ވިލާ ކޮލެޖުން މި އަހަރު ދޫކުރާ ރިސާޗު ގްރާންޓު އިފްތިތާހުކޮށްފި އެވެ.
މިއަދު ވިލާ ކޮލެޖުގައި ބޭއްވި ރަސްމިއްޔާތެއްގައި މި ގްރާންޓް އިފްތިތާހުކޮށްދެއްވީ އެ ކޮލެޖުގެ ރިސާޗް އެންޑް އިނޮވޭޝަން، ޑެޕިޔުޓީ ވައިސް ރެކްޓަރު ޑރ. މުހައްމަދު އާދިލް އެވެ.
ވިލާ ކޮލެޖުން ބުނީ މިއީ އެ ކޮލެޖުގެ މުވައްޒަފުން ރިސާޗު ކުރުމަށްޓަކައި ފަސް ލައްކަ ރުފިޔާއާ ހަމައަށް ދޫކުރާ ގްރާންޓެއް ކަމަށާއި މި ގްރާންޓަކީ ވިލާ ކޮލެޖާއިގެ ފުލްޓައިމް ސްޓާފުންނަށް ހާއްސަކޮށް ހުޅުވާލެވޭ ފުރުސަތެއް ކަމަށެވެ.
ނަމަވެސް ޖޮއިންޓް އެޕްލިކޭޝަންތަކަށް ވަރަށް ބޮޑަށް ހިތްވަރުދީ، ވިޒިޓިންގް ސްކޮލަރުންނާއި، ލޯކަލް އަދި އިންޓަނޭޝަނަލް ޔުނިވާސިޓީ ނުވަތަ އިންސްޓިޓިއުޝަންތަކާއި، އިންޑަސްޓްރީ ޕާޓްނަރުންނާއި، ސިވިކް ސޮސައިޓީ އަދި އެހެނިހެން ފަރާތްތައް ހިމެނޭ ކޮލަބަރޭޓިވް ގްރާންޓް ޕްރޮޕޯސަލްސް ހުށައެޅުމުގެ ފުރުސަތު އޮންނާނެ ކަމަށް ވެސް ވިލާ ކޮލެޖުން ބުނެ އެވެ.
"ކިތަންމެ ކުޑަ ރިސާޗަކަށް ވިއަސް ހަރަދުތަކެއް ކުރަން ޖެހޭ، ރިސާޗު ގްރާންޓު ސްކީމު އިފްތިތާހު ކުރީ މި ކަންކަމަށް ފަސޭހަކޮށް ދިނުމަށް،" ޑރ. އާދިލް ވިދާޅުވިއެވެ.
ވިލާ ކޮލެޖުން މި އަހަރު ދޫކުރާ ރިސާޗު ގްރާންޓު އިފްތިތާހު ކުރުމުގެ ތެރެއިން -- ފޮޓޯ: ވިލާ ކޮލެޖު
ރިސާޗު ގްރާންޓުގެ މަގުސަދަކީ ވިލާ ކޮލެޖުގެ ދިރާސާގެ ގާބިލްކަން އިތުރުކުރުމަށްކަން ފާހަގަކޮށް އެ ކޮލެޖުން ބުނީ، ދުނިޔޭގެ ދެމެހެއްޓެނިވި ލަނޑުދަނޑިތަކާ އެއްގޮތަށް ހަގީގީ ދުނިޔޭގެ ގޮންޖެހުންތައް ހައްލުކުރުމަށް އެހީތެރިވެދޭ މަޝްރޫއުތަކަށް އެހީތެރިވާނެ ކަމަށެވެ.
ރިސާޗު ގްރާންޓްއަށް އެދޭ ފަރާތްތަކުން އެމީހުންގެ ދިރާސާގެ މުހިންމުކަމާއި، އަމާޒުކޮށްފައިވާ އެސްޑީޖީތަކާއި ގުޅުންހުރި ކަންކަން ބަޔާންކޮށް ފުރިހަމަ ޕްރޮޕޯސަލް ހުށަހެޅުމަށް ވިލާ ކޮލެޖުން ވަނީ އެދިފަ އެވެ.
ރިސާޗުގެ ޕްރޮޕޯސަލް ހުށަހެޅުމުގެ ސުންގަޑި އެޕްރިލް 30، ވާ އަންގާރަ ދުވަހުގެ ނިޔަލަށް ހުޅުވާލާފައިވާއިރު، އޭގެ ކުރިން ރިސާޗަށް ޕްރޮޕޯޒަލް ހުށަހެޅުމާ ގުޅޭ ގޮތުން ސްޓާފުންނަށް އެޕްރިލް މަހުގެ ފުރަތަމަ ހަފްތާގައި ސެޝަނެއް ކުރިޔަށް ގެންދާނެ ކަމަށް ވިލާ ކޮލެޖުން ވަނީ ބުނެފަ އެވެ.
ވިލާ ކޮލެޖުން ބުނީ، ގްރާންޓްތައް ދޫކުރާ ފަރާތްތައް ކަނޑައަޅާނީ އިވަލުއޭޝަންތަކެއް ހެދުމަށްފަހު ކަމަށާއި، މިކަމާ ގުޅޭ މައުލޫމާތުތައް ކުރިޔަށް އޮތް ދުވަސްތަކުގައި ސްޓާފުންނަށް ކިޔައިދޭނެ ކަމަށެވެ.
ވިލާ ކޮލެޖުން އަންނަނީ ރާއްޖޭގެ ތައުލީމީ ނިޒާމަށް ކުރިއެރުން ގެނެސްދޭ މިފަދަ ގިނަ ކަންތައްތަކެއް އިންތިޒާމުކޮށްގެން ހިންގަމުންނެވެ.
