އިންޑިއާ އާއި ރާއްޖެއާ ދެމެދު މިދިޔަ އާދީއްތަ ދުވަހު ކުރިއަށް ގެންދިޔަ ބައްދަލުވުމުގައި މަޝްވަރާ ކުރެވުނީ އިންޑިއާގެ އޭވިއޭޝަން ޕްލެޓްފޯމުތަކުން ރާއްޖޭގައި ދެމުންދާ އިންސާނީ އެހީގެ ހިދުމަތް ދެ ގައުމުން އެއްބަސްވެވޭ ގޮތެއްގެ މަތިން ކުރިއަށް ގެންދަން ކަމަށް އިންޑިއާގެ އެކްސްޓާނަލް މިނިސްޓްރީގެ ތަރުޖަމާނު، ރަންދިރު ޖައިސްވަލް ވިދާޅުވެއްޖެ އެވެ.
ކޮންމެ ހަފުތާއަކު ވެސް އިންޑިއާގެ އެކްސްޓާނަލް މިނިސްޓްރީން ކުރިއަށް ގެންދާ ނޫސްވެރިންގެ ބައްދަލުވުމުގައި ރާއްޖޭގައި ތިބި އިންޑިއާ ސިފައިން އަނބުރާ އެގައުމަށް ވަކި ތާރީހެއްގެ ކުރިން ގެންދަން އަންގާފައިވާ ކަމަށް ބުނާ ވާހަކައާ ގުޅުވައި ނޫސްވެރިޔަކު މިއަދު ވަނީ ސުވާލެއް ކޮށްފަ އެވެ.
އެ ސުވާލުގެ ޖަވާބުގައި ޖައިސްވަލް ވިދާޅުވީ މިމަހު 14 ވަނަ ދުވަހު ރާއްޖޭގައި ކުރިއަށް ގެންދިޔަ ބައްދަލުވުމުގައި މަޝްވަރާ ކުރެވުނީ ރާއްޖެއަށް އެ ގައުމުން މިހާރު ވެސް ދެމުންދާ އިންސާނީ އެހީގެ ހިދުމަތްތައް ދެ ގައުމުން ވެސް އެއްބަސްވެވޭ ހަމައެއްގެ މަތިން ކުރިއަށް ގެންދެވޭނެ މަގެއް ހޯދުމަށް ކަމަށެވެ. އެކަމުގެ އިތުރު ތަފުސީލު ލިބޭނީ ދެ ގައުމުގެ އިސްވެރިންގެ މެދުގައި ދެން އޮންނަ ބައްދަލުވުމަކަށް ފަހު ކަމަށް ޖައިސްވަލް ވިދާޅުވި އެވެ.
"އެ ދުވަހު އަޅުގަނޑުމެން އާންމު ކުރިން ޕްރެސް ރިލީޒެއް ވެސް، އޭގައި ވެސް އޮންނާނެ އިންޑިއާގެ އޭވިއޭޝަން ޕްލެޓްފޯމުތަކުން އިންސާނީ އެހީއާއި ބަލި މީހުން އުފުލުމުގައި ރާއްޖޭގައި ފޯރުކޮށްދެމުންދާ ހިދުމަތްތައް ދެގައުމުން އެއްބަސްވާ ގޮތެއްގެ މަތިން ކުރިއަށް ގެންދަން ކުރެވުނު މަޝްވަރާތަކުގެ ވާހަކަ،" ޖައިސްވަލް ވިދާޅުވި އެވެ.
ރާއްޖެއިން އެ ދުވަހު އާންމުކުރި ނޫސްބަޔާނުގައި ވަކި ތާރީހެއްގެ ކުރިން ރާއްޖޭގައި ތިބި އިންޑިއާ ސިފައިން ގެންދިޔުމަށް އަންގާފައިވާ ކަމަށް ބުނެފައި އޮތް ނަމަވެސް އިންޑިއާއިން އެ ދުވަހު އާންމުކުރި ނޫސްބަޔާނުގައި އެފަދަ ވާހަކައެއް ބަޔާން ކޮށްފައި ނުވާކަން ފާހަގަކޮށް އެހެން ނޫސްވެރިއަކު ވެސް ވަނީ ޖައިސްވަލްއަށް އެހެން އިބާރާތަކުން އެ ސުވާލު ތަކުރާރުކޮށްފަ އެވެ.
އެ ސުވާލުގެ ޖަވާބުގައި އޭނާ ވިދާޅުވީ އެދުވަހުގެ ބައްދަލުވުމުގައި ދެކެވުނު ހުރިހާ ވާހަކަތަކެއް އިންޑިއާއިން އާންމުކުރި ނޫސްބަޔާނުގައި އޮންނާނެ ކަމަށާއި މިހައިތަނަށް ދެކެވުނު ވާހަކައަކީ އެއީ ކަމަށެވެ.
ރާއްޖެއާ އިންޑިއާއާ ދެމެދު ކުރެވެމުންދާ މަޝްވަރާތަކަކީ އަދި އަދިވެސް ކުރިއަށްދާ ކަމެއްކަން ފާހަގަކޮށް ޖައިސްވަލް ވަނީ މަޝްވަރާތަކެއްގައި ދެކެވޭ ވާހަކަައަކީ ވަކި ގޮތަކަށް ކަމެއް ނިންމުން ނޫން ކަމަށް ވިދާޅުވެފަ އެވެ. އަދި ވަރަށް އަވަހަށް ދެގައުމުގެ ދެމެދުގައި އަނެއްކާވެސް ބައްދަލުވުމެއް ބޭއްވުމަށް ތައްޔާރުވަމުންދާ ކަމަށާއި އެ ބައްދަލުވުން ކުރިއަށް ގެންދާނީ އިންޑިއާގައި ކަމަށް ޖައިސްވަލް ވިދާޅުވި އެވެ.
މިދިޔަ އާދީއްތަ ދުވަހު ރާއްޖޭގެ ފޮރިން މިނިސްޓަރީގައި އިންޑިއާގެ އިސްވެރިންގެ ވަފުދަކާއެކު ރާއްޖޭގެ އިސް ބޭފުޅުން ކުރިއަށް ގެންދިޔަ ބައްދަލުވުންތަކާ ގުޅޭގޮތުން އެ ދުވަހު ރައީސް އޮފީހުގެ ޕޮލިސީ ޑިރެކްޓަރު، އަބްދުﷲ ނާޒިމް ވިދާޅުވީ، އިންޑިއާ އާއި ރާއްޖެއާ ދެމެދު މިއަދު ކުރިއަށްދާ ބައްދަލުވުމަށް ރައީސްގެ ފަރާތުން ހުށަހެޅުއްވީ ކުރިއަށް އޮތް 30 ދުވަހުގެ ތެރޭގައި އެ ގައުމުގެ ސިފައިން ރާއްޖެއިން ބޭލުމަށް ކަމަށެވެ.
"މި ބައްދަލުވުމަށް ސަރުކާރުން ރައީސުލްޖުމްހޫރިއްޔާ ވަނީ މާޗް 15، ގެ ކުރިން އިންޑިއާ ސިފައިން މި ގައުމުން ބާލައި ނިންމުމަށް ވަނީ ހުށަހަޅުއްވައިފަ. ސަރުކާރުން، ރައީސް އޮފީހުން ހާއްސަކޮށް ރައީސުލްޖުމްހޫރިއްޔާ ވަނީ ބައްދަލުވުމުގެ އެޖެންޑާއަށް މި ދެންނެވި ތާރީހު ހުށަހަޅުއްވާފަ. އެ މަޝްވަރާތައް މި ދެންނެވި ބައްދަލުވުމުގައި މިހާރު ކުރިއަށް ދަނީ،" ނާޒިމް ވިދާޅުވި އެވެ.
އިންޑިއާގެ ޑޯނިއާއަކާއި ދެ ހެލިކަޕްޓަރު ބޭނުންކޮށްގެން ރާއްޖޭގައި މިހާރު ވެސް ދެމުންދާ އިންސާނީ ހިދުމަތް ދެގައުމުން ރުހޭ ގޮތަކަށް ކުރިއަށް ގެންދެވޭނެ މަގެއް ހޯދުމަށް މަޝްވަރާ ކުރެވުނު ކަމަށް މިއަދު ޖައިސްވަލް ވިދާޅުވި ނަމަވެސް އެދުވަހު ނާޒިމް ވިދާޅުވީ އިންޑިއާގެ ސިފައިންނަށް ރާއްޖެއަކު ނުތިބެވޭނެ ކަމަށާއި ރައްޔިތުން ވެސް ބޭނުންވާ ގޮތަކީ އެއީ ކަމަށެވެ.
"މީގެ އެންމެ މުހިންމު ނުކުތާއަކީ، ފާހަގަ ކުރަންޖެހޭ ކަމަކީ އިންޑިއާ ސިފައިންނަކަށް މި ގައުމަކު ނުތިބެވޭނެ. އެއީ މި ސަރުކާރުގެ ސިޔާސަތަކީ. އެއީ ރައީސް ޑރ. މުހައްމަދު މުއިއްޒުގެ ވައުދަކީ، ދިވެހި ރައްޔިތުން ބޭނުންވާ ގޮތަކީ،" އޭނާ ވިދާޅުވި އެވެ.
ނަމަވެސް އެކަން ކުރާނީ ދެގައުމުގެ ގުޅުމަށް ބުރޫ ނާރާނެ ގޮތަށް ކަމަށް ނާޒިމް އެ ދުވަހު ވިދާޅުވި އެވެ.
މިއަދުގެ ނޫސްވެރިންގެ ބައްދަލުވުމުގައި އިތުރު ނޫސްވެރިޔަކު ކުރި ސުވާލެއްގެ ޖަވާބުގައި ޖައިސްވަލް ވަނީ އިންޑިއާއިން ރާއްޖޭގައި ހިންގަމުންދާ އެއްވެސް ޕްރޮޖެކްޓެއް ހުއްޓައިލުމަށް ނުވަތަ މަޑުޖައްސައިލުމަށް ވެސް ނިންމާފައި ނުވާ ކަމަށް ވިދާޅުވެފަ އެވެ.
"އަޅުގަނޑުމެންގެ ފަރާތުން މިތިބީ ޕްރޮޖެކްޓުތައް ކުރިއަށް ގެންދާ ގޮތަށް، އަޅުގަނޑުމެންނަކީ މިވީހައި ތަނަށް ވެސް ދިވެހިރާއްޖޭގެ ތަރައްގީގެ މުހިންމު ބައިވެރިއެއް، އަދި ކުރިއަށް އޮތް ތަނުގައި ވެސް ރާއްޖޭގެ ތަރައްގީއަށް ދެވެން އޮތް ހުރިހާ އެއްބާރުލުމެއް ދޭން އަޅުގަނޑުމެން މިތިބީ ތައްޔާރަށް،" އޭނާ ވިދާޅުވި އެވެ.
ރައީސް މުއިއްޒުގެ ފޮރިން ޕޮލިސީއަކީ އިންޑިއާއަށް ރާއްޖެއިން ބަރޯސާވެފައި އޮތް އޮތުން ނައްތާލުން ކަމަށް ސަރުކާރުން ބުނެ އެވެ. ރާއްޖޭގައި ތިބި އިންޑިއާ ސިފައިން ބޭލުމަކީ ވެސް އެމަނިކުފާނުގެ ވައުދެކެވެ. މިދިޔަ ނޮވެމްބަރު މަހު ވެރިކަމާ ހަވާލުވެވަޑައިގެން ފަހުން ރައީސް ވަނީ އިންޑިއާއަށް ވަރަށް ބޮޑަށް ފާޑުވިދާޅުވެ، ރާއްޖޭގެ މިނިވަންކަން ދަމަހައްޓާނެ ކަމަށް ވިދާޅުވެފަ އެވެ.
މި ސަރުކާރު ވެރިކަމާ ހަވާލުވިފަހުން އިންޑިއާ އާއި ދިވެހިރާއްޖެއާ ދެމެދު އޮތް ގުޅުން ގޯސްވެފައިވާއިރު ރައީސް މުއިއްޒު އެމަނިކުފާނުގެ އެންމެ ފުރަތަމަ ސްޓޭޓް ވިޒިޓް މިދިޔަ ހަފުތާގައި ކުރެއްވީ އިންޑިއާއާ ވާދަވެރި ޗައިނާއަށެވެ. ޖެނުއަރީ 7، ގައި ފެށި އެ ދަތުރު ނިންމާލެއްވީ އޭގެ ހަ ދުވަސް ފަހުން މިދިޔަ ހުކުރު ދުވަހެވެ.
