ޔޫޓިއުބްގެ ސިލްވާ ޕްލޭ ބަޓަން ލިބުނު މަސްވެރިޔާ އާދަމް ރާޝިދު، 35، އަށް ފިޝަރީޒް މިނިސްޓަރު އަހުމަދު ޝިޔާމް މަރުހަބާ ވިދާޅުވެއްޖެ އެވެ.
މިނިސްޓަރު ޝިޔާމް މިއަދު ކުރެއްވި ޓްވީޓެއްގައި ވިދާޅުވީ، އާދަމް ކުރާ މަސައްކަތަކީ ގައުމީ މަސައްކަތެއް ކަމަށާއި އެކަމަށް ޝުކުރު އަދާކުރާކަމަށެވެ.
"ދިވެހިރާއްޖޭގައި ކުރެވޭ މަސްވެރިކަމަކީ ތިމާވެއްޓާ ރައްޓެހި ދެމެހެއްޓެނިވި ގޮތެއްގައި ކުރެވޭ މަސްވެރިކަން އެޑަމްގެ ހިތްގައިމު ވީޑިއޯތަކުން ބޭރުދުނިޔެއަށް ޔަގީންކޮށްދޭ،" ޝިޔާމް ވިދާޅުވި އެވެ.
އާދަމްއާ މިހާތަނަށް ދެކެވުނު ވާހަކަތަކުން، ވީޑިއޯ އުފެއްދުމުގެ މަސައްކަތަށް ގޮންޖެހުންތަކެއް ހުރިކަން އެނގިވަޑައިގެންނެވި ކަމަށް ޝިޔާމް ވިދާޅުވި އެވެ. ޝިޔާމް ވިދާޅުވީ އެކަންކަމަށް "އަލިމަގެއް" ހޯދައިދިނުމުގައި މިނިސްޓްރީގެ ފުރިހަމަ އެއްބާރުލުން ދޭނެ ކަމަށެވެ.
"ދަ ލައިފް އޮފް އަ ފިޝަމޭން 4076" އެކައުންޓު އާދަމް އުފެއްދީ މަސްވެރިކަމަށް މަޝްހޫރު ފަރެސްމާތޮޑާ މަސްވެރިން ކުރާ މަސައްކަތް ރާއްޖޭގެ އިތުރުން މުޅި ދުނިޔެއަށް ދައްކައިލުމުގެ ބޭނުމުގަ އެވެ.
ޔޫޓިއުބު އަދި ފޭސްބުކް ޕޭޖުގައި އާދަމް ހިއްސާކުރާ ވީޑިއޯތައް ރިކޯޑުކުރަނީ މަހަށްދާ ދޯނީގެ ޗެންޗެއިނުގައި ސްޓޭންޑެއް ހަރުކޮށްގެން އޭނާގެ ފޯނުންނެވެ. އަދި މަސް އައިނަކާ ލައްވައިލުމާއެކު ފޯނު ސްޓޭންޑުގައި ހަރުކުރުމަށްފަހު ވީޑިއޯ ޖައްސައި، ދުވެފައި މަސްބާނަން ދޯނީގެ ފަހަތައް ދަނީ ކަމަށް އާދަމް ބުންޏެވެ.
