ރޯދަމަހުގެ ތެރޭގައި އިންތިހާބެއް ބާއްވަން ޖެހޭ ގޮތަށް ދިމާވާ ހާލަތްތަކުގައި ރޯދަ މަސް ނިމޭތާ 10 ދުވަސް ފަހުން އިންތިހާބު ބާއްވަންޖެހޭ ގޮތަށް ހުށަހެޅި ބިލު މަޖިލީހުން ފާސްކޮށްފި އެވެ.
އިންތިހާބާ ބެހޭ އާންމު ގާނޫނަށް އިހަވަންދޫ ދާއިރާގެ މަޖިލިސް މެންބަރު، މުހައްމަދު ޝިފާއު އިސްލާހު ހުށަހަޅާފައި ވަނީ އިންތިހާބެއް ރޯދަ މަހާ ދިމާވާނަމަ، އެ އިންތިހާބެއް ބޭއްވުން ރޯދަމަސް ނިމުމަށްފަހު 10 ދުވަސް ފަހުން ބާއްވާ ގޮތަށް ބަދަލު ކުރުމަށެވެ.
އެ ބިލު މަޖިލީހުން މިއަދު ފާސްކުރީ ބިލު ދިރާސާ ކުރަން އެކުލަވައިލި ހާއްސަ ކޮމެޓީން ފާސްކުރި ގޮތަށް އިތުރު އެއްވެސް އިސްލާހެއް ނުގެނެހެވެ. ބިލު ފާސްކުރަން 46 މެމްބަރުން ވޯޓު ދެއްވިއިރު ބިލާ ދެކޮޅަށް ތިން މެމްބަރުން ވޯޓު ދެއްވި އެވެ.
ޝިފާއު ހުށަހެޅި ބިލު ދިރާސާ ކުރީ އެކަމަށް އެކުލަވައިލި ފަސް މެންބަރުންގެ ހާއްސަ ކޮމެޓީއަކުންނެވެ.
ޖުމުލަ 15 މާއްދާގެ މައްޗަށް އެކުލެވޭ އެ ބިލު ދިރާސާ ކުރުމުގެ މަރުހަލާގެ ތެރެއިން އިލެކްޝަންސް ކޮމިޝަންގެ މެމްބަރުން ހާޒިރު ކުރުމުން އޮންލައިންކޮށް އެ ބައްދަލުވުމަށް ހާޒިރުވި އީސީގެ ނައިބު އިސްމާއީލް ހަބީވު ވިދާޅުވީ މި އަހަރުގެ ރައްޔިތުންގެ މަޖިލީހުގެ އިންތިހާބު ރޯދައިގެ 10 ދުވަސް ފަހުން ބާއްވައިފިނަމަ, ވޯޓު ގުނުމަށްފަހު ދާއިމީ ނަތީޖާ އިއުލާނުކޮށް, އިންތިހާބުގެ ހުރިހާ ކަމެއް ނިންމަން ލިބޭ މުއްދަތު ވަރަށް ކުރުވާ ކަމަށެވެ.
އޭނާ ވިދާޅުވީ އޭޕްރީލް 28 ވަނަ ދުވަހާ ހަމައަށް އިންތިހާބުގެ ހުރިހާ ކަމެއް ނިމި, އަންގަން ޖެހޭ މުއައްސަސާތަކަށް އަންގާފައި އޮންނަންޖެހޭ ކަމަށެވެ. އެހެންކަމުން އޭޕްރީލް 21 ގައި އިންތިހާބު ބާއްވައިފިނަމަ ވޯޓު ގުނުމަށް ލިބެނީ ހަ ދުވަހުގެ މުއްދަތު ކަމަށެވެ.
ގާނޫނު އަސާސީގައި ވަނީ ރައްޔިތުންގެ މަޖިލީހުގެ ދައުރު ހަމަވުމުގެ 30 ދުވަސް ކުރިން އައު މަޖިލީހުގެ މެންބަރުން އިންތިހާބުކޮށް ނިންމަން ޖެހޭ ކަަމަށެވެ. އެ ގާނޫނަށް ރިއާއަތްކޮށް އިއްޔެ ހަބީބް ވިދާޅުވީ އިންތިހާބު ފަސް ކުރާނަމަ، އިންތިހާބަށްފަހު ކަމެއް ހިނގައިފި ހާލަތެއްގައި އެކަން ހައްލު ކުރުމަށް ކޮންމެވެސް ވަރެއްގެ މުއްދަތެއް ލިބިފައި އޮތުމަކީ މުހިންމު ކަމެއް ކަމަށެވެ.
އެ ކޮމެޓީން ބިލަށް އިސްލާހު ގެނެސްފައި ވަނީ އިލެކްޝަނުން އެ ކޮމެޓީއަށް ލިޔުމުން ހުށަހެޅި އިސްލާހުތަކާއި ކޮމެޓީގެ މެންބަރުންގެ ހުށަހެޅުއްވި ހުށަހެޅުންތަކަށް ރިއާއަތް ކުރުމަށްފަހު އެވެ.
އެގޮތުން އެ ބިލުގެ 4 ވަނަ މާއްދާގެ (ށ) އާއި 43 ވަނަ މާއްދާގެ (ރ) ގެ އިތުރުން 67 ވަނަ މާއްދާގެ (ހ) އަށާއި 74 ވަނަ މާއްދާގެ (ހ) އާއި (މ) އަށް އިސްލާހު ގެނައުމަށް ކޮމެޓީން ފާސްކުރި އެވެ.
ރައްޔިތުންގެ މަޖިލީހުގެ އިންތިހާބު ބާއްވަން އިލެކްޝަންސް އިން ކަނޑައަޅާފައިވާ ތާރީހަކީ މާޗު 17 އެވެ. އެއީ ރޯދަމަހުގެ ހަތްވަނަ ދުވަހެވެ. ރޯދަމަހުގެ ތެރޭގައި އިންތިހާބު ބާއްވައިފިނަމަ، ވޯޓުލާން ނުކުންނަ މީހުންގެ އަދަދު މަދުވެދާނެ ކަމުގެ ކަންބޮޑުވުން ޕާޓީތަކުންނާއި އާންމު ފަރުދުން ވަނީ ފާޅުކޮށްފަ އެވެ.
ރޯދަ މަހުގެ ފަހުން މަޖިލިސް އިންތިހާބު ބޭއްވުމަށް ގާނޫނަށް އިސްލާހު ގެނެސްފިނަމަ އެކަން ކުރުމަށް ތައްޔާރަށް ތިބިކަމަށް އިލެކްޝަންސް ކޮމިޝަނުން ހާމަ ކޮށްފައިވެ އެވެ. އަދި ރޯދަ މަހުގެ ފަހުން އިންތިހާބު ބާއްވާނަމަ، ވޯޓު ލާން ނުކުންނަ މީހުންގެ އަދަދުވެސް ގިނަ ވާނެ ކަމަށް އެ ކޮމިޝަނުން ލަފާ ކުރެ އެވެ.
އިންތިހާބުތަކާ ބެހޭ އާންމު ގާނޫނަށް މަޖިލީހުން މިއަދު ގެނައި އިސްލާހާއެކު މަޖިލިސް އިންތިހާބު ދެން ބާއްވަންޖެހޭނީ އަންނަ އޭޕްރިލް މަހުގެ 20 ވަނަ ދުވަހަށްފަހު އެވެ.
