ރައްޔިތުންގެ މަޖިލީހަށް މެމްބަރުން ހޮވަން ބާއްވާ އިންތިހާބު ރޯދަމަހާ ދިމާ ނުވާ ގޮތަށް އަދިވެސް ބަދަލު ކުރެވިދާނެ ކަމަށް ފިޝަރީޒް މިނިސްޓަރު އަދި ޕީޕީއެމްގެ ނައިބު ލީޑަރު އަހުމަދު ޝިޔާމް އިއްޔެ ވިދާޅުވި އެވެ.
މަޖިލިސް އިންތިހާބަށް އިލެކްޝަންސް ކޮމިޝަން (އީސީ) އިން އެކުލަވައިލި ގައުމީ ލަފާދޭ ކޮމިޓީން ދަރުބާރުގޭގައި ބޭއްވި ބައްދަލުވުމުގައި ޝިޔާމް ވިދާޅުވީ ރޯދަމަހު އިންތިހާބު ބާއްވާ ގޮތަށް ކޮމިޝަނުން ނިންމީ އެއްވެސް ސިޔާސީ ޕާޓީއަކުން އެއްބަސްވެގެން ނޫން ކަމަށެވެ. މިހާރު ކަނޑައަޅާފައިވާ ތާރީހަށް ބަދަލު ގެނެވޭނެ ޖާގަ އަދިވެސް އެބަ އޮތް ކަމަށް އޭނާ ވިދާޅުވި އެވެ.
"ރައްޔިތުންގެ މަޖިލީހުން އެކަން ކުރެވޭނެ. ހާއްސަ ޖަލްސާތަކާ އެއްޗިހި ދައުރުން ބޭރުން ބާއްވައިގެން ކުރާ ކަންކަން އެބަ ކުރެވޭ. އެހެންވީމާ ރައްޔިތުންގެ އެހާ ބޮޑު ކަންބޮޑުވުމެއް މިކަމުގައި އޮވެއްޖެ ކަމަށް ވަންޏާ އަޅުގަނޑުމެން ހަމަ ތާއީދުކުރަނީ ދައުރުން ބޭރުން ޖަލްސާއެއް ބާއްވައިގެން، ރައްޔިތުންނަށް ފަސޭހަވާނެ ގޮތަކަށް، ރައްޔިތުންގެ މަޖިލީހުގެ އިންތިހާބު ބާއްވާ ދުވަސް ކަނޑައެޅިގެން ދިއުމަށް،" ޝިޔާމް ވިދާޅުވި އެވެ.
ރައްޔިތުންގެ މަޖިލީހުގެ އިންތިހާބު ބާއްވަން މިހާރު ނިންމާފައި ވަނީ މާޗް 17، ގަ އެވެ.
މަޖިލީހުގެ އިންތިހާބު ރޯދަ މަހާ ދިމާވާއިރު ސިޔާސީ މަސައްކަތް ކުރަން ދަތިވާ ކަމަށް ޝިޔާމް ވިދާޅުވި އެވެ. އެގޮތަށް އިންތިހާބު ބޭއްވުމުން ނުކުންނާނީ ނުކުންނަން ޖެހޭ ނަތީޖާތޯ ސުވާލު އުފެދޭ ކަމަށް ވެސް އޭނާ ވިދާޅުވި އެވެ.
އެ ބައްދަލުވުމުގައި އީސީގެ ނައިބު ރައީސް އިސްމާއީލް ހަބީބު ވިދާޅުވީ ރޯދަ މަހާ ދިމާވާ ގޮތަށް ނިންމަން ޖެހުނީ އެކަޑަމިކް ކަލަންޑަރަށް ސަރުކާރުން ގެނައި ބަދަލަކާ ގުޅިގެން ކަމަށެވެ. އެެއީ އޭނާ ވިދާޅުވި ގޮތުގައި ކޮމިޝަނުން ނިންމި އެންމެ އުނދަގޫ އެއް ނިންމުމެވެ.
