ޕީޕަލްސް ނެޝަނަލް ފްރޮންޓު (ޕީއެންއެފް) އުފެއްދުމުގެ ޖަލްސާއަށް ސަރުކާރުން ހުރަސް އެޅުމުން ކަންބޮޑުވާ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެ އެވެ.
ސޯލިހު "އެކްސް" ގައި ކުރެއްވި ޕޯސްޓެއްގައި ވިދާޅުވީ ޕީއެންއެފް އުފެއްދުމުގެ ޖަލްސާއަށް އެ ޕާޓީގެ މެމްބަރުން ވަނުމަށް ސަރުކާރުން ހުރަސްއެޅުމަކީ އަދި ވަރަށް ކަންބޮޑުވާ މައްސަލައެއް ކަމަށެވެ.
ސިޔާސީ ޕާޓީތައް އުފެއްދުމާއި، ސުލްހަވެރިކަމާއެކު ހަރަކާތްތައް ކުރިއަށް ގެންދިޔުމަކީ ގާނޫނު އަސާސީން ކަށަވަރު ކޮށްދީފައިވާ ހައްގެއް ކަމަށާއި، އެ ހައްގަށް އަރައިގަތުމަކީ ކުރެވިގެންވާނެ ކަމެއް ނޫން ކަމަށް ސޯލިހު ވިދާޅުވި އެވެ.
ސޯލިހު ވިދާޅުވީ ލިބިފައިވާ ހައްގުތައް ދެމި އޮތުމަށް އެ ހައްގުތައް ހިމާޔަތްކޮށް ރައްކާތެރި ކުރުމަށް މަސައްކަތް ކުރަން ޖެހޭ ކަމަށެވެ.
ޕީއެންއެފް އުފެއްދުމުގެ ޖަލްސާ ރޭ ޣިޔާސުއްދީން ސްކޫލުގައި ބޭއްވުމަށް މަސައްކަތް ކޮށްފައިވާއިރު، ފުލުހުން ވަނީ އެ ޖަލްސާ ބޭއްވުމަށް ހުރަސް އަޅައިފަ އެވެ. އެއާއެކު، ޖަލްސާ ބާއްވާފައި ވަނީ ސިޓީ ކައުންސިލުން ހުއްދަ ނަގައިގެން ރާޅުގަނޑު ސަރަހައްދުގަ އެވެ.
