މާލޭ ބިންވެރިންގެ ޖަމިއްޔާތަކުން ހުށަހެޅި މައްސަލަތަކަށް ރައީސް ޑރ. މުހައްމަދު މުއިއްޒު ދެއްވި ޖަވާބު މިރޭ ހިއްސާކުރަން އެޖަމިއްޔާތަކުން ނިންމައިފި އެވެ.
ރައީސް ދެއްވި ޖަވާބު ހިއްސާކުރުމަށް ޖަމިއްޔާތަކުން ނިންމީ މިރޭ ސަލްޓަން ޕާކުގައި ބާއްވާ "މާލެ ބިންވެރިންގެ ސައްލާ" ނަމުގައި ބާއްވާ ބައްދަލުވުމެއްގަ އެވެ. ބައްދަލުވުން ފެށުމަށް ހަމަޖެހިފައި އޮތީ މިރޭ 8:00 ޖަހާއިރެވެ.
މާލެ ސަރަހައްދުން ގޯތި ލިބިފައިވާ މީހުން ތަމްސީލު ކުރާ ޖަމިއްޔާތަކަކާ ރައީސް މުއިއްޒު ވަނީ ބައްދަލު ކުރައްވައިފަ އެވެ. އެއީ ގިރާވަރު މާލެ ސިޓިޒެންސް އެސޯސިއޭޝަން އާއި ގުޅީފަޅު ރައްޔިތުންގެ އެސޯސިއޭޝަން އާއި މާލޭ ރަށްވެހިންގެ ޖަމިއްޔާ އަދި ހުޅުމާލެ ރައްޔިތުންގެ ކޮމިޓީ އެވެ.
ރައީސްއާ ބައްދަލުކުރެއްވީ ހަތަރު ޖަމިއްޔާގެ ފަރާތުން ކަނޑައެޅުއްވި މަންދޫބު ސުނާދު ލަތީފެވެ.
ބައްދަލުވުމަށްފަހު ގިރާވަރު މާލެ ސިޓިޒެންސް އެސޯސިއޭޝަން އިން ފޭސްބުކްގައި ކުރި ޕޯސްޓެއްގައި ބުނީ ރައީސް ދެއްވި މެސެޖު މިރޭ ހިއްސާކުރާނެ ކަމަށެވެ.
"ހަތަރު ޖަމިއްޔާގެ ފަރާތުން ކަނޑައަޅާފައިވާ މަންދޫބު ސުނާދު ލަތީފް ރައީސުލްޖުމްހޫރިއްޔާއާ ބައްދަލުކޮށް ސައްލާ ބައްދަލުވުމުގެ މައުލޫމާތު ހިއްސާ ކުރެވުނެވެ. އަދި އެމަނިކުފާނު ދެއްވި މެސެޖު ހޮނިހިރު ދުވަހުގެ ރޭ އޮންނަ ބައްދަލުވުމުގައި ހާމަ ކުރެވޭނެ،" ފޭސްބުކް ޕޯސްޓުގައި ލިޔެފައިވެ އެވެ.
ކުރީ ސަރުކާރުން ގުޅީފަޅު އަދި ގިރާވަރު ފަޅުން ގޯތި ދޫކޮށްފައިވާ މީހުންނަށް އެ ގޯތިތައް ދިނުން ލަސްވާތީ އެކަމުގެ ކަންބޮޑުވުން ގޯތިތައް ލިބުނު ރައްޔިތުން އަންނަނީ ފާޅު ކުރަމުންނެވެ.
ކުރީ ސަރުކާރުން ހިންގި ބިންވެރިޔާ ސްކީމުން ގޯތި ލިބޭނެ ކަމަށް ލިސްޓްކޮށްފައިވާ މީހުންނާ ގޯތިތައް ހަވާލު ނުކުރާތީ އެކަމާ ގުޅޭގޮތުން ފާޅުކުރަމުން އަންނަ ކަންބޮޑުވުންތަކަށް ގާނޫނީ ހައްލެއް ހޯދައި ދިނުމަށް، މަޖިލީހުގެ ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލް އަހުމަދު ނަސީމު މަޖިލީހަށް ބިލަށް ވެސް ހުށަހަޅުއްވާފައިވެ އެވެ.
