ވިލާ ކޮލެޖުން ބެޗްލާ އޮފް ސިވިލް އިންޖިނިއަރިން ކޯހެއް ތައާރަފުކޮށްފި އެވެ.
ވިލާ ކޮލެޖުގެ ފެކަލްޓީ އޮފް އިންޖިނިއަރިން އެންޑް ޓެކްނޮލޮޖީގެ ފަރާތުން ތައާރަފުކުރި މި ކޯހަކީ އިންޖިނިއަރިންގެ ރޮނގުން ގައުމުގައި ހުނަރުވެރި ޕްރޮފެޝަނަލުންތަކެއް އުފެއްދުމަށް ފެށި މަސައްކަތެކެވެ.
ވިލާ ކޮލެޖުން ބުނީ މި ކޯހަކީ ވޮޝިންޓަން އެކޯޑާއި އެލައިން ކުރެވިގެން ޑިޒައިން ކުރެވިފައިވާ ދުނިޔޭގެ ފެންވަރުގެ މަތީ ތައުލީމެއް ފޯރުކޮށްދިނުމަށާއި، ޕްރޮފެޝަނަލް ޑިވެލޮޕްމެންޓަށް ވިލާ ކޮލެޖުން ކުރަމުންދާ މަސައްކަތަށް އިތުރުވި ބޮޅެއް ކަމަށެވެ.
މި ޕްރޮގްރާމާއެކު ވިލާ ކޮލެޖުން ކުރިއަށް ގެންދާ ފައުންޑޭޝަން އިންޖިނިއަރިން ޕްރޮގްރާމް ފުރިހަމަކޮށްފައި ތިބި ކުދިންނަށް ސިވިލް އިންޖިނިއަރިންގެ ދާއިރާއިން މަތީ ތައުލީމް ހާސިލުކުރަން ކުރަމުން ދިޔަ ދިގު އިންތިޒާރަށް ވަނީ ނިމުމެއް ގެނެވިފައި ކަމަށް އެ ކޮލެޖުން ބުނެ އެވެ.
މި ޕްރޮގްރާމަކީ އިންޖިނިއަރިން ދާއިރާއިން އިންޖިނިއަރުން ތަމްރީންކުރުމަށް ބޭނުންވާ ތިއަރީ އާއި ޕްރެކްޓިކަލްސް އެކުލެވޭ ގޮތަށް ފަރުމާކުރެވިފައިވާ، ކޮންޓެންޓްގެ ގޮތުންވެސް ވަރަށް ފުރިހަމަ ޕްރޮގްރާމެކެވެ.
މިގޮތުން ފްރޮގްރާމްގެ ދަށުން އިމާރާތްކުރުމުގެ މަޝްރޫއުތައް ޕްލޭންކޮށް، ޑިޒައިންކޮށް، އިމާރާތްކޮށް އަދި މެނޭޖްކުރުމުގެ ގާބިލްކަން ހުރި ޕްރޮފެޝަނަލް ގްރެޖުއޭޓުން އުފައްދާނެ އެވެ.
"މިކޯހުގައި ސިވިލް އިންޖިނިއަރިންއާ ގުޅުންހުރި ސްޕެޝަލިސްޓް ދާއިރާތައް ކަމުގައިވާ ސްޓްރަކްޗަރަލް އިންޖިނިއަރިން، ޖިއޯޓެކްނިކަލް އިންޖިނިއަރިން، އެންވަޔަރމެންޓަލް އިންޖިނިއަރިން، ވޯޓާ، ހައިވޭ އިންޖިނިއަރިން، އަދި ޓްރާންސްޕޮޓޭޝަން ބެހޭ މުހިއްމު ދާއިރާތަކުން ކިޔަވައިދޭނެ. ޕްރޮގްރާމް ފަރުމާކުރެވިފައި ވާނީ ރާއްޖެއިން ދާއިރާގައި މަސައްކަތް ކުރައްވާ ތަޖުރިބާކާރު ބޭފުޅުންގެ ލަފަޔާ އިރުޝާދުގެ ދަށުން،" ވިލާ ކޮލެޖުން ބުންޏެވެ.
މިކޯހުން ދަސްވެނިވެގެން ދާނެ ދަރިވަރުންނަކީ ސީދާ ވަޒީފާއަށް ނުކުތުމަށް ތައްޔާރުކުރެވިފައިވާ ދަރިވަރުންތަކެއް ކަމުގައި ޔަގީކަން ވިލާ ކޮލެޖުގެ ސްކޫލް އޮފް ކޮންޕިއުޓާ ސައިންސްގެ ހެޑް، އުދުމާ އަބްދުލް ލަތީފް ވިދާޅުވި އެވެ.
މި ޕްރޮގްރާމްގެ ދަށުން ޒަމާނީ ލެބޯޓްރީތަކާއި ޒަމާނީ ސިމިއުލޭޝަން ޓޫލްސްތައް މެދުވެރިކޮށް އިންޖިނިއަރިން އަދި ޓެކްނޮލޮޖީގެ އިލްމު ފޯރުކޮށްދެ އެވެ. އަދި ޕްރޮގްރާމްގައި ހިމެނޭ އިންޑަސްޓްރިއަލް ޓްރޭނިން މޮޑިއުލްގެ ސަބަބުން ދަރިވަރުންނަށް މަސައްކަތުގެ ހަގީގީ މާހައުލެއް ތަޖުރިބާ ކުރުމުގެ ފުރުސަތު ލިބިގެންދާނެ އެވެ.
ކޮމްޕްލެކްސް އިންޖިނިއަރިން މައްސަލަތަކަށް އުފެއްދުންތެރި އަދި އާ ހައްލުތައް ހޯދައިގެން ދަރިވަރުންނަށް ގްރެޖުއޭޓް ވެވޭނެ ގޮތަށް ކެޕްސްޓޯން ޕްރޮޖެކްޓަކާއި މިނީ ޕްރޮޖެކްޓްތަކާއި ފައިނަލް އިޔާ ޕްރޮޖެކްޓެއް ވެސް މިޕްރޮގްރާމްގައި ހިމެނިފައިވެ އެވެ.
މީގެ އިތުރުން ވެސް އެހެނިހެން ސޮފްޓް ސްކިލްސްތައް ކަމުގައިވާ އެފެކްޓިވް ކޮމިއުނިކޭޝަނާއި ޕްރެޒެންޓޭޝަން ސްކިލްސް އާއި ޕްރޮފެޝަނަލް އެތިކްސް އާއި ސޭފްޓީ އަދި ޕްރޮޖެކްޓް މެނޭޖްމަންޓް ސްކިލްސް މި ޕްރޮގްރާމްގެ ތެރެއިން ދަސްވާނެ އެވެ.
