ކްރެޑިޓަށް ދޫކުރި ތެލާއި ގަނޑުފެނަށް މަސްވެރިން ދައްކަން ޖެހޭ ފައިސާ ހިމަނައިގެން، މިފްކޯއިން މަސްވެެރިންނަށް ދޫކުރި ޖުމްލަ ފައިސާ 422 މިލިޔަން ރުފިޔާ އަށް އަރާ ކަމަށް ފިޝަރީޒް މިނިސްޓަރު އަހުމަދު ޝިޔާމް މިއަދު ވިދާޅުވެއްޖެ އެެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވަޒީރުންނާ ސުވާލުކުރުމުގެ ވަގުތުގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރު ވިދާޅުވީ ނޮވެމްބަރު 17، 2023، (ރައީސް ޑރ.މުހައްމަދު މުއިއްޒުގެ ސަރުކާރު އުފެދުނު ފަހުން) މިހައިތަނަށް މަސްވެރިންނަށް ދޫކުރަންޖެހޭ ފައިސާގެ ތެރެއިން 422 މިލިޔަން ރުފިޔާ ދޫކުރި ނަމަވެސް އަދި ވެސް 270 މިލިޔަން ރުފިޔާ ނުދެވި އެބަ އޮތް ކަމަށެވެ.
މަސްވެރިންނަށް 422 މިލިޔަން ރުފިޔާ ހަމަކުރީ މިފްކޯއިން މަސްވެރިންނަށް ދޫކޮށްފައިވާ ތެލާއި ގަނޑުފެނަށް ދައްކަން ޖެހޭ އަގު ހިމަނައިގެން ކަމަށް ވިދާޅުވި ނަމަވެސް، މަހުގެ އަގުގެ ގޮތުގައި މަސްވެެރިންނަށް ދޫކުރީ ސީދާ ކިހާ ފައިސާއެއް ކަން މިނިސްޓަރު ވިދާޅެއް ނުވެ އެވެ.
"މިހައިތަނަށް މި ސަރުކާރުން 422 މިލިޔަން ރުފިޔާ ވަނީ މަސްވެރިންނަށް ޕޭކޮށްފައި. އެއީ މަސްވެރިނަށް ކްރެޑިޓަށް ދޫކުރެވިފައި ހުރި ތެލާ އައިސް ހިމެނޭ ގޮތަށް 422 މިލިޔަން ރުފިޔާ މަސްވެރިންނަށް މިސަރުކާރުން ދޫކުރެވިފައި އެބަ ވޭ. އަދި މިސަރުކާރުން އަޅުގަނޑުމެން މިއަދު ގުނާ އިރުގައި 270 މިލިޔަން ރުފިޔާ މިއަދާ ހިސާބަށް މަސްވެރިންނަށް ނުދެވި އޮތްކަން އަޅުގަނޑުމެން ފާހަގަކުރަން،" ޝިޔާމް ވިދާޅުވި އެވެ.
ޝިޔާމް ވިދާޅުވީ ރައީސް މުއިއްޒު ވެރިކަމަށް ވަޑައިގެންނެވި އިރު 250 ރުފިޔާ މަސްވެރިންނަށް ދޫނުކޮށް އޮތް ކަމަށެވެ. އަދި ކުރީ ސަރުކާރުން މަސް ގަންނަ އަގު މިދިޔަ އަހަރުގެ ސެޕްޓެމްބަރު 16، ގައި 25ރ. އަށް ބޮޑުކުރި ފަހުން އެ ސަރުކާރުގެ ދައުރު ނިމުމާ ހަމައަށް އެ އަގުގައި އެއްވެސް މަސް ދޯންޏަކަށް ފައިސާ ދީފައި ނުވާ ކަމަށް އޭނާ ވިދާޅުވި އެވެ.
"އަަޅުގަނޑުމެން އަދިވެސް މިއުޅެނީ އެ އުދަނގުލުން އަރައިނުގަނެގެން،" ޝިޔާމް ވިދާޅުވި އެވެ.
މިހެން ނަމަވެސް މާ ލަސްތަކެއް ނުވެ އެ އުދަނގުލުން އަރައިގަނެވޭނެ ކަމަށާއި މަސްވެރިންނަށް ދޭން އޮތް ފައިސާގެ ބެކްލޮގް ފިލުވައިލާނެ ކަމަށް ވެސް މިނިސްޓަރު ވިދާޅުވި އެވެ. ހަމައެހެންމެ 48 ގަޑިއިރުގެ ތެރޭގައި މަސްވެރިން ކިރާ މަހަށް ފައިސާ ދޭން ވެފައިވާ ވައުދު ވެސް ފުއްދަވައިދެއްވާނެ ކަމުގެ ޔަގީންކަން އޭނާ ދެއްވި އެވެ.
