މީގެ 29 އަހަރު ކުރިން ބޮސްނިއާ ދަރިކޮޅުގެ އެތައް ހާސް މުސްލިމުން މަރައި ހިންގި ގަތުލުއާއްމުގެ ހަނދާން އައުކޮށް އެ ދުވަސް ފާހަގަ ކުރުމަށް އދ. އަށް ހުށަހެޅި ގަރާރު ފާސްކުރަން މިދިޔަ ހުކުރު ދުވަހު ނެގި ވޯޓުގައި ބައިވެރިވެ އެއްވެސް ކޮޅަކަށް ރާއްޖެއިން ވޯޓު ނުދިން މައްސަލައިގައި ރަސްމީ ޖަވާބެއް އަރުވާނީ އިތުރަށް ބަލާލައިފައި ކަމަށް ސަރުކާރުގެ ތަރުޖަމާނު، ހީނާ ވަލީދު ވިދާޅުވެއްޖެ އެވެ.
ރައީސް އޮފީހުގައި މިއަދު ކުރިއަށް ގެންދިޔަ ނޫސްވެރިންގެ ބައްދަލުވުމެއްގައި "އަދަދު" ނޫހުން ކުރި ސުވާލަކަށް ޖަވާބުދެއްވަމުން ހީނާ ވިދާޅުވީ ބޮސްނިއާގައި ހިންގީ ގަތުލުއާއްމެއް ކަމަށް ގަބޫލު ކުރައްވާ ކަމަށާއި އެކަން ހަރުކަށި އިބާރާތުން ކުށްވެރި ކުރައްވާ ކަމަށެވެ.
އެހެން ނަމަވެސް ވޯޓާ ގުޅޭގޮތުން ކުރި ސުވާލުގެ ޖަވާބުގައި ވިދާޅުވީ "އަޅުގަނޑު އިތުރަށް ބަލާލައިފައި އެއަށް ޖަވާބެއް ދޭނަން،" ކަމަށެވެ.
ހީނާ ވިދާޅުވީ ބޮސްނިއާގެ ގަތުލުއާއްމާ ގުޅިގެން ރާއްޖެއިން މިހާރު ވެސް އަދި ކުރިއަށް އޮތް ތަނުގައި ވެސް މަސައްކަތް ކުރާނީ އެގައުމުގެ މުސްލިމުންގެ ދިފާއުގައި ކަމަށާއި ބޮސްނިއާގެ މުސްލިމުންނަށް އުފާވެރި، ރައްކާތެރި ދިރިއުޅުމެއް ހޯދައިދެވޭނެ ފަދަ ގޮތަކަށް މަސައްކަތް އަބަދުވެސް ކުރައްވާނެ ކަމަށް އޭނާ ވިދާޅުވި އެވެ.
ހީނާ އެހެން ވިދާޅުވި ނަމަވެސް ބޮސްނިއާއާ އެއްކޮޅަށް ރާއްޖެއިން ވޯޓު ނުދިން މައްސަލައިގައި ސަރުކާރަށް ވަނީ ވަރަށް ބޮޑަށް ފާޑުކިޔުން އަމާޒުވެފަ އެވެ.
ބޮސްނިއާ ގަރާރާ އެއްކޮޅަށް ރާއްޖެއިން ވޯޓު ނުދިން ނަމަވެސް އިސްލާމީ ބޮޑެތި ހުރިހާ ގައުމުތަކަކުން އެ ގަރާރާ އެއްކޮޅަށް ވޯޓު ދިނެވެ. އޭގެތެރޭގައި މުސްލިމުންގެ އާބާދީ ބޮޑު އިންޑަނޭޝިޔާއާއި ސައޫދީއަރަބިއްޔާއާއި ތުރުކީ އަދި އިރާގާއި އިރާނު ފަދަ ގައުމުތައް ހިމެނެ އެވެ.
ބޮސްނިއާ ގަތުލުއާއްމު ހިންގާފައި ވަނީ 1992 ވަނަ އަހަރު ފެށުނު ބޮސްނިއާ ހަނގުރާމައިގެ ތިންވަނައަށް ވީ އަހަރު، ޖުލައި 11، 1995 ގައި ބޮސްނިއާގެ ސްރޭބްރޭނީޓްސްއާގަ އެވެ. އެ ގަތުލުއާއްމުގައި 8،372 މުސްލިމުން މަރައިލި އެވެ. އެކަން ކުރީ ބޮސްނިއާ ސާބްސްއަށް ނިސްބަތްވާ މިލިޓަރީ ގުރޫޕަކުންނެވެ.
އެއީ ގަތުލުއާއްމެއް ކަމަށް އިންޓަނޭޝަނަލް ކޯޓު އޮފް ޖަސްޓިސް އިން އޮތީ ބަލައިގަނެފަ އެވެ.
