ލަންޑަން (މެއި 17) - ފޯބްސް އިން އަހަރަކު އެއް ފަހަރު ހޮވާ އަހަރުގެ އެންމެ ބޮޑު އާމްދަނީއެއް ލިބުނު އެތުލީޓަކަށް މި ފަހަރު ވެސް ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ހޮވިއްޖެ އެވެ.
މިއީ، ސައުދީ ޕްރޯ ލީގުގެ އަލް ނަސްރަށް މި ވަގުތު ކުޅެމުން އަންނަ ރޮނާލްޑޯ، މި ލިސްޓުގެ ކުރި ހޯދި ހަތަރު ވަނަ ފަހަރެވެ. މިދިޔަ އަހަރު އޭނާ މި ލިސްޓުގެ ކުރިއަށް އެރީ ވެސް އަލް ނަސްރުގެ ކޮންޓްރެކްޓާ އެކުގަ އެވެ. އޭގެ ކުރިން، އޭނާ އެންމެ ފަހުން މި ލިސްޓުގެ ކުރީގައި އޮތީ، 2017 ވަނަ އަހަރު އެވެ.
ރޮނާލްޑޯ، 39، އަށް މިދިޔަ އަހަރު ތެރޭ، 260 މިލިއަން ޑޮލަރު ލިބުނެވެ.
މި ލިސްޓުގެ ދެ ވަނައިގައި އޮތް، ސްޕެއިނުގެ ގޯލްފަރު، ޖޯން ރާމް ވަނީ 218 މިލިއަން ޑޮލަރު ހޯދައިފަ އެވެ. ލިސްޓުގެ ތިނެއްގައި އޮތީ، އިންޓަ މިއާމީއާ ގުޅުނު ލެޖެންޑަރީ ތަރި، ލިއޮނަލް މެސީ އެވެ. މެސީ އަށް ވަނީ 135 މިލިއަން ޑޮލަރު ލިބިފަ އެވެ.
ހަތަރެއްގައި އޮތް ބާސްކެޓް ތަރި، ލެބްރަން ޖޭމްސް އަށް ވަނީ 128.2 މިލިއަން ޑޮލަރު ލިބިފަ އެވެ. އަދި ފަސް ވަނައިގައި އޮތް ބާސްކެޓްގެ ޖިއަނީސް އަންޓެޓޮކޮއުންމްޕޯ އަށް ވަނީ 111 މިލިއަން ޑޮލަރު ލިބިފަ އެވެ.
ގަދަ ދިހައެއްގައި ދެން ހިމެނޭ އެތުލީޓަކީ، ތިން ފުޓްބޯޅަ ތަރިން ކަމަށްވާ، ކީލިއަން އެމްބާޕޭ، ނޭމާ އަދި ކަރިމް ބެންޒެމާގެ އިތުރުން، ބާސްކެޓްބޯޅައިގެ ސްޓެފެން ކަރީ އަދި އެމެރިކަން ފުޓްބޯޅަ ތަރި، ލެމާ ޖެކްސަން އެވެ.
