އެއްވެސް ކަމަކާ ގުޅޭ ގޮތުން ދެގޮތަކަށް ވާހަކަ ދައްކަވާފައި ނުވާނެ ކަމަށް ވިދާޅުވެ އިދިކޮޅު ފަރާތްތަކާއި އާންމުންގެ ފަރާތުން އަމާޒުވަމުންދާ ފާޑުކިޔުންތަކަށް ރައީސް ޑރ. މުހައްމަދު މުއިއްޒު ރައްދު ދެއްވައިފި އެވެ.
ރައީސް މުއިއްޒު އެކި މަންސަތަކުގައި ދައްކަވާ ވާހަކަތައް ބަދަލުވަމުންދާ ކަމަށް ބުނެ އާންމުންގެ ފާޑުކިޔުން އަމާޒުވެފައިވެ އެވެ. އެގޮތުން, ކުރީގެ ރައީސް އަބްދުالله ޔާމީން މިނިވަން ކުރުމާއި ރާއްޖޭގައި ތިބި އިންޑިއާގެ ސިފައިން ބޭލުމާ ގުޅޭގޮތުން ރައީސް ދައްކަވާފައިވާ ވާހަކަތައް ބަދަލުވެފައިވާ ކަމަށް ބައެއް ފަަރާތްތަކުން ދަނީ ބުނަމުންނެވެ.
ތ. އަތޮޅަށް ކުރައްވަމުން ގެންދަވާ ދަތުރުގެ ތެރެއިން އެ އަތޮޅު ވޭމަންޑޫގައި ރޭ ބޭއްވި ޖަލްސާއެއްގައި ރައީސް ވަނީ އެމަނިކުފާނު ދައްކަވާ ވާހަކަތައް މިހާތަނަށް ބަދަލުވެފައި ނުވާނެ ކަމަށް ވިދާޅުވެފަ އެވެ.
"ދުވަހަކު ވެސް އަޅުގަނޑު މިއަދާ ހަމައަށް އައިރުގައި، ކެމްޕެއިން ތެރެެއިން ފެށިގެން، ކެމްޕެއިން ފެށި ދުވަހުން ފެށިގެން މިއަދާ ހަމައަށް އައިއިރުގައި އެންމެ މައުލޫއެއްގައި ވެސް ތަފާތު ގޮތަކަށް ވާހަކަ ދައްކައިފިންތޯ،" ރައީސް ވިދާޅުވި އެވެ.
"ނޯންނާނެ ދައްކާފައެއް,"
ރާއްޖޭގައި ތިބި އިންޑިއާ ސިފައިން އަނބުރާ ގެންދިއުމަށް ފަހު، މަދަނީ މީހުންގެ ގޮތުގައި އޮޅުވާލައިގެން އަލުން ގެންނާނެ ކަމަށް ދެކެވޭ ވާހަކައާ ގުޅުވައި ސުވާލުކުރުމުން، އެކަން އެހެން ނުހިނގާނެ ކަމަށް ރައީސަށް މިއަދު ވެސް ވިދާޅެއް ނުވެ އެވެ.
އޭގެ ބަދަލުގައި ވިދާޅުވީ، "ރާއްޖޭގައި ބޭރު ސިފައިންގެ އެއްވެސް ބަަޔަކު ނުތިބޭ ހިސާބަށް ގެންދެވޭނެ" ކަމަށެވެ. ސީދާ އެ ކަމަށް ޖަވާބެއް ނުދެއްވަ އެވެ.
ރައީސް މުއިއްޒު ވެރިކަމަށް ވަޑައިގެންނެވީ ރާއްޖޭން އިންޑިއާގެ ސިފައިން އެއްކޮށް ފޮނުވާލުމުގެ ވައުދާ އެކު އެވެ. ނަމަވެސް, އެކަމާ ގުޅޭ ގޮތުން އިންޑިއާ ސަރުކާރުން ދައްކާ ވާހަކަ އާއި ރާއްޖޭން ދައްކާ ވާހަކައާ ދިމައެއް ނުވެ އެވެ.
އިންޑިއާގެ އަސްކަރިއްޔާ ރާއްޖޭން ބޭލުމަކީ ނޮން ނެގޯޝިއަބަލް ކަމެއް ކަމަށް ކެމްޕޭނުތެރޭގައި ރައީސް މުއިއްޒު ވިދާޅުވެފައި ވާއިރު، ވެރިކަމަށް ވަޑައިގެން އިންޑިއާއަށް ބަހުގެ ހަމަލާތައް ވެސް ދޫކުރައްވަމުން ގެންދެވުމަށް ފަހު ރޭ ވޭމަންޑޫގައި ވިދާޅުވީ "ރުންކުރު އުސޫލު ބޭނުންކޮށްގެން" ކަންކަން ހާސިލު ނުވާނެ ކަމަށެވެ.
އިންޑިއާ ސިފައިން އެއްކޮށް ބޭލުމަށް ސަރުކާރުން ފުރަތަމަ ދިން ތާރީހަކީ މާޗު 15 އެވެ. ނަމަވެސް، އެ ތާރީހު ބަދަލުކޮށް، މާޗު 10 ގެ ކުރިން ބާލަން އެއްބަސްވީ ރާއްޖޭގެ އެއް ސަރަހައްދެއްގައި ތިބި އިންޑިއާ ސިފައިންނެވެ. އެހެން ސިފައިން ބާލަން އެއްބަސްވީ މެއި 10 ގެ ކުރިންނެވެ.
ރިޔާސީ ކެމްޕޭނުގައި ވީ އެންމެ ބޮޑު ވައުދަކީ ކުރީގެ ރައީސް އަދި ޕީޕީއެމް/ޕީއެންސީގެ އޭރުގެ ލީޑަރު އަބްދުﷲ ޔާމީން މިނިވަން ކުރެއްވުމެވެ. އޭރު ރައީސް މުއިއްޒު އާއި އެ ކޯލިޝަންގެ ލީޑަރުން ވިދާޅުވަމުން ގެންދެވީ ޔާމީން ޖަލަށް ލާފައި ހުރީ ކުށެއް ކޮށްގެން ނޫން ކަމަށާއި، މިިނިވަން ނުވެ ހުރީ އޭރު ސަރުކާރުން ކޯޓުތަކަށް ނުފޫޒު ފޯރުވާތީ ކަމަށެވެ.
ޔާމީން އަދިވެސް މިނިވަން ނުވެ ހުންނެވިއިރު، އެ ވައުދު ފުއްދިފައިވާ ކަމަށް މި ސަރުކާރުން ބުނެފައިވެ އެވެ. އެ މަނިކުފާނު އަދިވެސް ހުންނެވީ މާލޭ ބަންދުގަ އެވެ. ކުރިން އިވެމުންދިޔަ ހަރާމް ހުކުމުމުގެ އަޑުވެސް ވަނީ ކެނޑިފަ އެވެ.
