އެއްވެސް މީހަކު ދައްކާނެހާ ވާހަކައެއް ދެއްކުމުގެ ފުރުސަތު އެ ކަންކަމުގެ ހަގީގަތް އެނގޭ މީހުން ނުދޭނެ ކަމަށާއި ދުލުގައި ހިފައި ދަމާނަމަ ހަގީގަތް ހާމަކުރާނެ ކަމަށް ވިދާޅުވެ ކުރީގެ ރައީސް އަބްދުالله ޔާމީނަށް މި ސަރުކާރުގެ އިސް ވަޒީރު އަބްދުއްރަހީމް ނުސީދާ އިންޒާރެއް ދެއްވައިފި އެވެ.
ރައީސް ޑރ. މުހައްމަދު މުއިއްޒު މިހާރު އަތޮޅުތެރެއަށް ކުރައްވަމުން ގެންދަވާ "ރަސްމީ ކެމްޕޭން" ދަތުރުގެ ތެރެއިން މ. މުލަކުގައި ބޭއްވި ޖަލްސާގައި އަބްދުއްރަހީމް ވަނީ ޔާމީނަށް ނުސީދާ ބަހުގެ ހަމަލާތަކެއް އަމާޒުކުރައްވާފަ އެވެ. ނަމަވެސް, ޔާމީންގެ ނަމެއް އޭނާ ވިދާޅު ނުވެ އެވެ.
ބަދަލުގައި ޔާމީނަށް ނިސްބަތް ކުރެއްވީ "ފިތުނަ ފަސާދަ އުފެއްދުމަށްޓަކައި ރެޔާއި ދުވާލު ޕޯޑިއަމްތައް ބަހައްޓައިގެން އޯޑިއަންސްގައި ތިބެގެން ސުވާލުކުރާ ބޭފުޅުން" ގެ ގޮތުގަ އެވެ. ޔާމީން އުފައްދަވާ ޕީޕަލްސް ނޭޝަނަލް ފްރޮންޓް (ޕީއެންއެފް) ގެ އެމަނިކުފާނު ޕޯޑިއަމްގައި ވާހަކަ ނުދައްކަވަ އެވެ. މުޅިންވެސް ވާހަކަ ދައްކަވަނީ އޯޑިއަންސްގައި ހުންނަވައިގެންނެވެ.
"ތިޔަ ބޭފުޅުންނަށް ވެސް މި ގައުމަށް ހިދުމަތް ކުރުމުގެ ފުރުސަތު ރައްޔިތުން ދެއްވިއޭ. އެ ފުރުސަތުގައި ތިޔަ ވިދާޅުވާ ކަންތައްތައް އެ މަގުން ނުކުރައްވައި މިއަދު ސުލްހަވެރިކަމާ އެކު ރައްޔިތުންނަށް ލާބަ އާއި މަންފާ ލިބޭ ގޮތަށް ވެރިކަން ކުރަން ފެއްޓެވީމާ ދެން ފިތުނަ ފަސާދަ އުފައްދަން ތިޔަ ކުރައްވާ މަސައްކަތް ވާނީ ގައުމަށް ދެވޭ އަނިޔާއަކަށް," ޔާމީނާ ވަރަށް އަރިސް ބޭފުޅެއްގެ ގޮތުގައި ކުރިން ހުންނެވި އަބްދުއްރަހީމް ވިދާޅުވި އެވެ.
"އަޅުގަނޑުމެންގެ ދުލުގައި ހިފައި ދަމަން އެއްގޮތަކަށް ވެސް ހައްދަވާނެ ކަމެއް ނެތް. މިކަހަލަ ޕޯޑިއަމެއްގައި ހުރެ މާ ގިނަ ވާހަކަ ދެއްކޭކަށް ނެތް."
ފާހަގަކުރަން ޖެހޭ ގޮތުގައި އަބްދުއްރަހީމް މި ދަތުރުގައި ބައިވެރިވެވަޑައިގަންނަވަނީ ސީނިއާ މިނިސްޓަރުގެ ހައިސިއްޔަތުންނެވެ. އަދި ރައީސް އޮފީހުން ބުނަނީ މިއީ ރަސްމީ ދަތުރެއް ކަމަށެވެ. ނަމަވެސް, އެހެން ވިދާޅުވުމަށް ފަހު ޔާމީނަށް ސިޔާސީ ބަހުގެ ހަމަލާތަކެއް އޭނާ އަމާޒުކުރެއްވި އެވެ.
ޔާމީންގެ ވެރިކަމާ ގުޅޭ ވާހަކަތައް ހިއްސާކުރައްވާނެ ކަމުގެ އިޝާރާތެއް
އެގޮތުން, ޔާމީންގެ ނަން ވިދާޅު ނުވެ އަބްދުއްރަހީމް ވަނީ ރާއްޖޭގެ ވެރިކަން ކުރި ވެރިންނާ އެކު ވަރަށް ގާތުން މަސައްކަތް ކުރުމުގެ ފުރުސަތު ލިބިވަޑައިގެންނެވި ކަމަށް ވިދާޅުވެފަ އެވެ.
"އެ ވެރިން މަސައްކަތް ކުރި ގޮތާއި އެ ވެރިންގެ އަމަލުތައް ބައްޓަން ކުރި ގޮތާއި ރައްޔިތުންގެ ވާހަކަ އަޑު އެއްސެވި މިންވަރާއި, އެއަށް ދެއްވި އިޖާބައާ އަޅުގަނޑުމެން މިތިބީ ދެކިފައި. އެހެންވީމާ މި ދަންނަވަނީ ދުލުގައި ހިފައި ތިގޮތަށް ދަންމަވަން ނަހަދާށޭ. އެހެން ދެމި ވަރަކަށް އަޅުގަނޑުމެންނަށް ވެސް ތަންކޮޅެއް ގަދައަށް ވާހަކަ ދައްކަން ޖެހޭ ގޮތް ވެދާނެއޭ," އޭނާ ވިދާޅުވި އެވެ.
"ކޮންމެ ކަމެއްގައި ވެސް އޮންނާނެ ހައްދެއް, އިމެއް. އެ ހައްދުން ނެއްޓިގެން އިމުން ބޭރަށް ދިޔައިމާ ދެން ކުރިމަތިވާނެ ކަންކަން އަމިއްލަފުޅަށް އިހުސާސް ނުކުރެވޭ ކަމަށް ވާނަމަ އަޅުގަނޑު އެއަށް ދަންނަވާނެ އެއްޗެއް ނެތް."
ނުސީދާކޮށް ދެއްވި ބަހުގެ ހަމަލާތަކާއެކު އަބްދުއްރަހީމް ވަނީ ސާބިތުކަމާ އެކު މި ސަރުކާރާ އެކު ތިބިކަން އަނެއްކާ ވެސް ހާމަކުރައްވާފަ އެވެ. އެގޮތުން, ސަރުކާރު ދިފާއު ކުރުމުގެ ގޮތުން ދައްކަން ޖެހޭ ވާހަކަތައް ދައްކަވާނެ ކަމަށާއި ރައްޔިތުންނަށް ހަގީގަތް ހާމަކުރުމަށް ފަސްނުޖެހޭނެ ކަމަށް އޭނާ ވިދާޅުވި އެވެ.
"އެއްވެސް ބޭފުޅަކު ހީފުޅު ކުރައްވައިގެން ނުވާނެ, ތިމަންނާ ހަމަ ދައްކާނެހާ ވާހަކައެއް ދައްކަން ދެން އެކަންކަމުގެ ހަގީގަތް އެނގޭ މީހުން ހަނު ތިބެދާނެ ކަމަށް. އަޅުގަނޑުމެންނަކީ އެގޮތަށް މަޑުން ތިބޭނެ ބައެއް ނޫން," މޫނަކަށް ކަނދުރާއަކަށް ނުބަލައި ދައްކަން ޖެހޭ ހުރިހާ ވާހަކައެއް ދައްކާނެކަން ހާމަކުރަމުން އަބްދުއްރަހީމް ވިދާޅުވި އެވެ.
އެގޮތުން, އޭނާގެ އަތުން ހިފައި ލޯ ކުރިމަތީގައި ހިނގައިދިޔަ ކަންތައްތަކުގެ ވާހަކަ ދައްކަން ފެށުމުން ކޯފާވެ ޖެއްސުން ކުރުމުގެ މަސައްކަތް ނުކުރުމަށް އަބްދުއްރަހީމް ވިދާޅުވި އެވެ. ސަރުކާރުން ކުރަމުންދާ ކަންކަމަށް "ޖެއްސުން ކުރުމަކީ" ދިވެހި ރައްޔިތުންނަށް ކުރާ ޖެއްސުމަކަށް ވާނެ ކަމަށް އޭނާ ވިދާޅުވި އެވެ.
"ދިވެހީންގެ ވެރިކަން ދިވެހިންނަށް ކޮށްދޭން ބަޔަކު ނުކުތީމާ, އެކަން ކުރާން ފެށީމާ, އެއާ ދެކޮޅަށް ވަކާލާތު ކުރާން, އެއާ ދެކޮޅަށް ޖަދަލުކުރަން, އެއަށް ފާޑުކިޔަން ނުކުންނަ މީހާ ވާނީ ގައުމުގެ ދުޝްމިނަކަށް. ރައްޔިތުންގެ ހާއިނަކަށް," ވަރަށް ފޯރީގައި ވާހަކަ ކުރިއަށްގެންދަވަމުން އަބްދުއްރަހީމް ވިދާޅުވި އެވެ.
އަބްދުއްރަހީމް އާއި ޔާމީންގެ ޒަމާންވީ ގުޅުން ކެނޑިފައި!
ޔާމީން ޖަލުގައި އޮންނެވި ވަގުތު އިދިކޮޅު ކޯލިޝަން ހިންގެވުމުގެ ޒިންމާ އުފުލެއްވީ އަބްދުއްރަހީމް އެވެ. ސުޕްރީމް ކޯޓުން ނާކާމިޔާބުވެ ޔާމީނަށް ވާދަނުކުރެވޭނެކަން އެނގުނު ހިސާބުން އިދިކޮޅުގެ ކެންޑިޑޭޓަކަށް ޑރ. މުއިއްޒު ވެވަޑައިގެންނެވި އެވެ.
އެ އިންތިހާބުގެ ކެމްޕޭނުގައި މުއިއްޒުގެ އަރިހުގައި ގިނަ ދަތުރުތަކެއް އަބްދުއްރަހީމް ކުރެއްވި އެވެ. އިންތިހާބު ކާމިޔާބުވެ ވެރިކަމާ ރައީސް ހަވާލުވެވަޑައިގަތުމާ އެކު ސަރުކާރުގެ އެންމެ އިސް މަގާމަށް އަބްދުއްރަހީމް ހަމަޖެއްސެވި އެވެ. އޭގެ ހަފްތާއެއްހާ ދުވަސްފަހުން ޔާމީން ވަނީ ޕީޕީއެމް/ޕީއެންސީގެ ލީޑާޝިޕުން ވަކިވެ އާ ޕާޓީއެއް އުފެއްދުމުގެ މަސައްކަތް ފަށްޓަވާފަ އެވެ.
ޔާމީން ހާމަކުރައްވާފައިވާ ގޮތުގައި އެމަނިކުފާނުގެ ފޯނަކަށް ވެސް އަބްދުއްރަހީމް ހިމެނޭހެން ޕީޕީއެމް/ޕީއެންސީގެ ލީޑާޝިޕްގެ ބޭފުޅުން ޖަވާބެއް ނުދެއްވަ އެވެ. ސަރުކާރުގެ ވެރިން ވެސް ވަނީ މަގާމުތަކަށް ވަޑައިގެން ޔާމީންގެ ފަޅި ދޫކޮށް ރައީސްގެ ފަޅިއަށް އަރުއްވާފަ އެވެ.
"މިއިން އެއްވެސް ބޭފުޅަކު ބޭނުމެއް ނުވޭ މެސެޖަކަށް ޖަވާބު ދެއްވާކަށް ވެސް އަދި ފޯނަކަށް ޖަވާބު ދެއްވާކަށް ވެސް ބޭނުންފުޅެއް ނުވޭ, ކެރިވަޑައިގައެއް ވެސް ނުގަންނަވާ. އެހެންވީމާ އެ ގުޅުމެއް ނޯވޭ. ކީއްވެގެންތޯ އޯވާނައިޓް (އެއްރެއިން) މި ހުރިހާ ކަމެއް ބަދަލުވެގެން ދިޔައީ," ސަރުކާރުގެ ވެރިންނާ މެދު ފާޅުކުރެއްވި ހިތްހަމަނުޖެހުންތަކުގެ ތެރެއިން ފެބްރުއަރީ 6, 2024 ގައި ޔާމީން ހާމަކުރައްވާފައިވެ އެވެ.
ރިޔާސީ ކެމްޕޭނުގައި މި ސަރުކާރުން ވީ އެންމެ ބޮޑު ވައުދަކީ ކުރީގެ ރައީސް އަދި ޕީޕީއެމް/ޕީއެންސީގެ އޭރުގެ ލީޑަރު އަބްދުﷲ ޔާމީން މިނިވަން ކުރެއްވުމެވެ. އޭރު ރައީސް މުއިއްޒު އާއި އެ ކޯލިޝަންގެ ލީޑަރުން ވިދާޅުވަމުން ގެންދެވީ ޔާމީން ޖަލަށް ލާފައި ހުރީ ކުށެއް ކޮށްގެން ނޫން ކަމަށާއި، މިިނިވަން ނުވެ ހުރީ އޭރު ސަރުކާރުން ކޯޓުތަކަށް ނުފޫޒު ފޯރުވާތީ ކަމަށެވެ.
ޔާމީން އަދިވެސް މިނިވަން ނުވެ ހުންނެވިއިރު، އެ ވައުދު ފުއްދިފައިވާ ކަމަށް މި ސަރުކާރުން ބުނެފައިވެ އެވެ. އެ މަނިކުފާނު އަދިވެސް ހުންނެވީ މާލޭ ބަންދުގަ އެވެ. ކުރިން އިވެމުންދިޔަ ހަރާމް ހުކުމުމުގެ އަޑުވެސް ވަނީ ކެނޑިފަ އެވެ.
