ވާދަވެރިޔާގެ ނަން އަނބުރާ ގެންދިޔުމުން، ދަ ޑިމޮކްރެޓްސްގެ ޒުވާނުންގެ ގޮފި, ޔަންގް ޑެމްސްގެ ރައީސްގެ މަގާމަށް މުހައްމަދު މާސިހު އިންތިހާބުވެއްޖެ ކަމަށް އެ ޕާޓީން މިއަދު އިއުލާނުކޮށްފި އެވެ.
އިންތިހާބުގައި ވޯޓު ލާންޖެހޭ އަދަދަށް ވުރެ ގިނައިން ވޯޓު ކަރުދާސް ދޫކޮށްގެން މައްސަލަ ދިމާވި ފޮށިތަކުގެ ވޯޓު ބާތިލުކޮށް، މައްސަލަ ހައްލުނުކުރެވި އެތައް ދުވަހެއް ވެފައި ވަނިކޮށް އެ މަގާމަށް ވާދަކުރި ޔޫސުފު ޝާހު ވަނީ ނަން އަނބުރާ ގެންގޮސްފަ އެވެ.
ޑިސެމްބަރު 2، 2023، ގައި ބޭއްވި ޑިމޮކްރެޓްސްގެ އެތެރޭގެ އިންތިހާބު އިންތިޒާމު ކުރުމުގައި ހަރަކާތްތެރިވި ފަރާތްތަކަށް ހެދިފައިވާ ގޯހަކުން ބައެއް ފޮށިތަކަށް ވޯޓުލާން ޖެހޭ މިންވަރަށް ވުރެ ގިނައިން ވޯޓު ކަރުދާސް ދޫކުރެވިފައިވާތީ ޔަންގް ޑެމްސްގެ ލީޑަރު އިންތިހާބުކުރުމަށް ލި ވޯޓުތައް ވަނީ ބާތިލުކޮށްފަ އެވެ. ބާތިލު ކުރި ވޯޓުގެ ނަތީޖާ އޮތް ގޮތުން ކުރި ހޯދީ ޝާހެވެ.
ނަމަވެސް އިތުރަށް ވޯޓު ކަރުދާސް ދޫކުރެވިފާ ކަމަށް ބުނެ އެ ވޯޓު ބާތިލުކުރިތާ ދެ މަސް ދުވަސް ފަހުން ބާތިލުކުރި ބައިތަކުގެ ވޯޓުލުން އަލުން އޮންނާނެ ދުވަހެއް އިއުލާނު ކުރުމެއް ނެތި، އެ މަގާމުތައް ނުލައި ޕާޓީ ރައީސް ވަނީ ކައުންސިލް އެކުލަވާލައިފަ އެވެ.
އެކަމާ ޒުވާން މެންބަރުން ނުރުހުން ފާޅު ކުރަމުން ދަނިކޮށް ޑިމޮކްރެޓްސްއިން ފަހުން ވަނީ ބާތިލުކުރި ވޯޓުތައް ފެބްރުއަރީ މަހުގެ 17، ގައި ބާއްވާނެ ކަމަށް އިއުލާނުކޮށްފަ އެެވެ.
ނަމަވެސް އެ ޕާޓީން މިއަދު ކުރި އިއުލާނެއްގައި ބުނީ ޕާޓީގެ ޔަންގް ޑިމޮކްރެޓްސްގެ ލީޑަރުކަމަށް ކުރިމަތިލާފައިވާ ދެ ކެންޑިޑޭޓުންގެ ތެރެއިން، ޔޫސުފް ޝާހްގެ ނަން އަނބުރާ ގެންގޮސްފައިވާތީ، އެމަގާމަށް ވާދަކުރި ދެވަނަ ކެންޑިޑޭޓު މާސިހު އޮޓަމެޓިކުން އިންތިހާބުވެފައިވާ ކަމަށެވެ.
"އަދަދު" އާ ވާހަކަ ދައްކަމުން ޝާހު މިއަދު ވިދާޅުވީ އޭނާ ނަން އަނބުރާ ގެންދަން ނިންމީ، އެތައް ދުވަހެއް ފާއިތުވި އިރުވެސް ޕާޓީއަށް އެ މައްސަލަ ހައްލު ނުކުރެވުމުން އެކަމަށް އޭނާ އަމިއްލަ ހައްލެއް ހޯދައިދިނުމަށް ކަމަށެވެ. އަދި އެ މައްސަލަ ޕާޓީއަށް ހައްލުނުކުރެވުމުގެ ސަބަބުން ޕާޓީގެ އެކި ކަންތައްތަކުގައި އިސްކޮށް އުޅުނު އެތައް ޒުވާނުން ޕާޓީގެ ހަރަކާތްތަކާއި ދުރަށް ޖެހެމުންދާކަން ވެސް އޭނާ ފާހަގަކުރެއްވި އެވެ.
އެގޮތުން ދަ ޑިމޮކްރެޓްސްގެ އައްޑޫސިޓީ ވިމެން ޑިމޮކްރެޓްސް ލީޑަރު އަދި ހުޅުދޫ ދައިރާގެ ރައީސް ވެސް ވަނީ މަގާމުން އިސްތިއުފާ ދީފަ އެވެ.
