މަރާމާތަށް ބަންދުކުރިތާ ގިނަ ދުވަސްތަކެއް ވެފައިވާ މާލޭ އާ ސަހަރާގެ ފިނިޝިން މަސައްކަތް ކުރުމަށް 2.7 މިލިއަން ރުފިޔާއަށް ހައިމަން ކޮންސްޓްރަކްޝަންއާ މިއަދު ހަވާލުކޮށްފި އެވެ.
ސިޓީ ކައުންސިލުގައި ބޭއްވި ރަސްމިއްޔާތެއްގައި އެއްބަސްވުމުގައި ހައިމަން ކޮންސްޓްރަކްޝަންގެ ފަރާތުން ސޮއިކުރެއްވީ އެ ކުންފުނީގެ ޑިރެކްޓާ މުހައްމަދު އައިމަން އެވެ. އަދި ސިޓީ ކައުންސިލުގެ ފަރާތުން ސޮއިކުރެއްވީ ސެކެޓްރީ ޖެނެރަލް ވަޖީހު ނަސީރު އެވެ.
އާސަހަރާގެ ފިނިޝިން މަސައްކަތް ކުރުމަށް ހައިމަން ކޮންސްޓްރަކްޝަންއާ ހަވާލުކުރީ 60 ދުވަހުގެ ތެރޭގައި ނިންމާ ގޮތަށް 2.7 މިލިއަން ރުފިޔާއަށެވެ. މިއީ ހުސްވި އަހަރުގެ ތެރޭގައި ކުރި އިއުލާނެއްގެ ދަށުން އެ ކުންފުންޏާ ހަވާލުުކުރި މަސައްކަތެކެވެ.
އާސަހަރާ މިސްކިތުގެ މަރާމާތަށް އެ ސަރަހައްދު ބަންދުކޮށް މަސައްކަތް ފެށީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މޭޔަރުކަމުގައި މެއި، 2023 ގަ އެވެ. އެއިރު ކައުންސިލުން ބުނި ގޮތުގައި ދެ މަސް ފަހުން މަރާމާތުގެ މަސައްކަތް ނިމި، އާ އިމާރާތާއެކީ މިސްކިތް ބޭނުންކުރެވެން ފެށޭނެ ކަމަށެވެ.
ނަމަވެސް، ނިންމަން ދިން ތާރީހުގެ ފަހުން ދިހަ މަސް ވެގެންދާއިރު އެ ސަރަހައްދުގައި ހުރި އިމާރާތްތައް ތަޅާލުމުގެ މަސައްކަތާއި ކޮންކްރީޓު ތަނބުތަކެއް ޖެހުމުގެ އިތުރަށް އެއްވެސް މަސައްކަތެއް ނުނިމެ އެވެ. އަދި މިހާރު ވެސް އާސަހަރާ މިސްކިތަށް ފެންވަންނާތީ، ނަމާދުކުރަން ދަތިވާކަމަށް އާންމުން ޝަކުވާކުރެ އެވެ.
މި މަޝްރޫއަށް ކައުންސިލުން ފާސްކުރި ބަޖެޓަކީ 4.9 މިލިއަން ރުފިޔާ އެވެ. މަޝްރޫއާ ފުރަތަމަ ހަވާލުވި ކޮންޓްރެކްޓަރަށް 3.9 ދީފައިވާއިރު، މަސައްކަތް ނުނިމެނީސް ކޮންޓްރެކްޓް ވަނީ ބާތިލުކޮށްފަ އެވެ.
