މާލޭގެ މަގުމައްޗަށް 30 އިމާރާތަކުން ފެން ފައިބާތީ ޖަހާ މައްސަލަ ހައްލުކުރަން އެ އިމާރާތްތަކުގެ ވެރި ފަރާތަށް މާލެ ސިޓީ ކައުންސިލުން އަންގައިފި އެވެ.
މާލެ ސިޓީ ކައުންސިލުގެ މޭޔަރު އާދަމް އާޒިމް "އެކްސް" ގައި ކުރެއްވި ޕޯސްޓެއްގައި ވިދާޅުވީ މި މަހު އެކަނި ވެސް މާލޭގެ މަގުމައްޗަށް ފެންތިކި ޖަހާ ގޮތަށްހުރި ތަންތަން ފާހަގަކޮށް، އެތަންތަން މަރާމާތުކޮށް ރަނގަޅުކުރަން އަންގާފައިވާ ކަމަށެވެ.
އިމާރާތްތަކުން ފެންތިކި ޖަހާ މައްސަލަ އަކީ ޒަމާނުއްސުރެ ހައްލުނުކުރެވި އޮތް މައްސަލައެއް ކަމަށާއި މިފަދަ މައްސަލަތައް ހައްލުކުރުމަށް ހުރިހާ ރައްޔިތުންގެ އެއްބާރުލުން ބޭނުންވާ ކަމަށް އާޒިމް ވިދާޅުވި އެވެ.
މާލޭގެ މަގުތަކަށް އެކި އިމާރާތްތަކުން ފެންތިކި ޖަހާތީ އެކަން ހައްލުކޮށްދޭން މީގެ ކުރިން ސޯޝަލް މީޑިއާގައި މޭޔަރު އާޒިމް ޓެގުކޮށް ގިނަ ފަރާތްތަކުން ވަނީ އެދިފަ އެވެ.
މޭޔަރުކަމާ ހަވާލުވެ އާޒިމް އަންނަނީ ރައްޔިތުންނާ ބައްދަލުކޮށް، ކަންބޮޑުވުންތައް އައްސަވާ ފާހަގަކުރެވޭ މިކަހަލަ މައްސަލަތައް ހައްލުކުރަން މަސައްކަތް ކުރަމުންނެވެ.
މިގޮތުން މާލެއަށް ދިމާވެފައިވާ ކުނީގެ މައްސަލަ ހައްލު ކުރުމަށް، މަގުތަކުގައި ގަވައިދާ ހިލާފަށް ކުނި ބަހައްޓާ ފަރާތްތައް އަންނަނީ ޖޫރިމަނާ ވެސް ކުރަމުންނެވެ. އޭގެ ތެރޭގައި ދިވެހިންނާއި ބިދޭސީން ވެސް ހިމެނެ އެވެ.
