ރާއްޖޭގައި ތިބި އިންޑިއާ ސިފައިން ބޭލުމުގެ އިހުލާސްތެރި ނިޔަތެއް ސަރުކާރުގައި އެބަ އޮތްތޯ، އެ މަސައްކަތް އެ ގޮތުގައި އެބަ ކުރޭތޯ؟ "އިންޑިއާ އައުޓް" ކެމްޕޭންގެ އެންމެ އިސްކޮށް ހުންނެވި ކުރީގެ ރައީސް އަބްދުالله ޔާމީން ރޭ ވިދާޅުވެއްޖެ އެވެ.
އެމަނިކުފާނު އުފެއްދުމަށް މަސައްކަތް ކުރައްވާ, ޕީޕަލްސް ނެޝަނަލް ފްރަންޓު (ޕީއެންއެފް) އޮފީހުގައި ބޭއްވި ޖަލްސާގައި ވާހަކަ ދެއްކެވި ބޭފުޅުންނާ ސުވާލު ކުރައްވަމުން ޔާމީން ވިދާޅުވީ ރައްޔިތުންނާ ގުޅޭ ބޮޑެތި ކަންކަމުގައި ހުންނަން ވާނީ އެއް މިނެއްގައި އެއް އަމާޒަކަށް ކަމަށެވެ.
އެ ފާހަގަ ކުރެއްވީ އިންޑިއާ ސިފައިން ބޭލުމާ ގުޅޭ ވާހަކަތަކާއި ތާރީހުތައް ވެސް ބަދަލު އަންނަ ވާހަކަ އެވެ.
ރާއްޖޭގެ ތިން ސަރަހައްދެއްގައި ތިބި އިންޑިއާ ސިފައިންގެ ތެރެއިން އެއް ބަޔަކު މާޗު 10 ގެ ކުރިން ބާލަން ހުށަހަޅާފައިވާއިރު، ބާކީ ތިބި މީހުން ބާލަން ހުށަހެޅީ މެއި 10ގެ ކުރިންނެވެ. މި ސަރުކާރުން ކުރިން ހުށަހެޅީ މާޗު 15 ގެ ކުރިން އިންޑިއާގެ ހުރިހާ ސިފައިން ރާއްޖޭން ބޭލުމަށެވެ.
ރާއްޖޭގައި ތިބި އިންޑިއާ އަސްކަރީންގެ ބަދަލުގައި، މަދަނީން ގެންނަ ވާހަކަ ދެއްކި ނަމަވެސް، އެއީ އެކަން ހިނގާނެ ގޮތް ނޫން ކަމަށް ޔާމީން ފާހަގަ ކުރެއްވި އެވެ.
"އަޅުގަނޑަށް މީގައި ވިސްނިގެން މިއުޅެނީ، އެކަން އެހެނެއް ނުވާނެއޭ. ހަމަ އެ އުޅެނީ އަސްކަރީ މީހުންނޭ. އަސްކަރީ މީހުން ޔުނިފޯމު ބާލައިގެން އާންމުންގެ ގޮތުގައި އުޅެފާނޭ. އެހެންވީމާ އެގޮތަށް މި ދަނީ،" ޔާމީން ވިދާޅުވި އެވެ.
"އިންޑިއާ އައުޓުގެ ވާހާކަ ދެއްކުމުގައި އަޅުގަނޑުމެންގެ އަނގަތައް މި ވަނީ ފަހައިލާފައި، ހުރިހާ ހަރަކާތެއް ހުއްޓުވާލާފައި."
މި ސަރުކާރުގެ ބޭފުޅުން އިދިކޮޅުގައި ތިއްބެވިއިރު ކުރިއަށްގެންދިޔަ "އިންޑިއާ އައުޓް" ކެމްޕޭން ހުއްޓުވުމަށް އަމާޒުކޮށް "އެކިއެކި ޝިއާރުތަކުގެ ދަށުން ވަކިވަކި ގައުމުތަކާ މެދު ނަފުރަތު އުފެއްދުމަށް ރާވައިގެން ހިންގާ ހަރަކާތްތައް ހުއްޓުވުން" ނަމުގައި އޭރުގެ ރައީސުލްޖުމްހޫރިއްޔާ ނެރުއްވި ގަރާރު ބާތިލުނުކުރާތީ ޔާމީން ރޭ ވެސް ކަންބޮޑުވުން ފާޅުކުރެއްވި އެވެ.
"އިންޑިއާ އައުޓް" އެ ހަރަކާތަކީ އެއްވެސް ޖާއިޒު މަގުސަދެއް ނެތި ސިޔާސީ ބޭނުމެއްގައި ވަކި ގައުމަކާ ދެކޮޅަށް ރޭވިގެން ހިންގާ ކެމްޕޭނެއްގެ ގޮތުގައި ސިފަކޮށް އޭރުގެ ރައީސް އިބްރާހިމް މުހައްމަދު ސޯލިހު ސޮއިކުރައްވައި ރިޔާސީ ގަރާރެއް ނެރުއްވީ އެޕްރީލް 21, 2022 ގަ އެވެ.
"އެހެންވެ މި ކަންކަމަށް ބަލާކަމުގައި ވަންޏާ ކިހާ ވަރެއްގެ ނިޔަތެއް، އިހުލާސްތެރިކަމެއް އެބަ އޮތްތޯ އިންޑިއާ ސިފައިން ބޭލުމުގެ ކަންކަން ކުރުމުގައި،" ޔާމީން ކުރެއްވި ސުވާލުގައި ވިދާޅުވި އެވެ.
އެ ގަރާރު ނެރުނު ދުވަހު މިހާރުގެ ރައީސް ޑރ. މުހައްމަދު މުއިއްޒު އާއި އެމަނިކުފާނުގެ ހާއްސަ އެޑްވައިޒަރު އަބްދުރަހީމް އަބްދުالله އާއި ޑިފެންސް މިނިސްޓަރު ގައްސާން މައުމޫން އަދި ލޯކަލް ގަވަމެންޓު މިނިސްޓަރު އާދަމް ޝަރީފް ނޫސްވެރިންނާ ބައްދަލުކުރެއްވި އެވެ.
އޭރު އިދިކޮޅުގައި ތިއްބެވި މިހާރު ސަރުކާރުގެ ބޭފުޅުން އެ ގަރާރު ގާނޫނާ ހިލާފު ކަމަށް ގަބޫލުކުރެއްވީ، އެ ގަރާރުގެ ސަބަބުން ގާނޫނު އަސާސީން ކަށަވަރުކޮށްދީފައިވާ ހިޔާލު ފާޅު ކުރުމާއި އެއްވެ އުޅުމުގެ މިނިވަން ކަމާއި ސިޔާސީ ހަރަކާތް ހިންގުމުގެ ހައްގު ހަނި ކުރެވިގެންދާތީ ކަމަށް ބުނެ އެވެ.
އިންޑިއާ ސިފައިން ރާއްޖެއިން ބޭލުމުގެ ވާހަކަ ދައްކަވަމުން، ރުންކުރުވެގެން ކަންކަން ހާސިލު ނުކުރެވޭނެ ކަމަށް މިދިޔަ ހަފުތާގައި ތ. އަތޮޅަށް ކުރެއްވި ދަތުރުގައި ރައީސް ޑރ. މުއިއްޒު ވިދާޅުވި އެވެ.
