އިލެކްޓްރޯނިކް ޕާސްޕޯޓުގެ ސްޓޮކް ހުސްވެ، އެ ބާވަތުގެ ޕާސްޕޯޓަށް އެދި ހުށަހެޅުން އަދި ވެސް އޮތީ ހުއްޓިފައި ކަމަށް އިމިގްރޭޝަނުން ބުނެފި އެވެ.
އިމިގްރޭޝަނުގެ ހިދުމަތްތަކަށް އެދި ހުށަހަޅާ "އިމުގާ" ވެބްސައިޓުން ދައްކާ ގޮތުގައި އީ-ޕާސްޕޯޓަށް އެދި ހުށަހެޅުން ވަނީ ވަގުތީ ގޮތުން މެދުކަނޑާލާފަ އެވެ.
އިމިގްރޭޝަނުން މީގެ ކުރިން ބުނީ އޭޕްރީލް 15، ގެ ފަހުން އީ-ޕާސްޕޯޓަށް އެދި ހުށަހެޅޭނެ ކަމަށެވެ. ނަމަވެސް، އީ-ޕާސްޕޯޓުގެ ސްޓޮކް ލިބޭނީ މިމަހުގެ ތެރޭގައި ކަމަށާއި ވަކި ތާރީހެއް ބުނަން ނޭނގޭ ކަމަށް އިމިގްރޭޝަނުން މިއަދު ބުންޏެވެ.
މެދުކަނޑާލާފައި ވަނީ 48 ސަފުހާގެ އިލެކްޓްރޯނިކް ޕާސްޕޯޓު ދޫކުރުމުގެ ހިދުމަތެވެ. އަދިވެސް 32 ސަފުހާގެ އާދައިގެ ޕާސްޕޯޓަށް ހުށަހެޅޭނެ އެވެ.
އީ-ޕާސްޕޯޓުގެ ޒަރިއްޔާއިން އަމިއްލައަށް ޗެކް-އިން ވެވޭ އީ-ގޭޓުގެ ހިދުމަތް ބޭނުންކުރެވޭނެ އެވެ. އީ-ޕާސްޕޯޓުގައި ހުންނަ ޗިޕެއްގައި ރައްކާކޮށްފައި ހުންނަ ޑޭޓާގެ އިތުރުން ނަގާފައިވާ ފޮޓޯ ނުވަތަ އިނގިލީގެ ނިޝާނުގެ ޒަރިއްޔާއިން ޕާސްޕޯޓުގެ ވެރި ފަރާތް އެ ގޭޓުން ކަށަވަރު ކުރާނެ އެވެ. އަދި އީ-ޕާސްޕޯޓާއިއެކު ގިނަ އިރު ކިޔުގައި މަޑުކުރަން ނުޖެހި އެއާޕޯޓުގެ ގިނަ ހިދުމަތްތަކެއް ލިބޭނެ އެވެ.
