނީ އިއްޔެ އިރުއޮއްސި 18:04 ހާއިރު އެތަނަށް ގޮސް އުޅުނު މީހެއްގެ ފަރާތުން ކަމަށާއި، އެއާއެކު ނޭޗާ ޕާކުގެ މުވައްޒަފުން ސީންއަށް 18:20 ހާއިރު ދިޔަ ކަމަށެވެ.
އެގޮތުން, އެތަނަށް ގޮސް ވަގުތުން ކޯމަސް މަރުވިޔަނުދިނުމަށް އެހީތެރިކަން ފޯރުކޮށްދިނުމުގެ ގޮތުން އޭގެ މައްޗަށް ފެން އަޅައި ތެތްކޮށް ބާއްވަން މަސައްކަތްކުރި ކަމަށް އިއުޖާޒް ކިޔައިދިނެވެ.
"އަޅުގަނޑުމެން އެތަނަށް ދިޔައިރު ދެ ކޯމަސް އޮތް. އެކަތި އޮތީ ބީޗަށް ލައްގާފައި އަަނެކަތި އޮތީ މޫދުގައި. ލައްގާފައި އޮތް އެތި މޫދަށް ނުގެންދެވުނު އުފުއްލާފައި. އޭތި އޮތީ ވެސް ވަރަށް ބަލިވެފައި. ދިޔަވަރު ކުޑަވެފައި އޮތް ގަޑިއެއް ވީމަ އުނދަގޫތައް ދިމާވި. އެހެންވެ ދިޔަވަރު ބޮޑުވަންދެން ވެޓް ޓަވަލްސްއާއި ސޯލްޓު ބަކެޓު ބޭނުންކޮށްގެން ޑޯލްފިން އަޕްރައިޓުކޮށްލާފައި މަސައްކަތްކުރީ އޭތި މޮއިސްޓުކޮށް ބާއްވަން،" އިއުޖާް ބުންޏެވެ.
ކޯމަސް މޫދަށް ދޫކޮށްލީ ދިޔަވަރު ބޮޑުވެ ރާޅު ބިންދަން ފެށުމުން 7:15 ހާއިރު ކަމަށާއި، އެއަށްފަހު އަނބުރާ ލެއްގުމުން އެގަޑީގައި ފަސް ވަރަކަށް ފަހަރު އަނބުރާ އައުމުން ފޮނުވާލި ކަމަށް އިއުޖާޒް ބުންޏެވެ. އަދި ފަހުން އޭތި ލެއްގި ކަމުގެ މައުލޫމާތު ނުލިބޭ ކަމަށް ވެސް އޭނާ ވިދާޅުވި އެވެ.
އިއުޖާޒް ބުނީ ކޯމަސް ބީޗަށް ތިލަވީ ކޮންމެވެސް އަނިޔާއެއް ވެގެން ކަމަށް ލަފާކުރެވޭ ކަމަށާއި، އޭތި ލެއްގިއިރު ޒަހަމްތަކެއް ފެންނަން ހުރި ކަމަށެވެ. އަދި އެއީ ލެއްގި ވަގުތު ލިބުނު ޒަހަމްތަކެއްކަން ކަށަވަރު ނުވާ ކަމަށް އޭނާ ވިދާޅުވި އެވެ.
"މި ކޯމަހަކީ އާންމުކޮށް ދެކުނުން ފެންނަ ކޯމަހެއް. ހާއްސަކޮށް އައްޑޫ ފުވައްމުލަކުން ފެންނާނެ،" އިއުޖާޒް ބުންޏެވެ.
އައްޑޫ ނޭޗާ ޕާކުގެ ހަތަރު މުވައްޒަފުން ވެގެން ކުރި މި މަސައްކަތަށް ގިނަ ބަޔަކު އަންނަނީ ސޯޝަލް މީޑިއާގައި ތައުރީފް ކުރަމުންނެވެ.
