ދިރިއުޅުމަށްޓަކައި ގޯތި ގެދޮރު ކުއްޔަށް ދޭ މީހުންނާއި ކުއްޔަށް ހިފާ މީހުންގެ ހައްގުތައް ރައްކާތެރިވާން ޖެހޭ ކަމަށް ލޯކަލް ގަވަމަންޓް އޮތޯރިޓީ (އެލްޖީއޭ)ގެ ސީއީއޯ ޑރ. މަރިޔަމް ޒުލްފާ ވިދާޅުވެއްޖެ އެވެ.
ގޯތި ގެދޮރު ކުއްޔަށް ދިނުމާ ބެހޭ ގާނޫނު ތަންފީޒުކުރުމާ ގުޅޭ ތަމްރީން ޕްރޮގްރާމް ފެށުމުގެ ރަސްމިއްޔާތުގައި ޒުލްފާ ވިދާޅުވީ ދިރިއުޅުމަށް ގޯތިގެދޮރު ކުއްޔަށް ދޭ ތަންތަން ބައެއް ހާލަތްތަކުގައި ވަރަށް ހާލަތު ދެރަކޮށް ހުންނަކަން ކަމަށެވެ. ކުލީގެ މުއާމަލާތްތަކުގައި ހައްގުތައް ނިގުޅައިގަނެވޭ ހާލަތުގައި އެކަން ބަލާނެ މީހަކުވެސް ނުހުންނަކަމަށް ވެސް އޭނާ ވިދާޅުވި އެވެ.
"ޝަރުއީ ނިޒާމު އޮންނަ ގޮތުން ކައުންސިލްތަކަކީ ދައުލަތް ހިންގުމުގައި ވަރަށް މުހިންމު ބައެއް، ކައުންސިލްތައް މިތިބެނީ ރައްޔިތުންނަށް ހިދުމަތް ކުރުމަށާއި ހައްގުތައް ރައްކާތެރިކުރުމަށް އަތުކުރި އޮޅާލައިގެން، ރައްޔިތުންނާ އެންމެ ގާތުން ތިބޭ ބަޔަކީ ކައުންސިލަރުންނާއި ކައުންސިލްގެ މުވައްޒަފުން،" ޒުލްފާ ވިދާޅުވި އެވެ.
މީގެ އިތުރުން، އިމާރާތްތަކާއި ގުޅުން ހުރި އެހެން ބިލުތަކުގެ މަސައްކަތްތައް ވެސް ބަލަމުންދާ ކަމަށާއި ބިލުތައް ފާސްވުމުން އެކަންކަން ކައުންސިލްތަކާ ހަމައަށް ގެނެސްދޭނެ ކަމަށް ވިދާޅުވި އެވެ. އެލްޖީއޭ މިނިސްޓްރީތައް ގުޅިގެން އެ މަސައްކަތް ކުރާނެ ކަމަށް ވިދާޅުވި އެވެ.
އޭނާ ވިދާޅުވި ގޮތުގައި ލާމަރުކަޒީ ގާނޫނުގެ ރޫހަކީ ވެސް، ސަރުކާރުގެ ހުރިހާ އިދާރާއެއް ގުޅިގެން މަސައްކަތް ކުރުމެވެ.
ގޯތި ގެދޮރު ކުއްޔަށް ދިނުމާ ބެހޭ ގާނޫނު ތަސްދީގުކުރީ 2021 ވަނަ އަހަރުގެ ޑިސެމްބަރު މަހު އެވެ. ރާއްޖޭގައި ކުއްޔަށްދޭ ހުރިހާ ތަންތަނުގައި އެންމެ ދަށްވެގެން ހުންނަންޖެހޭ މިންގަނޑުތަކެއް ކަނޑައެޅީ އެ ގާނޫނުންނެވެ. ކުއްޔަށް ދޭ ހުރިހާ ތަނެއްގެ ދަފްތަރެއް އެކުލަވައިލަން ވެސް އެ ގާނޫނުން ލާޒިމުކުރި އެވެ.
އެ ގާނޫނުގައިވާ ގޮތުން ކުއްޔަށް ދޫ ކުރާ ތަނަކީ އިމާރާތް ކުރުމާ ބެހޭ ގާނޫނާ އެއްގޮތަށް ހަދާފައި ހުރި ތަނަކަށްވާންޖެހެ އެވެ. އަދި އެ ތަނެއްގައި ފެނާއި ނަރުދަމާ ހުރުމުގެ އިތުރުން ފަސޭހަކަމާއެކު ވަދެ ނިކުމެވޭ ގޮތެއް ހުންނަންޖެހެ އެވެ.
ގެދޮރު ކުއްޔަށް ދިނުމާ ބެހޭ ގާނޫނުގައިވާ ގޮތުން ކޮންމެ ރަށެއްގައި ވެސް ކުއްޔަށް ދޭ ތަންތަނުގެ ދަފްތަރު ކަނޑައަޅަންޖެހެނީ އެ ރަށެއްގެ ކައުންސިލުންނެވެ.
ގެދޮރު ކުއްޔަށް ހިފާ ފަރާތްތަކާއި ކުއްޔަށް ދޭ ފަރާތްތައް ވެސް އަމަލު ކުރަންޖެހޭ ގޮތްތަކެއް ބަޔާންވެ، ދެ ފަރާތަށް ލިބިފައިވާ ހައްގުތައް ވެސް އެ ގާނޫނުގައި ކަނޑައަޅާފައި ވެ އެވެ. އެ ގާނޫނުގައިވާ ގޮތުން ސެކިއުރިޓީ ޑިޕޮސިޓްގެ ގޮތުގައި ގިނަވެގެން ނެގޭނީ ދެ މަސް ދުވަހުގެ ކުއްޔަށް ވާ ފައިސާ އެވެ.
ކުއްޔަށް ދޭ ތަނުގެ ކުޑަބޮޑުމިނަށް ބެލުމަށްފަހު އެތަނެއްގައި އެންމެ ގިނައިން އުޅެވޭނެ މީހުންގެ އަދަދު ކަނޑައަޅަން ވެސް އެ ގާނޫނު ލާޒިމުކުރެ އެވެ. އަދި ސަބް ލީޒްއަށް ތިން ވަނަ ފަރާތަކަށް ކުއްޔަށް ދޭ ނަމަ އެކަން ކުރެވޭނީ ކުއްޔަށް ދޭ ފަރާތުގެ އިއުތިރާޒެއް ނެތްކަމުގެ ލިޔުމެއް އޮވެގެން ކަމަށް ވެސް ގާނޫނުގައި ބަޔާންކޮށްފައިވެ އެވެ.
