ތޮއްޖެހިފައިވާ މާލޭގައި ވެހިކަލް ދުއްވޭނެ އަދަދު، ކުރިއަށް އޮތް ހަ މަސް ދުވަހުގެ ތެރޭ ކަނޑައަޅާނެ ކަމަށް މާލެ ސިޓީގެ މޭޔަރު އާދަމް އާޒިމް ވިދާޅުވެއްޖެ އެވެ.
ރޭ މަގާމުގެ ހުވާ ކުރެއްވުމަށް ފަހު، މިއަދު ބޭއްވި ނޫސްވެރިންގެ ބައްދަލުވުމުގައި މާލޭގެ މަގުތަކަކީ އުޅެން ފަސޭހަ، ހިތްގައިމު ތަނަކަށް ހެދުމަށް މޭޔަރުގެ ހައިސިއްޔަތުން މަސައްކަތް ކުރާނެ ކަންކަމަށް އަލިއަޅުއްވާލެއްވި އެވެ. އާޒިމް މޭޔަރަކަށް ވާދަކުރެއްވި އިރު، ވެފައިވާ އެއް ވައުދަކީ ވެސް މާލެއަކީ ހިތްފަސޭހަ، އުޅޭ ހިތްވާ ތަނަކަށް ހަދައި ދިނުމެވެ.
އެ މަގުން މަސައްކަތް ކުރުމަށް، ޓްރާންސްޕޯޓް މިނިސްޓްރީއާ ގުޅިގެން މާލޭގައި ވެހިކަލް ދުއްވޭނެ އަދަދު ކަނޑައަޅަން ޖެހޭ ކަމަށް އާޒިމް ވިދާޅުވި އެވެ.
"ވެހިކަލްގެ އަދަދު ކަނޑައަޅަން ޖެހޭ، ކުރިއަށް އޮތް ހަ މަސް ތެރޭ އިރާދަކުރެއްވިއްޔާ އަދަދު ކަނޑައަޅާނަން، މާލޭ މަގުތައް ފުރާ ވެހިކަލްތައް އެތުރުމަކީ އެއްވެސް ފަސޭހައެއް ވާނެ ކަމެއް ނޫން، މިކަމަށް އަވަސް ހައްލެއް ގެންނަން އެބަ ޖެހޭ،" އާޒިމް ވިދާޅުވި އެވެ.
މާލޭގައި ދުއްވޭނެ ވެހިކަލްގެ އަދަދު ކޮންޓްރޯލް ކޮށްފައި ނުވާތީ ދުވަހަކަށް ވުރެ ދުވަހެއް ވެހިކަލްތަކުގެ އަދަދު އިތުރުވެ، ތޮއްޖެހޭ މިންވަރު އަންނަނީ އިތުރުވަމުންނެވެ.
ވެހިކަލްގެ އަދަދު ކޮންޓްރޯލް ކުރުމާއި ގަރާޖު ސިޓީގެ މައްސަލަ ހައްލު ކުރުން ފަދަ ކަންކަމުގައި އެހީތެރިވުމަށް ޓްރާންސްޕޯޓް މިނިސްޓަރު އަރިހުގައި ވެސް އެދިފައިވާ ކަމަށް އާޒިމް ވިދާޅުވި އެވެ. މިނިސްޓަރުގެ ފަރާތުން އެކަމަށް އެއްބާރުލުން ލިބޭނެ ކަމަސް ވިދާޅުވެފައިވާ ކަމަށް ވެސް ވިދާޅުވި އެވެ.
"ގަރާޖު ސިޓީގެ ކަންކަން ސިޓީ ކައުންސިލްގެ ތެރެއިން ވެސް އެންމެ ރަނގަޅަށް ނުހިނގާކަމަށް މައުލޫމާތު ލިބޭ، އަޅުގަނޑަކީ ކަންކަން އުސޫލުގެ ތެރެއިން ހިންގުމަށް މަސައްކަތް ކުރާ މީހެއް، ގަރާޖު ސިޓީގެ މައްސަލަ ހައްލު ކުރަންވެސް ޓްރާންސްޕޯޓް މިނިސްޓްރީ އާއެކު މަސައްކަތް ކުރަން ޖެހޭ،" އާޒިމް ވިދާޅުވި އެވެ.
މޭޔަރުކަމަށް ވާދަ ކުރައްވާ ކުރެއްވި ކެމްޕެއިންގައި އާޒިމް ލޯންޗު ކުރި "ފެހި ތަނަވަސް މާލެ" މެނިފެސްޓޯ ގައި މާލޭގައި ފާހަގަކުރެވޭ ގިނަ މައްސަލަތަކަށް ހައްލު ހުށަހަޅުއްވާފައިވެ އެވެ.
އޭގެ ތެރޭގައި ވެހިކަލްތަކުގެ މައްސަލަތައް ހައްލު ކުރުމާއި ކުނީގެ މައްސަލަ ހައްލު ކުރުމާއި ހިނގާ މީހުންނަށް ފަސޭހަ ތަނަކަށް މާލެ ހެދުމަށް ކުރެވޭނެ ކަންކަން ހުށަހަޅުއްވާފައިވެ އެވެ. މާލެއަކީ މީހުން އުޅޭ ހިތުން އުޅޭ ތަނަކަށް ހެދުމަކީ އޭނާގެ ވައުދެކެވެ.
