ރައްޔިތުންގެ މަޖިލީހުގެ ޖަލްސާތައް ނުބާއްވާތީ ދަ ޑިމޮކްރެޓްސްގެ ރައީސް އަދި ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ މެންބަރު ހަސަން ލަތީފު ކަންބޮޑުވުން ފާޅުކުރައްވައިފި އެވެ.
މަޖިލީހުގެ ޖަލްސާއެއް އެންމެ ފަހުން ބޭއްވީ މިދިޔަ ހަފުތާގެ ބުދަ ދުވަހު އެވެ. އޭގެ ފަހުން މަޖިލީހުގެ ޖަލްސާއެއް އެޖެންޑާ ކޮށްފައެއް ނުވެ އެވެ.
މިކަމާ ގުޅިގެން އެކްސް އެކައުންޓުން ކުރެއްވި ޕޯސްޓެއްގަިއ ހަސަން ލަތީފު ވިދާޅުވީ، މަޖިލީހުގެ ޖަލްސާތައް ނުބާއްވައި ތިއްބެވުމަކީ ބަލައިގަނެވޭނެ ކަމެއް ނޫން ކަމަށާއި މަޖިލީހުގެ ގަވާއިދުގައިވާ ގޮތުގެ މަތީން ޖަލްސާތައް ބާއްވަންޖެހޭނެ ކަމަށެވެ.
"ޖަލްސާތައް ނުބާއްވަން ޕީޖީ ލީޑަރުން މަޖިލީހުގެ ރައީސަށް ލަފައެއް ނުދެއްވޭނެ، މަޖިލީހުން ނިންމާންޖެހޭ އެތައް ބައިވަރު މަސައްކަތެއް އެބަހުރި"
މަޖިލީހުގައި ތިންވަނައަށް އެންމެ މެންބަރުން ގިނަ ޕާޓީގެ ރައީސް މިފަދައިން ކަންބޮޑުވުން ފާޅުކުރައްވާފައި ވާއިރު މަޖިލީހުގެ ޑިރެކްޓާ އޮފް ކޮމިއުނިކޭޝަން ހަސަން ޒިޔާއު ވިދާޅުވީ ޖަލްސާތައް ނުބާއްވަނީ ޕާޓީތަކުގެ ޕީޖީ ލީޑަރުންނާ މަޝްވަރާކޮށްފައި ކަމަށެވެ. ޕީޖީ ލީޑަރުން މަޖިލީހުގެ ރައީސަށް ލަފާދިނީ ކޮންމެ ދުވަހަކު ޖަލްސާ ނުބާއްވާން ކަމަށް ވެސް އޭނާ ވިދާޅުވި އެެވެ.
އެހެން ނަމަވެސް މި ހަފުތާގެ ބުދަ ދުވަހުވެސް މަޖިލީހުގެ ޖަލްސާއެއް އޮންނާނެ ކަމަށްވެސް ޒިޔާއު ވިދާޅުވި އެވެ.
