ރައްޔިތުންގެ މަޖިލީހުގައި 33 ޕަސަންޓު އަންހެނުންނަށް ތަމްސީލުކުރެވޭނެ އިސްލާހެއް އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ހުށަހަޅުއްވައިފި އެވެ.
ރޮޒައިނާ ވިދާޅުވީ މަޖިލީހުގައި 33 ޕަސަންޓުގެ ކޯޓާއެއް ކަނޑައެޅުމަށް ގާނޫނު އަސާސީއަށް އިސްލާހެއް ހުށަހަޅުއްވާފައި ވަނީ އެމްޑީޕީގެ އަންހެނުންގެ ވިންގުން ގަބޫލުކުރާ ގޮތުގައި އެއީ މަޖިލީހުގައި އަންހެނުންގެ އަދަދު އިތުރު ކުރުމަށް ކޮންމެހެން އަޅަން ޖެހޭ ފިޔަވަޅެއް ކަމަށް ދެކޭތީ ކަމަށެވެ.
މި މައްސަލާގައި މަޖިލީހުގެ ހުރިހާ މެމްބަރުންގެ ތާއީދު ލިބޭނެ ކަމަށް އުންމީދު ކުރައްވާ ކަމަށް ވެސް ރޮޒޭނާ ވަނީ ވިދާޅުވެފަ އެވެ.
ރޮޒޭނާ އިސްލާހު ހުށަހަޅުއްވާފައި ވަނީ ގާނޫނު އަސާސީގެ 71 ވަނަ މާއްދާގެ ށ. ގެ ފަހަތަށް އަކުރުތަކެއް އިތުރު ކުރުމަށެވެ.
އެގޮތުން އެ މާއްދާގެ (ހ) ގެ ދަށުން 33 ޕަސަންޓު ހާއްސަ ކުރަންވާނީ އަންހެނުންނަށް ކަމަށާއި، އެ މާއްދާގެ (ނ) އިން މެމްބަރުން އިންތިހާބު ކުރާނެ ދާއިރާތައް ކަނޑައަޅަންވާނީ ގުރުއަތުލައިގެން ކަމަށެވެ.
މަޖިލިސް އިންތިހާބުގައި އަންހެން މެމްބަރުން އިންތިހާބު ކުރާނެ ދާއިރާ ކަނޑައަޅާނީ 71 ވަނަ މާއްދާގެ ހ. ގެ ދަށުން ކަނޑައަޅާ ދާއިރާތައް ހަމަވާނެ އުސޫލަކުން ދައުރުވަމުންދާ ގޮތަށް ކަމަށާއި، އަދި އެ އުސޫލު ކަނޑައަޅާނެ ގޮތް ގާނޫނަކުން ބަޔާން ކުރަން ޖެހޭނެ ކަމަށް އިސްލާހުގައި ބުނެފައިވެ އެވެ.
މީގެއިތުރުން އެ މާއްދާގެ ހ. ގެ ދަށުން ކަނޑައަޅާ އެންމެހާ ދާއިރާތައް އެ މާއްދާގެ ނ. ގައި ބަޔާންކުރާ ކޯޓާގެ ދަށުން ތަމްސީލުވެ ނިމުމުން، އެ އަކުރުގައިވާ ނިސްބަތުން އަންހެނުން ދެން އިންތިހާބު ކުރުމާމެދު ރައްޔިތުންގެ މަޖިލީހުން ގޮތެއް ކަނޑައަޅަންވާނެ ކަމަށް އިސްލާހުގައި ބުނެފައިވެ އެވެ.
މި އިސްލާހު ފާސްވެއްޖެނަމަ ގާނޫނަށް އަމަލު ކުރުމަށް ހުށަހަޅާފައި ވަނީ 2029 ވަނަ އަހަރު އޮންނަ މަޖިލިސް އިންތިހާބުން ފެށިގެންނެވެ.
