މިއަދު ރާއްޖެ އައުމުން, އެތެރެނުކޮށް އަނބުރާ ފޮނުވާލީ ރާއްޖެ އެތެރެވުމުގެ ހުއްދަ ނެތް މީހެއް ކަމަށް މޯލްދިވްސް އިމިގްރޭޝަނުން ބުނެފި އެވެ.
އިމިގްރޭޝަނުން ބުނީ އޭނާއަކީ އިމިގްރޭޝަންގެ ގާނޫނުގެ އަށް ވަނަ މާއްދާގެ ދަށުން ރާއްޖެ އެތެރެވުމުގެ ހުއްދަނެތް މީހެއް ކަމަށެވެ. އަދި އޭނާ ފޮނުވާލީ ވަކި މުއްދަތަކަށް ރާއްޖެ ނާދެވޭ ގޮތަށް ކަމަށް ވެސް އިމިގްރޭޝަނުން ބުނެ އެވެ.
މިއަދު ރާއްޖެ އައި ސްރީލަންކާގެ ރައްޔިތެއް ކަމަށްވާ ނަދީޝް ޕެރޭރާ ރާއްޖެ އެތެރެވިޔަނުދީ ހިފެހެއްޓި ކަމަށް ބުނެ އިންޓަނޭޝަނަލް ހިއުމަން ރައިޓްސް އެކްޓިވިސްޓް މުހީދް ޖީރާން ވަނީ ޕޯސްޓް ކޮށްފަ އެވެ. މި ނޫހާ ވާހަކަ ދައްކަމުން މުހީދް ތުހުމަތު ކުރި ގޮތުގައި ނަދީޝް އެއާޕޯޓުގައި ހިފެހެއްޓި ސަބަބެއް އިމިގްރޭޝަނުން ހާމަ ނުކުރާއިރު, އޭނާއަށް އެހީތެރިވެދޭން އޭނާގެ ވަކީލުންނާއި, ލަންކާ ހައިކޮމިޝަނަށް ވެސް ފުރުސަތު ނުދެ އެވެ.
އަދި ރާއްޖެ އެތެރެވިޔަނުދީ ހިފެހެއްޓި ނަދީޝްއަކީ, ސްރީލަންކާއަށް ނިސްބަތްވީ ނަމަވެސް ރާއްޖޭގެ އަންހެނަކާ އިނދެ, ރާއްޖޭގައި އާއިލާއެއް ހުރި މީހެއް ކަމަށް ވެސް އޭނާ ބުނެ އެވެ.
މި މައްސަލަ ހޫނުވެފައިވާ ވަނިކޮށް އިމިގްރޭޝަނުގެ ކޮންޓްރޯލާ ޖެނެރަލް މުހައްމަދު ޝަމްއާން ވަހީދު އެކްސްގައި ކުރެއްވި ޕޯސްޓެއްގައި ވިދާޅުވީ ރާއްޖެ އެތެރެވެވޭނެ އަދި އެތެރެވުމުގެ ހުއްދަ ނުދެވޭނެ ހާލަތްތައް އިމިގްރޭޝަން ގާނޫނުގައި ސާފުކޮށް ލިޔެފައިވާ ކަމަށާއި, އެ ގާނޫނަށް އަމަަލުކުރާނީ އެއްވެސް މީހަކު ތަފާތު ކުރުމެއް ނެތި ކަމަށެވެ.
އިމިގްރޭޝާން ގާނޫނުގެ އަށް ވަނަ މާއްދާގައިވާ ގޮތުން ރާއްޖެ އެތެރެވުމުގެ ހުއްދަ ނުދެވޭ ގިނަ ކަންތައްތަކެއް ފާހަގަކޮށްފައި ހުރިއިރު, މިއަދު ފޮނުވާލި މީހާއަށް ރާއްޖެ އެތެރެވުމުގެ ހުއްދަ ނެތީ ކީއްވެކަން އެ އިދާރާއިން ހާމަ ނުކުރެ އެވެ.
އެ ގާނޫނު ގެ 33 ވަނަ މާއްދާގެ ދަށުން ވަކި މުއްދަތަކަށް އޭނާއަށް ރާއްޖެ ނާދެވޭ ގޮތަށް ފޮނުވާލިއިރު, އެ މާއްދާގައި ބަޔަންކުރަނީ އިމިގްރޭޝަން ގާނޫނާއި ހިލާފުވެގެން ދޭ އަދަބުތަކެވެ. އެގޮތުން ބިދޭސީއެއް ނަމަ 15000 ރުފިޔާ އާއި 50000 ރުފިޔާއާ ދެމެދުގެ އަދަދަކުން ޖޫރިމަނާކޮށް, ވަކި މުއްދަތަކަށް ރާއްޖެ ނާދެވޭ ގޮތަށް ފޮނުވާލެވޭނެ ކަމަށް ބަޔާންކޮށްފައިވެ އެވެ.
