އައްޑޫގެ ކަރަންޓާއި ފެނުގެ ހިދުމަތް އޮތީ ނިކަމެތި ހާލަތެއްގައި ކަމަށް އެ ސިޓީގެ މޭޔަރު އަލީ ނިޒާރު ވިދާޅުވެއްޖެ އެވެ.
އައްޑޫގައި ކަރަންޓާ ފެނުގެ ހާލަތާ ގުޅޭގޮތުން މިރޭ "އަދަދު" އަށް މައުލޫމާތު ދެއްވަމުން ނިޒާރު ވިދާޅުވީ އައްޑޫގައި ކަރަންޓުގެ ހާލަތު ގޯސްކަމުން މިހާރު ކަރަންޓު ކަނޑަން ފަށާފައިވާ ކަމަށާއި، ކަރަންޓު ކަނޑަން ފެށުމުން އައްޑޫއިން ފެން ހުސްވާނެ ކަމަށެވެ.
މިހާރު އޮތް ހާލަތުން އައްޑޫއިން ކަރަންޓުގެ ހިދުމަތް މެދުކެނޑޭތާ ދެ ގަޑިއިރު ތެރޭ ފެނުގެ ރިޒާވް ވެސް އެއްކޮށް ހުސްވެގެންދާނެ ކަމަށާއި، ނަރުދަމާ އޮތް ހާލަތުން ނަޖިސް އެރުން ވެސް ނުހުއްޓުވޭ ކަމަށެވެ.
"އަސްލު ހާލަތު އޮތީ ވަރަށް ގޯސްކޮށް. ފެނަކައިން ދޭ ހުރިހާ ހިދުމަތެއް އޮތީ ގޯސްކޮށް. ގެއަކަށް އަޅާނެ ކޭބަލެއް ނެތް. ނަޖިސް އެބަ އަރާ ރަށު ތެރެއިން. އާދޭސް އެބަ ކުރަން މި ކަންކަން ރަނގަޅު ކޮށްދޭށޭ،" ނިޒާރު ވިދާޅުވި އެވެ.
މިދިޔަ ސަރުކާރުން މިކަންކަން ހައްލު ކުރުމަށް ޕްލޭންތަކެއް ހަދައިގެން މަސައްކަތް ކުރި ނަމަވެސް، އެދެވޭ ހައްލުތަކެއް ގެނެވިފައި ނުވާކަން ފާހަގަކުރައްވައި ނިޒާރު ވިދާޅުވީ ފެނަކައިން ކުންފުނި "ރޭޕް ވެފައިވާ ކަމަށް" ބުނެ އެއްވެސް ކަމެއް ހައްލު ކުރަން އުޅޭތަން ނުފެންނަ ކަމަށެވެ.
ނިޒާރު "އެކްސް" ގައި ކުރެއްވި ޕޯސްޓެއް ވިދާޅުވީ ރައްޔިތުންނަށް ދޭން ޖެހޭ އަސާސީ ހިދުމަތްތައް ފެނަކައާ އަޅައި ދޫކުރެވެން ނެތް ކަމަށާއި، މިއީ ވިޔަފާރި އުސޫލުން ދެވެން ޖެހޭ ކަމެއް ނޫން ކަމަށެވެ.
އެގޮތުން މިކަމަށް އަވަސް ހައްލެއް ނުލިބިއްޖެނަމަ، އައްޑޫގެ ރައްޔިތުން ކާރިސާގެ ހާލަތުގައި ދިގު މުއްދަތަކަށް ތިބެން ޖެހިދާނެ ކަމުގެ ބިރުވެސް އެބަ އޮތް ކަމަށް ނިޒާރު ވިދާޅުވި އެވެ.
އައްޑޫގެ ކަރަންޓުގެ ހާލަތު އިއްޔެއިން ފެށިގެން ގޯސްވެފައިވާއިރު، ކޮންމެ ދުވަހަކު އެކި ސަރަހައްދުތަކުން ގަޑިއިރަކަށް މިހާރު އަންނަނީ ކަރަންޓު ކަނޑަމުންނެވެ. އަދި ރޯދަ މަހާ މިކަން ދިމާވުމާ ގުޅިގެން އައްޑޫގެ ރައްޔިތުންނަށް އަންނަނީ ބޮޑެތި އުނދަގޫތައް ކުރިމަތިވަމުންނެވެ.
