ދަރިމައިވުމާ ގުޅޭ ދެ ފަރުވާ ކަމަށްވާ އައިޔޫއައި އަދި އައީވީއެފްގެ ފަރުވާތައް އާސަންދަ ހެލްތު ސްކީމުގެ ހޯދުމަށް އެދި ފޯމު ހުށަހަޅަން ހުޅުވާލައިފި އެވެ.
އާސަންދައިގެ ދަށުން އައިވީއެފް ފަރުވާއަށް އެދި ހުށަހަޅަން ހުޅުވާލީ އިއްޔެއިން ފެށިގެން ދެ މަސް ދުވަހުގެ މުއްދަތަކަށެވެ. މޭ 15 ގެ ނިޔަލަށް ހުށަހަޅާ ފޯމުތަކުން ޝަރުތު ހަމަވާ މީހުންގެ ތެރެއިން މި އަހަރު އައިވީއެފް ހިދުމަތް ފޯރުކޮށްދޭން ހަމަޖެހިފައި ވަނީ އެންމެ މަތިން ޕޮއިންޓު ލިބޭ 100 ދެމަފިރިންނަށެވެ.
އާސަންދައިގެ ދަށުން އައިވީއެފް ހިދުމަތް ލިބިގަނެވޭނީ ރާއްޖޭގައި މި ހިދުމަތް ފޯރުކޮށްދޭ މަރުކަޒުތަކުންނާއި، ރާއްޖެއިން ބޭރުން މި ހިދުމަތް ފޯރުކޮށްދިނުމަށް އެމްޕެނަލް ކުރެވޭ މަރުކަޒުތައް މެދުވެރިކޮށެވެ.
އައިވީއެފްގެ ހިދުމަތް ހޯދުމަށް ފޯމު ހުށަހަޅަން ޖެހެނީ އެ ފަރުވާ ބޭނުންވާ ކަމަށް ބުނާ ޑޮކްޓަރުގެ ލިޔުމަކާއި, ކުށާއި ދަރަނީގެ ރިޕޯޓާއި, ދެމަފިރިންގެ މުސާރައާއި އިނާޔަތްތައް އެނގޭނެ ރަސްމީ ލިޔުމެއްގެ އިތުރުން ހަ މަސް ދުވަހުގެ ބޭންކް ސްޓޭޓްމަންޓް އަދި ކުރިން ހޯދާފައިވާ އައިވީއެފް ޓްރީމަންޓާ ބެހޭ ސިއްހީ ލިޔެކިއުންތަކުގެ އިތުރުން ކައިވެނީގެ ސެޓްފިކެޓާއި އައިޑީކާޑާއެކު އެވެ.
އައިވީއެފް ފޯމު ފުރިހަމަ ކުރުމަށްފަހު ހުށަހަޅަން ޖެހެނީ އީމެއިލް މެދުވެރިކޮށް އެންސްޕާއަށް ނުވަތަ އައިޖީއެމްއެޗް, ހުޅުމާލެ ހޮސްޕިޓަލް އަދި މޫކައި ސުއިޓްސްގެ 4 ވަނަ ފަނގިފިލާގައި ގާއިމްކޮށްފައިވާ އެންސްޕާ ކައުންޓަރުތަކަށެވެ.
އައިޔޫއައި
އާސަންދަ މެދު ވެރިކޮށް އައިޔޫއައި ހިދުމަތް ފޯރުކޮށްދޭން ހުޅުވާލީ މާޗް, 15 އިން ފެށިގެންނެވެ. އައިޔޫއައި ދެނީ މި ހިދުމަތް ދިނުމަށް އެމްޕެނަލްކުރެވޭ ހަމައެކަނި ރާއްޖޭގެ ސިއްހީ ހިދުމަތް ފޯރުކޮށްދޭ މަރުކަޒުތައް މެދުވެރިކޮސް, ގިނަވެގެން ތިން ފަހަރަށެވެ.
އައިޔޫއައި ހިދުމަތް ހޯދުމަށް ފޯމު ހުށަހަޅަން ޖެހެނީ އެ ފަރުވާ ބޭނުންވާ ކަމަށް ބުނާ ޑޮކްޓަރުގެ ލިޔުމާއި ކުށާއި ދަރަނީގެ ރިޕޯޓުގެ އިތުރުން ކައިވެނީގެ ސެޓްފިކެޓާއި އައިޑީކާޑާއެކު އެވެ.
އައިޔޫއައި އަށް އެދޭ ފޯމު ފުރިހަމަ ކުރުމަށްފަހު ހުށަހަޅަން ޖެހެނީ އީމެއިލް މެދުވެރިކޮށް އާސަންދައަށް ނުވަތަ ފެންބިލްޑިން 3 ވަނަ ފަންގިފިލާގައި ހުންނަ އާސަންދަ ކުންފުނީގެ ކައުންޓަރުންނާއި މާލެ ސަރަހައްދުގެ ހޮސްޕިޓަލްތަކުގެ 'ވިރަ' ކައުންޓަރުތަކަށެވެ.
އެހީއަށް އެދި ހުށަހަޅަން ޖެހޭ ފޯމު އާސަންދަ އަދި އެންސްޕާގެ ވެބްސައިޓު މެދުވެރިކޮށް ލިބޭނެ އެވެ.
