މި އަހަރުގެ ހުޅަނގު މޫސުން ދެކުނުގެ އަތޮޅުތަކަށް ފެށިފައިވާ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން މިއަދު ބުނެފި އެވެ.
މެޓް އޮފީހުން ބުނި ގޮތުގައި ހުޅަނގު މޫސުމުގެ އަސަރުތައް އާންމު ގޮތެއްގައި މޭ މަހުގެ ފުރަތަމަ ހަފުތާގެ ތެރޭގައި ދެކުނުގެ އަތޮޅުތަކަށް ފަށަ އެވެ. އަދި މަސް ނިމޭ އިރު ހުޅަނގު މޫސުން މުޅި ރާއްޖެއަށް މި މޫސުން ފެށިގެންދާނެ ކަމަށް އެ އިދާރާއިން ބުންޏެވެ.
ރާއްޖޭގައި ހުޅަނގު މޫސުން ފެށުނު ކަމަށް ބަލާ މިންގަނޑަކީ މޭ 1 ގެ ފަހުން ދެކުނުގެ އަތޮޅުތަކަށް 2.5 މިލިމީޓަރު ނުވަތަ އިތުރަށް ވާރޭ ވެހުމާއި، ވައިގެ މިސްރާބު ހުޅަނގު ދެކުނާއި ހުޅަނގާ ދެމެދުގައި ހުރެފައި ގަޑިއަކު 10 ނޯޓިކަލް މޭލަށް ވުރެ ބާރުމިނުގައި ދެ ދުވަހަށް ނުވަތަ އިތުރަށް ދެމިގެން ދިޔުމެވެ.
ހުޅަނގު މޫސުން ދެމިގެން ދަނީ ނޮވެމްބަރާ ހަމައަށެވެ. އަދި އިރުވައި މޫސުން ޖެނުއަރީގައި ފަށާފައި ނިމެނީ މާޗު މަހުގަ އެވެ.
