ދައުލަތުގެ ދަރަނި ހިފެހެއްޓުމެއް ނެތި ބޮޑުވާތީއާއި ދުވަހުން ދުވަހަށް ކުރަން ޖެހޭ ހަރަދު ރާއްޖޭގައި ބޮޑުކަމުން، ވޯލްޑް ބޭންކާއި އިންޓަނޭޝަނަލް މަނިޓަރީ ފަންޑް ( އައިއެމްއެފް) އިން އަބަދު ވެސް ރާއްޖެއަށް ނަސޭހަތާ އިރުޝާދު ދެ އެވެ. ހަރަދު ކުޑަކުރަން ޖެހޭ ކަމަށް ބުނެ، ހަރަދު ކުޑަކުރެވިދާނެ ގޮތްތައް ވެސް އެ ދެ އިދާރާއިން ރާއްޖެއާބެހޭ ގޮތުން ނެރޭ ކޮންމެ ރިޕޯޓެއްގައި ކިޔައިދެ އެވެ.
އެ ދެ އިދާރާއިން އެ އިރުޝާދުތައް ދެމުން އަންނީ ރާއްޖެއަށް މާލީ ގޮތުން އެހީތެރިވާ ބައިނަލް އަގުވާމީ މާލީ އިދާރާތަކުގެ ހައިސިއްޔަތުންނެވެ.
އެކަން އެހެން އޮތް އިރު ބައިނަލް އަގުވާމީ މުޖުތަމައުގައި ޗައިނާއަށް ކުރިމަތިވެފައި އޮތް ބަދުނާމަކީ މަދު އާމްދަނީގެ ގައުމުތަކަށް ހައްދެއް ނެތް ވަރަށް ލޯނުތައް ދީ، އެ ލޯނުތަކުގެ ޒަރިއްޔާއިން ނުފޫޒު ފޯރުވާކަމުގެ ތުހުމަތެވެ. އާއްމު ބަހުރުވައިން ބުނާ ނަމަ "ދަރަނި ދަންތުރައިގައި" ގައުމުތައް ޖެއްސުުމުގެ ތުހުމަތެވެ. ޗައިނާއިން އެ ތުހުމަތުތަކަށް އަބަދުވެސް އިންކާރުކުރެ އެވެ.
ޗައިނާގެ ފަރާތުން ރާއްޖޭގައި ހުންނަވާ ސަފީރު ވާންގް ލިޖިން ބުރާސްފަތި ދުވަހު ބޭއްވެވި ނޫސްވެރިންގެ ބައްދަލުވުމުގެ ވެސް އެއް ބޭމަކީ އެފަދަ ތުހުމަތުތަކަށް ރައްދު ދިނުމެވެ.
ރައިސް ޑރ.މުހައްމަދު މުއިއްޒު މަގާމުގެ ހުވާކުރެއްވުމުގެ ކުރިން (އިންތިހާބީ ރައީސްގެ ހައިސިއްޔަތުން) ޗައިނާ ސަފީރު ވާންގް ލިޖިންއާ ބައްދްލުކުރައްވަނީ. ފައިލް ފޮޓޯ/ޕީއެންސީ
ނޫސްވެރިންގެ ބައްދަލުވުމުގައި ސަފީރު ދެއްކެވި ވާހަކައިގައި ދެއްވި އެއް މެސެޖަކީ، "ޗައިނާ ވެސް އޮތީ ރާއްޖެއަށް ހިތުހުރި ވަރަކަށް ދަރަނި ދީފައި، އެ ދަރަނިތައް ދެއްކުން ފަސްކޮށްދޭ ގޮތަށް ނޫންކަމުގެ މެސެޖެވެ. އެއާ އެކު ނޫސްވެރިންގެ ބައްދަލުވުން ނިންމަވައިލެއްވުމުގެ ކުރިން އޭނާ ދެއްވީ ނަސޭހަތެކެވެ. ސަރުކާރާއި ރައްޔިތުން ވެސް ހިމެނޭ ގޮތުން މުޅި ދިވެހި ދައުލަތަށެވެ.
"އެއްކޮޅުން ތިޔަ ބޭފުޅުން ޖެހޭނެ މީހުންގެ ދިރިއުޅުމުގެ ފެންވަރު މަތިކުރަން، އެކަމަކު އަނެއްކޮޅުން ތިޔަ ބޭފުޅުން ދަރަނި ވެސް ކުޅަދާނަަވާ މިންވަރެއްގައި [މަތިވިޔަ ނުދީ] ހިފަހައްޓަން ޖެހޭ، އެއީ އަންނަން އޮތް ޖީލަށް ބޮޑު ބުރައެއް ނުޖެއްސުމަށް ޓަކައި، އެއީ ރަނގަޅު ގޮތެއް ނޫން،" ސަފީރު ވާންގް ވިދާޅުވި އެވެ.
އެ ނަސޭހަތާ އެކު އޭނާ ފާހަގަކުރެއްވީ ރާއްޖެ އާއި ޗައިނާ އަކީ ވެސް އިރުމަތީގެ ގައުމުތައް ކަމާއި އިރުމަތީގެ މީހުންގެ ސަގާފަތަކީ "ސާދާ ދިރިއުޅުމެއް އުޅުން" ކަމެވެ. އޭނާ ސިފަކުރެއްވި ގޮތުގައި "ލަގްޒަރީކޮށް" ދިރިއުޅުމަކީ ހުޅަނގުގެ މީހުންގެ ސަގާފަތެެކެވެ.
"ޗައިނާ އާއި ދިވެހިރާއްޖެއާ ދެ ގައުމަކީ ވެސް އިރުމަތީގެ ގައުމުތައް، އާދެ އަޅުގަނޑުމެންގެ އޮތީ ސާދާ ދިރިއުޅުމެއް އުޅުމުގެ ސަގާފަތެއް. ޗައިނާގައި ޔަގީނުން ވެސް އޮތީ ސާދާ ދިރިއުޅުމެއް އުޅުމުގެ ސަގާފަތް، ހަމަ އެކަނި ހުޅަނގުގެ މީހުން އުޅޭ ފަދަ ލަގްޒަރީ ދިރިއުޅުމެއް ހޯދުމަށް ޓަކައި މާގިނައިން ދަރަނި ނަގާކަށް އަޅުގަނޑުމެން ބޭނުމެއް ނުވޭ،" ސަފީރު ވިދާޅުވި އެވެ.
ދިވެހި ސަރުކާރުން ވެސް އެފަަދަ ގޮތަކަށް ވިސްނުން ގެންގުޅެން ފެންނަ ކަމަށް ވިދާޅުވެ އޭނާ ފާހަގަ ކުރެއްވީ ވޯލްޑްބޭންކާއި އައިއެމްއެފުން ވެސް ރާއްޖެއަށް އެގޮތަށް އިރުޝާދު ދީފައިވާ ކަމެވެ.
