އެޗްޑީސީގެ މުނިސިޕަލް ހިދުމަތްތައް ދިނުމުގައި މަސައްކަތް ކުރާ މުވައްޒަފުންގެ ތެރެއިން މާލެ ސިޓީ ކައުންސިލުގެ ދަށަށް ބަދަލުވާން ބޭނުން ނުވާ ފަރާތްތަކަށް ވަޒީފާއިން ވަކިވުމަށް އަންގައި އެ ކޯޕަރޭޝަނުން ފޮނުވި ލިޔުންތައް އެ ކޯޕަރޭޝަނުން ބާތިލުކޮށްފި އެވެ.
އެ ކޯޕަރޭޝަނުން މުވައްޒަފުންނަށް ފޮނުވި މެސެޖުގައި ބުނެފައި ވަނީ ސިޓީ ކައުންސިލަށް ބަދަލުވާން ބޭނުން ނުވާ މުވައްޒަފުން "ރިޑަންޑެންސީ ޕޮލިސީ" ގެ ދަށުން ތިން މަހުގެ މުސާރައާ އެކު ވަޒީފާއިން ވަކިވުމަށް އަންގައި ފޮނުވި ލިޔުން ބާތިލު ކުރުމަށް އެޗްޑީސީގެ މެނޭޖުމަންޓުން ނިންމާފައިވާ ކަމަށެވެ.
އެ ލިޔުންތައް ބާތިލުކޮށްފައިވާ ކަން އެޗްޑީސީގެ އިސް އޮފިޝަލަކު ވަނީ "އަދަދު" އަށް ކަށަވަރު ކޮށްދީފަ އެވެ. ނަމަވެސް އެކަމާ ގުޅޭގޮތުން އެޗްޑީސީގެ ރަސްމީ ބަހެއް އަދި ލިބޭގޮތް ވަނީ ނުވެފަ އެވެ.
މިދިޔަ ހަފުތާގައި އެޗްޑީސީގެ ބައެއް މުވައްޒަފުންނަށް އެ ކޯޕަރޭޝަނުން ފޮނުވި ސިޓީގައި ބުނެފައި ވަނީ މުނިސިޕަލް ހިދުމަތް ސިޓީ ކައުންސިލުގެ ދަށަށް ބަދަލު ކުރުމުން އެ ޑިޕާޓުމެންޓުގައި މަސައްކަތް ކުރަމުން އައި މުވައްޒަފުން ކުރާނެ އިތުރު މަސައްކަތެއް އެޗްޑީސީގައި ނެތް ކަމަށެވެ.
އެހެންކަމުން އެޗްޑީސީގެ މުނިސިޕަލް ޑިޕާޓުމެންޓުގައި މަސައްކަތް ކުރާ މުވައްޒަފުންގެ ތެރެއިން ސިޓީ ކައުންސިލަށް ބަދަލުވާން ބޭނުންނުވާ މުވައްޒަފުން މިއަދުގެ 12:00 ގެ ކުރިން އެ ކޯޕަރޭޝަނުގެ އެޗްއާރަށް އެންގުމަށް އެ ލިޔުމުގައި ބުނެފައިވެ އެވެ. އަދި އެ މުވައްޒަފުން ތިން މަހުގެ މުސާރައާ އެކު ވަޒީފާއިން ވަކިވުމަށް އަންގާފައިވެ އެވެ.
އެޗްޑީސީން ދެމުން އައި ހުޅުމާލޭގެ މުނިސިޕަލް ހިދުމަތްތައް ސިޓީ ކައުންސިލުގެ ދަށަށް ބަދަލު ކުރަން ނިންމީ ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅެއްގެ ދަށުންނެވެ. އެ ހިދުމަތް ސިޓީ ކައުންސިލުގެ ދަށަށް ބަދަލު ކުރާއިރު، އެޗްޑީސީގައި ތިބި މުވައްޒަފުންނަށް ވަޒީފާ އަދާކުރާނެ ތަނެއް އިހުތިޔާރު ކުރުމުގެ ފުރުސަތު ދެއްވާނެ ކަމަށް ރިޔާސީ ކެމްޕޭނު ދުވަސްވަރު ރައީސް ވައުދުވެވަޑައިގެންނެވި އެވެ.
އެޗްޑީސީން ދެމުންދިޔަ މުނިސިޕަލް ހިދުމަތްތައް މާލެ ސިޓީ ކައުންސިލުގެ ދަށަށް ބަދަލު ކުރުމަށް ޕީއެންސީގެ މެނިފެސްޓޯ އިފުތިތާހު ކުރި ޖަލްސާގައި ރައީސް މުއިއްޒު ވެވަޑައިގެންނެވި ވައުދު ތަފުސީލު ކޮށްދެއްވަމުން މިދިޔަ އަހަރުގެ އޯގަސްޓު 23، ގައި ރައީސް ތުހުމަތު ކުރެއްވީ، ރަށްވެހިކަމުގެ ހިދުމަތް ދޭން އެޗްޑީސީން ބޭނުން ކުރި ބަޖެޓާއި ރިސޯސަސް މާލެ ސިޓީ ކައުންސިލުގެ ދަށަށް ބަދަލު ކުރުމަށް ވައުދުވެވަޑައިގެންނެވުމުން އޭރު އޮތް ސަރުކާރުން އެކަން އޮޅުވާލައި އެޗްޑީސީގެ މުވައްޒަފުންނަށް ވަޒީފާގެ ބިރު ދެއްކި ކަމަށެވެ.
މުނިސިޕަލް ހިދުމަތް ސިޓީ ކައުންސިލުގެ ދަށަށް ބަދަލު ކުރާއިރު، އެޗްޑީސީގެ މުވައްޒަފުންނަށް ވަޒީފާ އަދާކުރާ ތަނެއް އިހުތިޔާރު ކުރުމުގެ ފުރުސަތު ދެއްވާނެ ކަމަށް ރައީސް ވިދާޅުވީ ކެމްޕޭނުގައި ށ. ކަނޑިތީމުގައި ބޭއްވި ޖަލްސާގައި ވާހަކަފުޅުދައްކަވަމުންނެވެ.
"އަޅުގަނޑު ދެންނެވީ ބަޖެޓު ބަދަލު ކުރާނަމޭ، ބަޖެޓާ އެކީގައި ރިސޯސް. މާނައަކީ ބޭނުންކުރާ ވެހިކަލްތަކާއި އެކަމަށް ބޭނުންކުރާ އެހެން އާލާތްތަކާ އެއްކޮށޭ ބަދަލު ކުރާނީ، މުވައްޒަފުން ބަދަލުވުމަކީ މުވައްޒަފުންގެ އަމިއްލަ އިހުތިޔާރުގައި އޮންނަ ކަމެއް، އާބަންކޯގައި މަދު ކުރެވޭނެ، އަޅުގަނޑުމެންނަށް ބަޖެޓު ބަދަލުވީމާ އެ ބަދަލުވާން ބޭނުންވާ މުވައްޒަފުން ބަދަލުވެފައި ދެން އިތުރަށް [ސިޓީ ކައުންސިލަށް] ބޭނުންވާ މުވައްޒަފުން އެ ބަޖެޓު ތެރެއިން އަޅުގަނޑުމެން އިއުލާނުކޮށްގެން ނަގާނީ، އެހެންވީމާ އެއްވެސް މީހެއްގެ ވަޒީފާއެއް ނުގެއްލޭނެ،" ރައީސް މުއިއްޒު ވިދާޅުވި އެވެ.
އެޗްޑީސީގެ މުނިސިޕަލް ޑިޕާޓުމެންޓުގައި މަސައްކަތް ކުރާ މުވައްޒަފުންގެ ތެރެއިން ސިޓީ ކައުންސިލަށް ބަދަލުވާ މުވައްޒަފުންނަށް މިހާރު ވެސް ލިބޭ މުސާރައާއި އިނާޔަތްތައް އެއް އަހަރު ދުވަސްވަންދެން އެޗްޑީސީން ދިނުމަށް ވަނީ ނިންމައިފަ އެވެ.
