ގއ. ވިލިނގިލީގައި ހުންނަ އަތޮޅު ހޮސްޕިޓަލުން ބަލި މީހަކު މާލެ ނުގެނެވި ލަސްވާތީ އެ ރަށު ރައްޔިތުން ނުކުމެ ހޮސްޕިޓަލު ކައިރީގައި މުޒާހަރާކުރަން ފަށައިފި އެވެ.
"އަދަދު" އަށް މައުލޫމާތު ދެމުން އެ ރަށު ރައްޔިތަކު ނަން ނުޖެހުމަށް އެދި ބުނީ، ރޭގެ ވަގުތެއްގައި ކުޑަކުއްޖެއްގެ ހާލު ދެރަވެގެން ހޮސްޕިޓަލަށް ގެންދިޔަ ކަމަށާއި އިތުރު ފަރުވާއަށް އެ ކުއްޖާ މާލެ ގެންދަންޖެހި، އަދިވެސް އިންތިޒާމުތައް ހަމަނުޖެހިގެން އުޅޭ ކަމަށެވެ.
މީގެ އިތުރުން އަތޮޅު ހޮސްޕިޓަލުން ޒަރޫރީ ހިދުމަތްތައް ނުލިބޭ ކަމަށާއި ހޮސްޕިޓަލުގެ ފެންވަރު ދަށްކަން އެ ރަށު ރައްޔިތުން ފާހަގަކުރި އެވެ.
"އެންމެ ކުޑަމިނުން ސްކޭނެއް ވެސް ހަދާ ނުލެވޭ ހޮސްޕިޓަލުން. އެހެންވެ ވަރަށް ގިނަ ރައްޔިތުން މިހާރު ވެސް އެބަތިބި ހޮސްޕިޓަލު ކައިރިއަށް އެއްވެ،" ގއ. ވިލިނގިލީ ރައްޔިތަކު ކިޔައިދިނެވެ.
ގއ. އަތޮޅު ހޮސްޕިޓަލު ކައިރިއަށް ގިނަ އަދަދެއްގެ މީހުން އެއްވެފައިވާއިރު، އެއްވި މީހުންގެ ތެރެއިން ބަޔަކު ވަނީ ހޮސްޕިޓަލުގެ ނަން ބޯޑުގެ މަތީގައި "ހެލްތް ޕޯސްޓް" ޖެހުމަށްފަހު ގަނޑެއް ހިއްޕާފަ އެވެ.
ގއ. ކޫއްޑޫ އެއާޕޯޓުން ބަލިމީހަކު ގެނައުމަށް ފްލައިޓެއް ޗާޓާކުރުމަށް އެދިފައިވާކަން މޯލްޑިވިއަންގެ ޕަބްލިކް ރިލޭޝަން އެގްޒެކެޓިވް، އަހުމަދު މުޝްއިލް ސޮބާހު މި ނޫހަށް ކަށަވަރުކޮށްދެއްވި އެވެ. އަދި ފްލައިޓެއް ހަމަޖެއްސުމުގެ މަސައްކަތް ކުރިއަށްދާ ކަމަށް މުޝްއިލް ވިދާޅުވި އެވެ.
