ރާއްޖެއިން އާންމުކޮށް ނަގައި އެކްސްޕޯޓު ކުރާ ހުއިފިލަނޑާގެ ދެ ބާވަތެއް ބޭރަށް އެކްސްޕޯޓު ކުރުން ފިޝަރީޒް މިނިސްޓަރީން މަނާކޮށްފި އެވެ.
އެ މިނިސްޓަރީން މިއަދު ކުރިއަށް ގެންދިޔަ ނޫސްވެރިންގަ ބައްދަލުވުމެއްގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން ފިޝަރީސް މިނިސްޓަރު، އަހުމަދު ޝިޔާމު ވިދާޅުވީ މި މަހުން ފެށިގެން ބޭރުކުރުން މަނާކޮށްފައި ވަނީ އާންމުކޮށް ރާއްޖެއިން ނަގާ، ކައްޗަލަ އާއި އަލަނާސި ކަމަށެވެ.
އެ ދެ ބާވަތް ބޭރު ކުރުން މަނާކޮށްފައި ވަނީ ކޮންވެންޝަން އޮފް އިންޓަނޭޝަނަލް ޓްރޭޑް އިން އެންޑޭންޖާޑް ސްޕީޝީޒް (ސައިޓީސް) މުއާހަދާއަށް ކައްޗަލަ އާއި އަލަނާސި އިތުރު ކުރުމުން ކަމަށެވެ.
ސައިޓީސް މުއާހަދާގައި ހިމަނަނީ އެކި ބޭނުންތަކަށް ނަގައި ވިޔަފާރީގެ ގޮތުގައި ބޭރު ކުރާ ދިރޭ ތަކެތީގެ ތެރެއިން ނެތިގެން ހިނގައިދާނެ ފަދަ ދިރޭ ތަކެއްޗެވެ. އެ މުއާހަދާގައި ދިރޭ އެއްޗެއް ހިމަނައިފި ނަމަ، އެ އެއްޗެއް ބާނައި، ނުވަތަ ހިފައި ނުވަތަ ނަގައި ވިޔަފާރީގެ ގޮތުގައި ބޭނުން ކުރެވޭނީ އެކަން ކުރަނީ ދެމެހެއްޓެނިވި ގޮތެއްގައިކަން ކަށަވަރު ކުރުމަށްފަހެވެ.
ޝިޔާމް ވިދާޅުވީ މީގެ ކުރިން ރާއްޖެއިން ހުއިފިލަނޑާ ބޭރުކޮށްފައި ވަނީ ބޭރުކުރާ ވަކި ބާވަތްތަކެއް ވަކިން އެނގޭނެހެން ނޫން ކަމަށާއި އެކްސްޕޯޓު ކުރުން މަނާކުރަން ޖެހުނީ އެ ސަބަބާ ހުރެ ކަމަށެވެ. އަދި އެ ނިންމުމަކީ ވަގުތީ ނިންމުމެއް ކަމަށް ވެސް އޭނާ ވިދާޅުވި އެވެ.
"މި ބާވަތްތައް މިހައިތަނަށް ބޭރު ކުރެވުނުއިރުގައި އަޅުގަނޑަށް މައުލޫމާތު ލިބިފައިވާގޮތުން އެންމެ އަހަރެއްގެ ޑޭޓާ މިހުރީ ސްޕީޝީޒް ވަކިން އެނގޭ ގޮތަށް ބޭރު ކުރެވިފައި، ދެން މި ޑޭޓާ ޝެއާ ކޮށްގެން ނޫނީ މިކަހަލަ ކަންތައްތަކުގައި އަޅުގަނޑުމެންނަށް އެޖެއް ނުނެގޭނެ ކަންތައްތައް މި ހުންނަނީ، ވާހަކައަކީ އަޅުގަނޑުމެންނަށް ކުރިއެރުމެއް ނުލިބޭނެ ކަންތައްތައް މިހުންނނީ ރަނގަޅު ޑޭޓާ ލިބިގެން ނޫނީ،" ޝިޔާމް ވިދާޅުވި އެވެ.
މީގެ ކުރިން 2020 ވަނަ އަހަރު ވެސް ސައިޓީސް މުއާހަދާގައި އަލަށް ހިމެނި ހުއިފިލަނޑާގެ ދެ ބާވަތެއް ރާއްޖެއިން ބޭރު ކުރުން މަނާކުރި އެވެ. ނަމަވެސް ފަހުން އެ ދެ ބާވަތުގެ ހުއިފިލަނޑާ ބޭރު ކުރުމަށް ވަކި ހުއްދަތަކެއް އޭރުގެ ފިޝަރީޒް މިނިސްޓަރީން ދޫކުރި އެވެ. އެފަހަރު ބޭރު ކުރުން މަނާކުރީ ކަޅު ބަޓާއި ހުދު ބަޓެވެ.
ހުއިފިލަނޑާގެ މަސްވެރިކަން ދިވެހިރާއްޖެއަށް ތައާރަފުވެގެން އާމްދަނީ ހޯދުމަށް މަސައްކަތެއްގެ ގޮތުގައި ކުރަން ފެށީ 1980 ގެ ކުރީކޮޅެވެ. ރާއްޖޭގައި ހުއިފިލަނޑާގެ 27 ބާވަތެއް އުޅޭކަމަށް ރިކޯޑު ކުރެވިފައިވާއިރު، އޭގެތެރެއިން ވިޔަފާރި ބޭނުމަށް ނަގައި އުޅެނީ އާންމުކޮށް 15 ބާވަތެކެވެ.
ހުއިފިލަނޑާގެ މަސްވެރިކަމަކީ ރަނގަޅު އާމްދަނީއެއް ލިބޭ މަސައްކަތެއް ނަމަވެސް އެކަން ކުރާ މީހުންގެ އަދަދު އިންތިހާއަށް މިހާރު ވަނީ މަދުވެފަ އެވެ. ސަބަބަކަށް ވަނީ މި މަސައްކަތް ކޮށް އުޅެނީ އެންމެ ރައްކާތެރިކޮށް ނޫން ކަމުގައި ވާތީ އެވެ.
ހުއިފިލަނޑާގެ މަދު ބާވަތެއް ނޫނީ ހުރިހާ ބާވަތެއްގެ ލަނޑާ ވެސް ނަގައި އުޅެނީ ފުޅި އަޅައިގެން ފީނައިގެންނެވެ. ނަމަވެސް މިހާރު ރާއްޖޭގެ ބައެއް ސަރަހައްދުތަކުގައި ހުއިފިލަނޑާ އާލާކޮށްގެން ވެސް އޭގެ މަންފާ ހޯދަމުންދެ އެވެ.
ދެ ބާވަތް ބޭރު ކުރުން މަނާކޮށްފައި ވަނީ ވަގުތީ ގޮތުން ކަމަށް ވެސް ޝިޔާމް ވިދާޅުވި އެވެ.
