އެމްއެންޑީއެފް އެއާ ކޯ އިފްތިތާހުކޮށް، ޑްރޯންތައް ބޭނުންކުރަން ފެށުމާ އެކީ ސިފައިންގެ އަސްކަރީ ގާބިލުކަން މިއަދު އެތައް ގުނައެއް އިތުރުވެގެން ގޮސްފައިވާ ކަމަށް ޗީފް އޮފް ޑިފެންސް ފޯސް، ލެފްޓިނެންޓު ޖެނެރަލް، އަބްދުއްރަހީމް އަބްދުއްލަތީފް ވިދާޅުވެއްޖެ އެވެ.
އެމްއެންޑީއެފް އެއާ ކޯ އިފްތިތާހު ކުރުމަށް ނ. މާފަރުގައި ބޭއްވި ރަސްމިއްޔާތުގައި އަބްދުއްރަހީމް ވިދާޅުވީ، ޒަމާނީ ވަސީލަތްތަކާއެކު އަންމޭންޑް އޭރިއަލް ވެހިކަލްސް (ޔޫއޭވީ) ނުވަތަ ޑްރޯންތައް ހޯއްދަވައިދެއްވާ ދިވެހި އަސްކަރީ ގާބިލުކަން މިއަދު މިވަނީ އެތައް ގުނައަކަށް އިތުރުވެފައި ކަމަށާއި، މިއީ ގައުމީ ސަަލާމަތަށް ލިބިގެންދާ ވަރަށް ބޮޑު ޔަގީންކަމަކާއި އިތުބާރެއް ކަމަށެވެ.
ދިވެހި އަސްކަރިއްޔާގެ ތެރޭގައި ވައިގެ ހިދުމަތުގެ ތާރީހެއް އޮތްކަން ފާހަގަކުރައްވާ އަބްދުއްރަހީމް ވިދާޅުވީ، އޭގެ ތެރެއިން ގިނަ ދުވަސްތަކުގައި ހިދުމަތް ދެމުން އައީ ބޭރުގެ ފަރާތްތަކަށް ބަރޯސާވެގެން ކަމަށެވެ.
ނަމަވެސް އެންމެ ޒަމާނީ ވަސީލަތްތަކާއެކު އެމްއެންޑީއެފްގެ ކޮމްބެޓް އެންޑް މެނުއާ ފޯހެއްގެ ގޮތުގައި އެއާކޯ އުފެދިގެން މިދަނީ ރައީސް ޑރ. މުހައްމަދު މުއިއްޒުގެ ގައުމީ ވިސްނުމާ އެއްގޮތަށް ކަމަށާއި، ރާއްޖޭގެ ސަރަހައްދު ބެލެހެއްޓުމަށް ދެއްވާ އިސްކަމުގެ ތެރެއިން ކަމަށް އަބްދުއްރަހީމް ވިދާޅުވި އެވެ.
"މިއަދަކީ 4،000 އަހަރުވީ މިނިވަން ދިވެހިރާއްޖޭގެ ފަހުރުވެރި ތާރީހުގައި ވައިގެ މަގުން ދިވެހިރާއްޖެ ދިފާއު ކުރުމުގައި، ކަނޑުމަތީގައި ދިމާވާ ހާދިސާތަކުގައި ގެއްލޭ މީހުންނާއި އުޅަނދުފަހަރު ހޯދުމަށާއި މަސްވެރިންނާއި ދަތުރުވެރިންނަށް އެހީތެރިވުމަށް ދިވެހި އަސްކަރިއްޔާގައި ވައިގެ ބާރެއްގައި އެއާކޯ އުފެދިގެންދާ ތާރީހީ ދުވަސް" އަބްދުއްރަހީމް ވިދާޅުވި އެވެ.
މީގެ އިތުރުން އަބްދުއްރަހީމް ވިދާޅުވީ، މިއަދު ވެގެންދާނީ ދިވެހިރާއްޖޭގެ ތާރީހުގައި، ވަކިން ހާއްސަކޮށް ދިވެހި އަސްކަރީ ތާރީހުގައި ރަން އަކުރުން ބިންގައު ނެގިގެންދާނެ ވަރަށް ހާއްސަ ތާރީހީ ދުވަހަކަށް ކަމަށެވެ.
ރައީސް މުއިއްޒުއަށް ތައުރީފް ކުރައްވާ އަބްދުއްރަހީމް ވިދާޅުވީ، ޒަމާނީ ވަސީލަތްތަކާއެކު ދިވެހި އަސްކަރިއްޔާގެ ވައިގެ ބާރު އުފެއްދުމުގެ ތަސައްވަރަކީ ސީދާ ރައީސް މުއިއްޒުގެ ވިސްނުންފުޅެއް ކަމަށެވެ.
ގައުމުގެ ދިފާއާއި ރައްޔިތުންގެ ސަލާމަތާއި ރައްކާތެރިކަމަށްޓަކައި ދިވެހި އަސްކަރިއްޔާއަށް ހޯއްދަވާދެއްވާ ވަސީލަތްތަކުގެ ބޭނުން އެންމެ ފުރިހަމައަށް ހިފައިގެން ދިވެހިރާއްޖޭގެ މިނިވަންކަމާއި ސިޔާދަތާއި އިސްތިގުލާލު ރައްކާތެރިކުރުމާއި ސިފައިން ފަސް ޖެހުމެއް ނެތި މަސައްކަތް ކުރާނެކަމުގެ ޔަގީންކަން އަބްދުއްރަހީމް ދެއްވާފައިވެ އެވެ.
