މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ) ގެ މެނޭޖިން ޑިރެކްޓަރުކަމުން ފާތިމަތު ތައުފީގު (ކުޑީ) ވަކިކޮށްފި އެވެ.
ސަރުކާރުގެ އޮފިޝަލަކު ވަނީ "އަދަދު" ނޫހަށް އެކަން ކަށަވަރު ކޮށްދެއްވާފަ އެވެ. އެމްއެމްޕީއާރުސީގައި ބޮޑު ހައިޖާނެއް އުފެދި އެ ކޯޕަރޭޝަނުގެ ޗެއާޕާސަން އަައިޝާ ނޫރައިން ނަޖާހު މަގާމުން އިސްތިއުފާ ދެއްވީ ރޭގެ ވަގުތެއްގަ އެވެ.
އޭގެ ފަހުން އެ ކޯޕަރޭޝަންގެ ބޯޑު މެމްބަރު ރާފިލް މުހައްމަދު ވެސް ވަނީ މަގާމުން އިސްތިއުފާދެއްވައިފަ އެވެ.
އެމްއެމްޕީއާރުސީގެ އެމްޑީގެ މަގާމުން ކުޑީ މިއަދު ވަކިކުރި އިރު ފާއިތުވި ފަސް މަހުގެ ތެރޭގައި އެމްއެމްޕީއާރުސީ ފެނުނީ "ކޮންޓްރޮވާސީ" ގައި ގެތިފައި އޮތް ތަނެއްގެ ގޮތުގަ އެވެ. ރާއްޖޭގެ އެންމެ ބޮޑު އެއް ސޯސް މާކެޓު ކަމަށްވާ އިންޑިއާ ދެކޮޅަށް ކުޑީ ޓްވީޓު ކުރުމާއި މުވައްޒަފަކަށް ޖިންސީ ފުރައްސާރަ ކުރި މައްސަލައެއް ވެސް ފެންމަތިވި އެވެ.
އިތުރުވަމުންދާ ފަތުރުވެރިކަމުގެ ސަޕްލައިއާ އެއްވަރަށް ޑިމާންޑު ހޯދުމަށް ރާއްޖެ އިސްތިހާރު ނުކުރެވޭ ކަމަށް މަޓާޓޯގެ ކަންބޮޑުވުން ވެސް ހިމެނޭހެންނެވެ.
އިއްޔެ ޗެއާޕާސަންކަމުން އިސްތިއުފާ ދެއްވަން ނޫރައިން ފޮނުއްވި ސިޓީން އެނގޭ ގޮތުގައި އޭނާ އިސްތިއުފާދެއްވީ އެ ކުންފުނިގެ ހިންގުން ބޮއްސުންލައި, "ބޯޑުގެ ޒިންމާތައް ޕްރޮފެޝަނަލިޒަމް އާއި ކޯޕަރޭޓް ގަވާނަންސް ޕްރިންސިޕަލްސް އާ އެއްގޮތަށް ނަޒާހަތްތެރިކަމާއެކު" އަދާކުރަން ހުރަސްތައް ކުރިމަތިވުމުންނެވެ.
