ކުރިއަށް އޮތް ރައްޔިތުންގެ މަޖިލިސް އިންތިހާބުގައި ވެރިކަންކުރާ މައި ޕާޓީ، ޕީއެންސީގެ ފަރާތުން ވާދަކުރައްވާ ކެންޑިޑޭޓުންގެ ސީދާ އަދަދު ސާފުކޮށް ވިދާޅުވާން އެ ޕާޓީގެ ތަރުޖަމާނު ހީނާ ވަލީދަށް ދަތި ވެއްޖެ އެެވެ.
މަޖިލިސް ކެމްޕޭނުގެ އަދާހަމަ ގެނެސްދިނުމަށް މިއަދު ބޭއްވި ނޫސްވެރިންގެ ބައްދަލުވުމެއްގައި ނޫސްވެރިން ވަނީ ސަރުކާރާއި ޕީއެންސީގެ ތާއީދު އޮތް ކެންޑިޑޭޓުން ސާފުނުވާ މައްސަލާގައި ތަކުރާރުކޮށް ސުވާލުކޮށްފަ އެވެ.
އެގޮތުން، ބައެއް ދާއިރާތަކުގެ ޕީއެންސީ ކެންޑިޑޭޓުން ފަހަތަށް ޖެހި އަމިއްލަ ގޮތުން ވާދަކުރާ ކެންޑިޑޭޓުންނަށް ތާއީދުކުރަމުންދާ ދިޔުމާއި، އެހެން ދާއިރާތަކުގައި ޕީއެންސީ ކެންޑިޑޭޓުން ތިއްބާ ސަރުކާރުގެ އިސްވެރިން އަމިއްލަ ގޮތުން ވާދަކުރާ ކެންޑިޑޭޓުންނަށް ތާއީދުކުރަމުންދާ ދިޔުން ނޫސްވެރިން ވަނީ ފާހަގަކޮށްފަ އެވެ.
މިކަން މިހެން ހުރުމާއި، މީގެ ކުރިން ތިން ދާއިރާއަކަށް ވާދަނުކުރާން ޕީއެންސީއިން ނިންމި ނިންމުމާއެކު މިހާރު އެ ޕާޓީން ވާދަކުރައްވަނީ ކިތައް ކެންޑިޑޭޓުންތޯ ހީނާއާ ސުވާލުކުރި އެވެ.
އެ ސުވާލު ފުރަތަމަ ކުރިމަތިވުމުން ހީނާ ވިދާޅުވީ، ޕީއެންސީގެ ކެންޑިޑޭޓުންނަކީ ކޮބައިކަން ރައްޔިތުންނަށް ސާފުވާނެ ކަމަށެވެ. ނަމަވެސް ބައެއް ދާއިރާތަކުގައި އެ ޕާޓީގެ ކެންޑިޑޭޓުން ފަހަތަށް ޖެހި އެހެން ކެންޑިޑޭޓުންނަށް ތާއީދުކޮށްފައިވާކަން އޭނާ ފާހަގަކުރި އެވެ.
"ކެންޑިޑޭޓުންނަށް ބަދަލުތަކެއް ހުރުމަކީ އެކަށީގެންވާ ކަމެއް، އެގޮތަށް އެބަހުރި ހަމަ ބައެއް ދާއިރާތަކުގަ އަޅުގަނޑުމެންގެ ޓިކެޓުގަ ވާދަކުރާ ކެންޑިޑޭޓު ފަހަތަށް ޖެހިފަ އެހެން ކެންޑިޑޭޓަކަށް ތާއީދުކޮށްފަ، އެއީ އެ ދާއިރާގެ މަޖިލިސް ގޮނޑި ޕީޕީއެމް ޕީއެންސީއަށް ނެގޭނެ ފޯމިއުލާއަކަށް ވިސްނަވާފަ ކަމަށް އަޅުގަނޑަށް ގަބޫލު ކުރެވެނީ"
ހީނާގެ މި ޖަވާބާ އެކުވެސް ކެންޑިޑޭޓުންގެ އަދަދު ސާފުކުރުމަށް ނޫސްވެރިން ވަނީ އަހާފަ އެވެ. ނަމަވެސް އެ ސުވާލަށް ހީނާ ސީދާ ޖަވާބެއް ނުދެއްވަ އެވެ. އޭނާ ވިދާޅުވީ އެ ނަމްބަރުތައް ނޫސްވެރިންގެ ބައްދަލުވުމަށްފަހު ދެއްވާނެ ކަމަށެވެ.
ނަމަވެސް ޕްރެސްއަށްފަހު ނޫސްވެރިންނަށް އެ މައުލޫމާތު ހިއްސާކޮށްފަ ނުވާ ކަމަށް މިއަދުގެ ބައްދަލުވުމަށްދިޔަ ނޫސްވެރިން މައުލޫމާތު ދީފައިވެ އެވެ.
