ރައްޔިތުންގެ މަޖިލީހުގެ މެޖޯރިޓީ ޕާޓީ، އެމްޑީޕީއާއި މައިނޯރިޓީ ޕާޓީ، ދަ ޑިމޮކްރެޓްސް ގުޅިގެން މިއަދު ހުށަހެޅި ހުށަހެޅުމަށް މަޖިލީހުގެ ރިޔާސަތުން އިޖާބަދީ ، ދައުރުން ބޭރު ޖަލްސާތައް އަންނަ އާދީއްތަ ދުވަހު ފަށަން ތާވަލުކޮށްފި އެވެ.
މިދިޔަ އަހަރުގެ ފަހު ދައުރު ނިމުމުން މަޖިލީހުގެ މެމްބަރުން ޗުއްޓީގައި ތިއްބެވި އިރު މިއަހަރުގެ ފުރަތަމަ ދައުރު ފަށަން ތާވަލުކޮށްފައި އޮތީ ފެބްރުއަރީ 5، ގަ އެވެ. އެހެން ނަމަވެސް އެމްޑީޕީއާއި ދަ ޑިމޮކްރެޓްސް ގުޅިގެން ކުރަން ނިންމާފައިވާ ބައެއް މަސައްކަތްތައް އަަވަސްކުރުމަށް ޓަކައި ދައުރުން ބޭރު ޖަލްސާތަކެއް ބާއްވަން މިއަދު ހުށަހެޅި އެވެ.
ދައުރުން ބޭރު ޖަލްސާތަކެއް ބާއްވަން ހުށަހަޅީ 38 މެމްބަރުންގެ ސޮޔާ އެކު އެވެ. އޭގެ ތެރޭގައި އިދިކޮޅު މައި ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އާއި އެ ޕާޓިން ވަކިވި މެމްބަރުންތަކެއް އުފެއްދި ދަ ޑިމޮކްރެޓްސްއަށް ނިސްބަތްވާ މެމްބަރުން ވެސް ހިމެނެ އެވެ.
އެ ހުށަހެޅުމަށް އިޖާބަދީ އާދީއްތަ ދުވަހަށް ތާވަލުކުރި ޖަލްސާގެ އެޖެންޑާގައި ހިމަނާފައިވާ މުހިއްމު އެއް ކަމަކީ ރައީސް ޑރ.މުހައްމަދު މުއިއްޒު އެކުލަވައިލައްވާފައިވާ ވަޒީރުންގެ މަޖިލީހުގެ މެމްބަރުންނަަށް ރުހުން ދިނުމާ މެދު ގޮތެއް ނިންމުމެވެ. ދެވަނަ ކަމަކަށް އޮތީ ވުޒާރާތަކުގެ މަސައްކަތުގެ ދާއިރާއަށް ގެނައި ބަދަލުތައް ދިރާސާކުރަން ކަމާ ބެހޭ ކޮމިޓީއަށް ފޮނުވުމެެވެ.
ރައްޔިތުންގެ މަޖިލީހުގެ ޖަލްސާތަކެއް ދައުރުން ބޭރުން ޖަލްސާތަކެއް ބާއްވަން ހުށަހެޅި އިރު ކުރަން ހުށަހަޅާފައިވާ މުހިއްމު އެއް ކަމަކީ ރޯދަމަހު އިންތިހާބުތައް ނުބޭއްވޭ ގޮތަށް އިންތިހާބާ ބެހޭ އާއްމު ގާނޫނު ބަދަލުކުރުމެވެ. ގާނޫނު އެގޮތަށް ބަދަލުކުރަން އިހަަވަންދޫ ދާއިރާގެ އެމްޑީޕީ މެމްބަރު މުހައްމަދު ޝިފާއު ހުށަހެޅުއްވި ބިލުގެ ފުރަތަމަ ކިއުން އިއްވުން ވެސް މާދަމާގެ ޖަލްސާއަށް އެޖެންޑާކޮށްފައި އެބަ އޮތެެެވެ.
ރޯދަމަހު އިންތިހާބު ނުބޭއްވޭ ގޮތަށް ގާނޫނު ބަދަލުކުރަން ޝިފާއު ހުށަހެޅުއްވީ ވިހި ވަނަ ރައްޔިތުންގެ މަޖިލީހަށް މެމްބަރުން ހޮވަން ބާއްވާ އިންތިހާބު މާޗް 17، އަށް ތާވަލުކޮށްފައި ވަނިކޮށެވެ. އެއީ ރޯދަ މަހުގެ ހަތް ވަނަ ދުވަހެވެ.
ރޯދަ މަހު އިންތިހާބު ބާއްވާތީ ސިޔާސީ ޕާޓީތަކުން އަންނަނީ ކަންބޮޑުވުން ފާޅުކުރަމުންނެވެ.
