ރައްޔިތުންގެ ފަރާތުން ކުރިމަތިވާ ފާޑުކިޔުންތައް ބަލައިގަތުމުގެ ބަދަލުގައި މި ސަރުކާރުން މަސައްކަތް ކުރަނީ ބަސްބުނުމުގެ މިނިވަންކަން ހުއްޓުވަން ކަމަށް ކުރީގެ ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.
މަޖިލިސް އިންތިހާބުގެ ކެމްޕެއިނުގައި ނ. ކެނދިކުޅުދޫއަށް ވަޑައިގެން އެ ރަށުގެ ރައްޔިތުންނާ މުހާތަބުކޮށް ވާހަކަ ދައްކަވަމުން ސޯލިހު ވިދާޅުވީ އެމަނިކުފާނުގެ ސަރުކާރަށް ވެސް ރައްޔިތުންގެ ފާޑުކިޔުން އަމާޒުވި ކަމަށެވެ. ސޯލިހު ވިދާޅުވީ އެ ފާޑުކިޔުންތަކަށް ރައްދު ދިނުމުގެ ބަދަލުގައި ނިމިދިޔަ ސަރުކާރުން ފާޑުކިޔުންތައް ބަލައިގަތީ ކަމަށެވެ.
"ރައްދެއް ނުދެން، ރައްޔިތުން ކަމަށްވާތީ ދައްކާ ވާހަކަ އަޑުއަހައިގެން ރަނގަޅު ކުރަންޖެހޭ ކަމެއް ވެއްޖިއްޔާ ރަނގަޅުކޮށް ހިދުމަތް ކުރަމުން އަޅުގަނޑުމެން ގެންދިޔައީ،" ސޯލިހު ވިދާޅުވި އެވެ.
ސޯލިހު ވިދާޅުވީ މި ސަރުކާރުން އެންމެ ފުރަތަމަ ވެސް ކުރި ކަމަކީ ބަސް ބުނުމުގެ މިނިވަންކަން ހިފެހެއްޓުން ކަމަށެވެ.
"އެހެންނަމަވެސް، މިއަދު ވެރިކަމުގެ ތިއްބެވި ބޭފުޅުންނަށް އެކަންތައްތަކެއް ބަލައެއް ނުގަނެވޭ. ފުރަތަމަ ވެސް ކުރެއްވި ކަމަކީ ހިޔާލުފާޅުކުރުމުގެ މިނިވަންކަމަށް، ބަސްބުނުމުގެ މިނިވަންކަން ހުއްޓުމަކަށް ގެނައުމަށް މަސައްކަތް ކުރެއްވީ،" ސޯލިހު ވިދާޅުވި އެވެ.
ޑިސެމްބަރު މަހު ސަރުކާރަށް ފާޑުކިޔާ ދެ ވެބްސައިޓެއް އަދި ރަޖިސްޓްރީ ކޮށްގެން ހިންގާ ނޫހެއް ބްލޮކު ކުރި މައްސަލައަށް އިޝާރާތް ކުރައްވާ ސޯލިހު ވިދާޅުވީ، ސަރުކާރުގެ އެ ނިންމުން އަނބުރާލީ އިދިކޮޅާއި ބޭރުގެ ފަރާތްތަކުގެ ޕްރެޝަރުން ކަމަށެވެ.
ނަމަވެސް އަނެއްކާވެސް ނޫސްތަކާއި ސައިޓުތަކަށް ފިޔަވަޅު އަޅާނެ ކަމުގެ އަޑުތަކެއް އިވެމުންދާ ކަމަށާއި އެކަން ހުއްޓުވަން މަޖިލީހުގައި މިހާރު ވެސް އޮތް އެމްޑީޕީގެ މެޖޯރިޓީ، އޭޕްރީލް 21، ގައި އޮންނަ އިންތިހާބަށްފަހު ވެސް އޮންނަން ޖެހޭ ކަމަށް ސޯލިހު ވިދާޅުވި އެވެ.
ރައީސުލްޖުމްހޫރިއްޔާގެ އޮފީހުން ހުށަހެޅި ޝަކުވާތަކަކަށްފަހު، ރަޖިސްޓްރީނުކޮށް ހިންގާ ނޫސްތަކެއް ކަމަށްވާ ކުރުސީ، ދިޔަވަރު އަދި ދޮންއަމާއަށް ފިޔަވަޅު އަޅާނެ ކަމަށް މޯލްޑިވްސް މީޑިއާ ކައުންސިލުން ވަނީ ފެބްރުއަރީ 15، ގައި ބުނެފަ އެވެ.
"މަތީގައި ދެނެންވުނު ވެބްސައިޓްތަކާ ގުޅޭ ގޮތުން މި ކައުންސިލަށް ލިބިފައިވާ ބައެއް ޝަކުވާތަކަށް ބަލާއިރު ހަގީގަތާ ހިލާފު މައުލޫމާތު ހުރިކަން މިހާތަނަށް ވަނީ ފާހަގަ ކުރެވިފަ. އެ މައްސަލަތައް ބަލަމުން އަންނަ ވަރަކަށް މި ކައުންސިލްގެ ނިންމުންތައް އާންމު ކުރަމުން ގެންދާނެ ވާހަކަ ދަންނަވަން،" އެދުވަހު ކައުންސިލުން ނެރުނު ބަޔާނުގައި ބުނެފައިވެ އެވެ.
