މިހާރު ކުރިއަށްދާ 66 ވަނަ މެލޭޝިއާ އޯޕަން ސްވިމިން ޗެމްޕިއަންޝިޕްގައި ވާދަކުރާ ގައުމީ ސްވިމިން ޓީމުގެ މުހައްމަދު ރިހާން ޝިހާމް އާއި މުހައްމަދު އާން ހުސެއިން ގައުމީ ރެކޯޑެއް އާ ކޮށްފި އެވެ.
އެ ގޮތުން، ފިރިހެނުންގެ ލޯންގް ކޯސް 1500 މީޓަރު ފްރީސްޓައިލް އިވެންޓުގެ ގައުމީ ރެކޯޑް، ރިޙާން އާކުރީ 18.03.57 އިން ރޭސް ފުރިހަމަ ކޮށްގެންނެވެ. މިއީ ވޭތުވެދިޔަ ހަ އަހަރު ދުވަހު މުގުރާނުލެވި އޮތް ރެކޯޑެކެވެ.
މި އިވެންޓުގެ ޤައުމީ ރެކޯޑު އެންމެފަހުން އާކޮށްފައިވަނީ 2018 ވަނަ އަހަރު ބޭއްވުނު 18 ވަނަ އޭޝިއަން ގޭމްސްގަ އެވެ. އެ ފަހަރުގެ ގޭމްސްގައި ވާދަކުރި މުބާލް އައްޒާމް އިބްރާހިމް ރެކޯޑް ހެދީ، 19.26.54 އިން ރޭސް ފުރިހަމަ ކޮށްގެންނެވެ.
އާން، ފިރިހެނުންގެ ލޯންގް ކޯސް 100 މީޓަރު ފްރީސްޓައިލް އިވެންޓުގެ ގައުމީ ރެކޯޑް އާ ކުރިއިރު، އެންމެ ފަހުން ވެސް މި ރެކޯޑް ހެދީ އާން އެވެ. އާން މި ފަހަރު ރެކޯޑް ހެދީ، 00.54.46 އިން ރޭސް ފުރިހަމަ ކޮށްގެންނެވެ.
މި އިވެންޓުން އާން ވަނީ ފައިނަލް ސީ އަށް ވެސް ދަތުރުކޮށްފަ އެވެ.
މި އިވެންޓްގެ ގައުމީ ރެކޯޑް އެންމެ ފަހުން އާން ހެދީ، މި އަހަރު ކުރީކޮޅު ބޭއްވި 11 ވަނަ އޭޝިއަން އޭޖް ގްރޫޕް ޗެމްޕިއަންޝިޕްގަ އެވެ. އެ ފަހަރު އާންގެ ޓައިމިން އަކީ 00.55.11 އެވެ.
