ލަންޑަން (މެއި 11) - ޗެލްސީގެ ކޯޗުކަމުން އޭނާ ވަކިކުރަން އެ ކްލަބްގެ ވެރިން ނިންމައިފިނަމަ އެކަން ބަލަައިގަންނާނެ ކަމަށް އެ ޓީމުގެ ކޯޗު، މައުރީސިއޯ ޕޮޗެޓީނޯ ބުނެފި އެވެ.
ދެ އަހަރުގެ ކޮންޓްރެކްޓެއްގައި މި ސީޒަނު ޗެލްސީއާ ހަވާލުވި ޕޮޗެޓީނޯ މި ސީޒަނަށް ފަހު އެ ޓީމުން ވަކިކުރާނެ ކަމުގެ ވާހަކަ މީޑިއާގައި މިދިޔަ ހައެއްކަ މަހު އަންނަނީ ދެކެވެމުންނެވެ. އެކަމަކު، ފަހަކަށް އައިސް ޕޮޗެޓީނޯ ވަނީ ޗެލްސީގެ ނަތީޖާތަަށް ވަރަށް ބޮޑަށް ރަނގަޅުކުރަމުންނެވެ. އެ ކަމުގެ ވާހަކަތައް، ޗެލްސީގެ ވެރިޔާ، ޓޮޑް ބޯލީ ވެސް ވަނީ މީޑިއާގައި ދައްކައިފަ އެވެ.
އެކަމަކު، އަދިވެސް ކޮންމެވެސް ވަރަކަށް ޗެލްސީން ކޯޗު ބަދަލުކުރާނެ ކަމުގެ ރިޕޯޓްތައް މީޑިއާގައި ހިނގަ އެވެ. ޕޮޗެޓީނޯ ބުނީ، އޭނާ ވަކިކުރަން ޗެލްސީން ނިންމިޔަސް އެއީ ހުރިހާ ކަމެއްގެ ނިމުން ނޫން ކަމަށެވެ. އެކަމަކު، އޭނާ ޗެލްސީގައި ހުންނާނީ އެ ކްލަބްގައި އޮތް ޕްރޮޖެކްޓާ މެދު އެންމެންނަށް އެއްބަސްވެވޭނަމަ ކަމަށް ޕޮޗެޓީނޯ ވަނީ ބުނެފަ އެެވެ.
"މީގެ މުހިންމު ކަމަކީ އެންމެން އުފަލުގައި ތިބުން، އެއް ވިސްނުމެއްގައި ތިބުން. ކްލަބްގެ ވެރިޔާ އާއި ސްޕޯޓިން ޑިރެކްޓަރު އުފަލުގައި ހުރެފައި، ކޯޗުން ހިތްހަމަނުޖެހި ހުރެގެން މި ކަމެއް ނުވާނެ. ހަަމަ އެ ގޮތަށް، ކޯޗުން ހިތްހަމަޖެހިފައި ކްލަބްގެ ވެރިޔާ އާއި ސްޕޯޓިން ޑިރެކްޓަރު ނުރުހިފައި ހުރެގެން ވެސް ބޭނުންވާ ކަމެއް ނުވާނެ،" ޕޮޗެޓީނޯ ބުންޏެވެ.
"އަހަންނަކީ ޕްރޮފެޝަނަލެއް، ކޮންމެ ނިންމުމެއް ވެސް އަހަރެން ބަލައިގަންނާނަން. އެ ގޮތަށް، އަހަރެން މަސައްކަތް ކުރާނީ ވެސް ޓީމެއްގެ ގޮތުގައި ކުރެވޭނަމަ،"
ލީގުގެ ހަތް ވަަނައިގައި މި ވަގުތު އޮތް ޗެލްސީ މިރޭ ކުޅޭ މެޗުގައި ރަށުންބޭރުގައި ނުކުންނާނީ ނޮޓިންހަމް ފޮރެސްޓާ ދެކޮޅަށެވެ. ލީގުގެ ފަހު މެޗުގައި ޗެލްސީން މި މަހު 19 ގައި ބޯންމައުތާ ބައްދަލުކުރާނީ އަމިއްލަ ދަނޑުގަ އެވެ. އެއީ، ޕޮޗެޓީނޯ، ޗެލްސީ އަށް ކޯޗުކޮށްދޭ ފަހު މެޗަށް ވުމުގެ ފުރުސަތު އެބައޮތެވެ.
