ރައްޔިތުންގެ މަޖިލީހުގެ މެމްބަރުންނަށް ސަލާމަތާއި ރައްކާތެރިކަން ކަށަވަރުކޮށްދޭން މަތިކޮށްފައިވާ ސަލާމަތީ ބާރުތަކުން އެކަން އެގޮތަށް ކޮށްފައިވާ ކަމަށް ގަބޫލުނުކުރާ ކަމަށާއި އެކަން ބަލައިދިނުމަށް 241 ކޮމިޓީއަށް ހުށަހަޅާނެ ކަމަށް އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ބުނެފި އެވެ.
ރައީސް ޑރ. މުހައްމަދު މުއިއްޒުގެ ވަޒީރުންގެ މަޖިލީހަށް ރުހުން ދިނުމަށް މިއަދު ތާވަލުކުރި ދައުރުން ބޭރު ޖަލްސާގައި ތާވަލުކޮށް އެމްޑީޕީން ވިޕްލައިން ނެރުމާ އެކު ހިނގައިދިޔަ ހަމަނުޖެހުންތަކުގެ ސަބަބުން ވޯޓު ނެގިފައެއް ނުވެ އެވެ. މަޖިލީހުގެ ބައެއް މެމްބަރުންނަށް މަރުގެ އިންޒާރު ވެސް ދީފައިވާއިރު މަޖިލީހުގެ އަމަލުތަކާ ގުޅިގެން އެމްޑީޕީން މިރޭ ވަނީ ކަންބޮޑުވުން ފާޅުކޮށްފަ އެވެ.
"އަޅުގަނޑު ގަބޫލެއް ނުކުރަން ދައުލަތުގެ ސަލާމާތީ ބާރުތަކުން މިއަދު ރައްޔިތުންގެ މަޖިލީހަށް ދެއްވަން ޖެހޭ ހިދުމަތް ދެއްވި ކަމަށް. ރައްޔިތުންގެ މަޖިލީހުގެ ރައީސް ވެސް ހުންނެވީ ވަރަށް ކަންބޮޑުވުމުގެ ތެރޭގައި. ވަރަށް ހާސްކަމުގެ ތެރޭގައި. މިތަނަށް ވަނުމާ ނުކުތުމާ އެއްވެސް އުސޫލެއް ނެތި ހިނގަމުންދިޔަ ތަން އެންމެނަށް ވެސް ފެނިގެންދިޔައީ," ސަލީމް ވިދާޅުވި އެވެ.
އެގޮތަށް ކަންތައްތައް ހިނގައިދިޔަ ނަމަވެސް އެ ޕާޓީގެ ޕާލިމެންޓަރީ ގްރޫޕްގެ މެމްބަރުންގެ ވިސްނުމަށް އެއްވެސް ބަދަލެއް ނާންނަ ކަމަށް ސަލީމް ވިދާޅުވި އެވެ.
"މަޖިލީހުގެ ގޯތި ތެރެއަށް ބައެއް ބޭފުޅުން ވެންނެވިކަން އަޅުގަނޑުމެންނަށް އެނގޭ. މަޖިލީހުގެ ސަލާމަތީ ކަންކަން ބަލަހައްޓަވަނީ އެމްއެންޑީއެފްގެ ފަރާތުން. އެހެން ނަމަވެސް, މެމްބަރުންނަށް މިއަދު ރައްކާތެރި މާހައުލެއް އޮތް ކަމުގެ އިހުސާސެއް ނުކުރެވޭ. އަޅުގަނޑުމެންގެ މެމްބަރުން ތިބީ ވަރަށް ކަންބޮޑުވުމާއި ބިރުވެރިކަމެއްގެ ތެރޭގައި," ހޯރަފުށީ ދާއިރާގެ މެމްބަރުކަން ވެސް ކުރައްވާ ސަލީމް ވިދާޅުވި އެވެ.
އަދި, މިކަން ހިނގައިދިޔަ ގޮތް ބަލައިދިނުމަށް އެ ޕާޓީގެ ފަރާތުން މަޖިލީހުގެ ސަލާމަތާއި ހިދުމަތްތަކާ ގުޅޭ ކޮމިޓީއަށް ހުށަހަޅުއްވާނެ ކަމަށް ސަލީމް ހާމަކުރެއްވި އެވެ.
ވަޒީރުންނަށް ރުހުން ދިނުމަށް ތާވަލުކުރި މިއަދުގެ ޖަލްސާ ކުރިއަށްނުގެންދެވި ނިންމާލުމާ ގުޅިގެން އަނެއްކާ މާދަމާ ވެސް އެކަމަށް ޖަލްސާއެއް ވަނީ ތާވަލުކޮށްފަ އެވެ.
ޖަލްސާ ފުރަތަމަ ފެށީ ހެދުނު 9:00 ގަ އެވެ. އެ ދަންފަޅީގައި މަޖިލީހުގެ މަސައްކަތްތައް ކުރިއަށް ގެންދިއުމަށްފަހު ޖަލްސާ މެދުކަނޑާލީ މެންދުރު 1:30 ގައި ވޯޓުލާ ދަންފަޅި ފެށުމަށް މަސައްކަތް ކުރުމުން ސަރުކާރުގެ މެންބަރުން ވަނީ އެކަމަށް ހުރަަސް އަޅާފަ އެވެ.
އޭގެ ފަހުން ޖަލްސާ ބޭއްވުމަށް މިރޭ 08:00 އިން ފެށިގެން މަސައްކަތް ކުރިއިރު އެކަން ވެސް ކާމިޔާބު ނުވެ މެދުކަނޑާލި އެވެ.
އެއަށްފަހު, އަނެއްކާ ވެސް 10:30 ގައި ޖަލްސާ ބާއްވަން މަސައްކަތް ފެށި އެވެ. އޭރު ރިޔާސަތުގައި ހުރި މައިކް ސިސްޓަމް ނެގުމާ ގުޅިގެން މަޖިލިސް ރައީސް މުހައްމަދު އަސްލަމް އިންނެވީ ވަޒީރުން ތިއްބަވާ މޭޒުގަ އެވެ.
އަދި, ދެ މެމްބަރަކަށް މަޖިލީހުގެ ގަވާއިދަށް ހުރުމަތްތެރިކޮށް ހިތުމަށް ނަސޭހަތް ދެއްވި އެވެ. އެއަށް ފަހު ވެސް މުޅި މަޖިލިސް ކުރާ ހޯލުން ވެސް ދުންމާރީގެ އަޑު ކެނޑިފައިނުވާއިރު 10:57 ހާއިރު އަސްލަމް ވަނީ ޖަލްސާ ނިންމަވާލައްވާފަ އެވެ.
