ވަކި ޝަރުތުތަކަކާ އެކު އިންސާނުންނާއި ޖަނަވާރުގެ ގުނަވަން އިންދުން މުސްލިމުންނަށް ހުއްދަ ކަމަށާއި އެހެން ނަމަވެސް އެހެން މީހެއްގެ ގުނަވަނެއް އިންދޭނީ އެ ގުނަވަން ހޯދުމަށް ޓަކައި ގުނަވަނުގެ ވެރިޔާއަށް އެއްވެސް އަގެއް ދޭން ނުޖެހޭ ހާލަތުގައި އެކަނި ކަމަށް ފަތުވާ މަޖިލީހުން މިއަދު ނެރުނު ފަތުވާއެއްގައި ބުނެފި އެވެ.
އިސްލާމީ ފަތުވާދޭ މަޖިލީހުން މިއަދު ނެރުނު ފަތުވާގައިވާ ގޮތުން މީހެއްގެ ގުނަވަނެއް އެހެން މީހަކަށް ބަދަލުކުރުން ހަލާލުވުމުގެ ޝަރުތުތައް ހަމަވާ ހާލަތްތަކުގައި ވެސް ފައިސާ ނުވަތަ އެެހެން އެއްޗެއް، ހަދިޔާއެއްގެ ގޮތުގައި ދީގެން އެ މުއާމަލާތް ކުރުން ހުއްދައެއް ނުވާނެ އެވެ. އެއީ އިންސާނެއްގެ ހަށިގަނޑުން ބައެއް ވިއްކުމަކީ ހުރިހާ ހާލަތެއްގައި ވެސް ހަރާމް ކަމެއް ކަމަށް ވާތީ އެވެ.
"...ގުނަވަން ބަދަލުކުރުން ހުއްދަ ހާލަތުގައި ވެސް ފައިސާއެއް ނުވަތަ ހަދިޔާއެއް ނުވަތަ އެހެން އެއްޗެއް ދީގެން ވެސް އިންސާނެއްގެ ގުނަވަނެއް އެހެން އިންސާނަކަށް، ހުއްދަނޫން، ހަރާމްކަމެކެވެ. އެއީ އިންސާނެއްގެ ގުނަވަނެއް، ނުވަތަ ހަށިގަނޑުން ބައެއް ވިއްކުމަކީ ހުރިހާ ހާލަތެއްގައި ވެސް ހުއްދަނޫން ހަރާމް ކަމަކަށް ވާތީ އެވެ،" ފަތުވާފައި ބުނެފައި ވެ އެވެ.
އެހެން މީހެއްގެ ގުނަވަނެއް އިންދުމުގެ ފަރުވާ ދިވެހިން އާއްމުކޮށް ހޯދަނީ ދެ ކިޑްނީ ފެއިލްވުން ފަދަ ހާލަތްތަކުގައި ކިޑްނީ އިންދުމަށެވެ.
ގުނަވަނެއް ބަދަލުކުރުން ހުއްދަ ހާލަތްތައް
ފަތުވާ މަޖިލީހުން މިއަދު ނެރެނު ފަތުވާގައިވާ ގޮތުން އެހެން މީހެއްގެ ގުނަވަނެއް ނުވަތަ ޖަނަވާރެއްގެ ގުނަވަނެއް ހަށިގަނޑުގައި އިންދުން މުސްލިމަކަަށް ހުއްދަވާނީ ދެ ހަލާތެއްގަ އެވެ. ފުރަތަމަ ހާލަތަކީ އެ ފަރުވާ ނުދީފި ނަމަ މީހެއްގެ ފުރާނައަށް ނުރައްކާވާ ހާލަތެވެ.
މީގެ އެއް މިސާލަކީ ހިތުގެ ލޭނާރެއް ބެދުމުގެ ސަބަބުން ހަށިގަނޑުގެ އެހެން ތަނަކުން ލޭނާރެއް ބަދަލުކުރަން ޖެހުމެވެ.
ދެވަނަ ހާލަތަކީ ފުރާނަަ ސަލާމަތް ވިޔަސް ގުނަވަނެއް ބަދަލުކުރުމުގެ ބޭނުންތެރިކަން އޮތުމެެވެ. މީގެ މިސާލަކީ މީހެއްގެ ހަށިގަނޑުގެ ބައެއްގެ ހަންގަނޑު ހަލާކުވެފައި ވުމުގެ ސަބަބުން ހަން ލެއްވުމެވެ. ފަތުވާގައިވާ ގޮތުން މި ދެ ހާލަތުގައި ވެސް އެކަން ހުއްދަވަނީ އެކަމުގެ ގެއްލުމަށް ވުރެ ފައިދާ ބޮޑުވީމަ އެވެ.
ދިރިހުރި މީހެއްގެ ގުނަވަނެއް ނެގޭނީ ދޭ މީހާގެ ފުރާނައަށް ގެއްލުން ނުވާ ނަމަ
ފަތުވާގައިވާ ގޮތުން ދިރިހުރި މީހެއްގެ ގުނަވަނެއް އެހެން މީހަކަށް ބަދަލުކުރެވޭނީ ގުނަވަން ހަދިޔާކުރާ މީހާގެ ފުރާނައަށް އެކަމުގެ ސަބަބުން ގެއްލުމެއް ނުވާ ހާލަތުގައި އެކަންޏެވެ. މިސާލަކަށް އެއް ބާވަތެއްގެ ދެގުނަވަނުގެ ތެރެއިން އެއް ގުނަވަނެވެ. އެއީ ކިޑްނީ ފަދަ ގުނަވަންތަކެވެ.
މީހާގެ ފުރާނައަށް ގެއްލުން ނުވާ ގޮތަށް ނެގޭނެ އަނެއް ބާވަތަކީ ނެގިޔަސް އަލުން އުފެދޭނެ ގުނަވަންތަކެވެ. އެކެއްގެ ގައިން ލޭ ނަގައި އަނެކެއްގެ ގަޔަށް އެޅުން ހުއްދަވަނީ އެގޮތުންނެވެ. މަފްހޫމަކީ ގުނަވަން ހަދިޔާކުރުމުގެ ސަބަބުން، ހަދިޔާކުރާ މީހާގެ ފުރާނައަށް ގެއްލުން ނުލިބުމާ އެކު ލިބޭ މީހާއަށް ފައިދާ ކުރުމެވެ.
އިންސާނުންނާއި ޖަނަވާރުގެ ގުނަވަން އިންދުން މުސްލިމުންނަށް ހުއްދަ ނުވާ ހާލަތްތަކާއި އިންދުން ހުއްދަ ނޫން ގުނަވަންތަކުގެ ތަފްސީލު ވެސް މިއަދު ނެރުނު ފަތުވާގައި އެބަ އޮތެވެ. އިންދުން ހުއްދަ ނޫން އެއް ގުނަވަނަކީ އުރަވަޅި އެވެ. އެއީ ނަސްލު އޮޅިދާނެތީ އެވެ.
