އޮލިމްޕިކްސްގައި މީގެ ކުރިން ވެސް ދިވެހި ކުޅުންތެރިން ވާދަކުރި އެވެ. އެކަމަކު، އުމުރުން 16 އަހަރުގެ ފާތިމަތު ދީމާ އަލީ، މި އަހަރު ޕެރިހުގައި ބާއްވާ އޮލިމްޕިކްސް އަށް ކޮލިފައިވި ކާމިޔާބު ހާއްސަވާ ސަބަބެއް އެބައޮތެވެ. ދީމާ އަކީ, އޮލިމްޕިކްސްގެ ކޮލިފިކޭޝަނެއް ކުޅެ, އެ މުބާރާތުގެ ޗެމްޕިއަންކަން ހޯދައިގެން އޮލިމްޕިކްސް އަށް ކޮލިފައިވި ފުރަތަމަ ދިވެހި އެތުލީޓެވެ.
ނޭޕާލްގައި ކުރިއަށްދިޔަ ސައުތު އޭޝިއަން ޓީޓީ ކޮލިފިކޭޝަނުގެ ޗެމްޕިއަންކަން ދީމާ ހޯދީ ލަންކާގެ އެއް ވަނަ ބަންޑާރާ ބިމަންދީ 4-1 ސެޓުން ބަލިކޮށްގެންނެވެ. ދީމާ ވަނީ މީގެ ކުރިން ގްރޫޕް ސްޓޭޖުގައި ވެސް ބަންޑާރާގެ މައްޗަށް ކުރިހޯދައިފަ އެވެ.
ދީމާގެ ކާމިޔާބީ ހާއްސަ
ދީމާގެ ކާމިޔާބު ހާއްސަވާ ސަބަބުތައް ގިނަ އެވެ. އެއީ ދީމާ އަކީ އަލަށް ކޮލިފިކޭޝަން ބުރުގެ މުބާރާތެއް ކުޅެ ޗެމްޕިއަންކަން ހޯދާ, އޮލިމްޕިކްސް އަށް ކޮލިފައިވި ފުރަތަމަ ކުޅުންތެރިޔާ އެވެ.
މީގެ ކުރިން ރާއްޖޭގެ ކުޅުންތެރިން އޮލިމްޕިކްސްގައި ވާދަކުރަނީ ކޮލިފައިނުވާ ގައުމުތަކުގެ ތެރެއިން ލިބޭ އިންވިޓޭޝަނަލް (ޓްރައިޕާޓައިޓް)ގެ ފުރުސަތުގަ އެވެ. އެ ގޮތުން، 1988 ވަނަ އަހަރުން ފެށިގެން، އެތުލެޓިކްސް އާއި ސްވިމިން އަށް ރާއްޖެ އަށް ލިބޭ އިންވިޓޭޝަނަލް ފުރުސަތުތަކުގައި، އެތުލީޓުން ވާދަކުރެ އެެވެ. އޭގެ ތެރެއިން، 2012 ވަަނަ އަހަރުގެ ލަންޑަން އޮލިމްޕިކްސްގައި، ބެޑްމިންޓަން ކުޅުންތެރިޔާ، މުހައްމަދު އަޖުފާން ރަޝީދު ވާދަކުރިއިރު، އެންމެ ފަހުން ބޭއްވި ޓޯކިޔޯ އޮލިމްޕިކްސް އާއި މި ފަހަރުގެ އޮލިމްޕިކްސްގައި އިންވިޓޭޝަނަލް ފުރުސަތުގައި ބެޑްމިންޓަން ތަރި، ފާތިމަތު ނަބާހާ ވާދަކުރާނެ އެވެ.
އޮލިމްޕިކް ކޮމެޓީގެ ސެކްރެޓަރީ ޖެނެރަލް، ތަމޫހު އަހުމަދު ސައީދު (ތަމޫ), "އަދަދު" އަށް ވިދާޅުވީ, ދީމާ އާއި އެހެން ކުޅުންތެރިންނާ ތަފާތުވަނީ ދީމާ ކޮލިފައިން ކުޅެ, އެ މުބާރާތުގެ ޗެމްޕިއަންކަމާއެކު އޮލިމްޕިކްސް އަށް ކޮލިފައިވުމުން ކަމަށެވެ.
"މީގެ ކުރިން ރާއްޖެއިން އޮލިމްޕިކްސްގައި އެތުލީޓުން ވާދަކޮށްފައިވަނީ ޔުނިވާސާލިޓީ ޕްލޭސްގައި އެއީީ ސްވިމިންގް އާއި އެތުލެޓިކްސްގެ އެތުލީޓުން ދެން މި މި ލިބެނީ, ޓްރައިޕާޓޭ އިންވިޓޭޝަން, އެ ގޮތަށް ވެސް އެތުލީޓުން ވަނީ އޮލިމްޕިކްސްގައި ވާދަކޮށްފައި, މި އަހަރުގެ އޮލިމްޕިކްސްގައި ވެސް އެ ގޮތަށް ކުޅުންތެރިން ބައިވެރިވާނެ." ތަމޫހު ވިދާޅުވި އެވެ.
އޮލިމްޕިކް ކޮލިފައިން ސީރީސްތަކުގައި ކުޅިވަރުތަކުން ރާއްޖޭގެ އެތުލީޓުން އަންނަނީ ބައިވެރިވަމުންނެވެ. އަދި އެ މުބާރާތްތަކުން ލިބޭ ޕޮއިންޓްތަކާ އެކު, އެ ކުޅުންތެރިންގެ ރޭންކިންގައި ކުރިއެރުންވެސް އަންނަނީ ހޯދަމުންނެވެ. ޓްރައިޕާޓޭ އިންވިޓޭޝަން ލިބޭ ކުޅުންތެރިންނަށް އެ ފުރުސަތު ލިބެނީ މި ޕޮއިންޓްތަކަށް ބެލުމަށްފަހުގަ އެވެ.
ތަމޫ ވިދާޅުވީ ރާއްޖޭގެ ކުޅުންތެރިއަކު ފުރަތަމަ ފަހަރަށް އޮލިމްޕިކްސް ކޮލިފައިންގައި ވާދަކޮށް ކާމިޔާބު ހޯދުން މިއީ ރާއްޖޭގެ ކުޅިވަރަށް ލިބުނު ކާމިޔާބީއެއް ކަމަށެވެ.
އޮލިމްޕިކް ކޮމިޓީން މިރޭ ނެރުނު ބަޔާނުގައިވަނީ މި ކާމިޔާބީގައި ދީމާގެ އާއިލާ އާއި ކޯޗު، ޒްވޮނިމީރް ކޮރެނިޗް އަދި ޓޭބަލް ޓެނިސް އެސޯސިއޭޝަންގެ ދައުރު ފާހަގަކުރި އެވެ.
އޮލިމްޕިކް ކޮމިޓީގެ ރައީސް، މުހައްމަދު އަބްދުއްސައްތާރު (ޗަމްޕީ) ވިދާޅުވީ، ދީމާގެ މި ކާމިޔާބީ އަކީ މި ކުރު މުއްދަތުގެ ތެރޭގައި ކުރި ބުރަ މަސައްކަތުގެ ނަތީޖާ ކަމަށެވެ.
އޮލިމްޕިކް ކޮމިޓީގެ ނޫސްބަޔާން.
